ಬಂಧನಕ್ಕೆ ರಿಯಾ ಸಿದ್ಧ, ನಿರೀಕ್ಷಣಾ ಜಾಮೀನಿಗೆ ಅರ್ಜಿ ಹಾಕುವುದಿಲ್ಲ: ವಕೀಲ

Published: Sunday, September 6, 2020, 16:31 [IST]

ಸುಶಾಂತ್ ಸಿಂಗ್ ಸಾವು ಪ್ರಕರಣದ ಪ್ರಮುಖ ಆರೋಪಿ ರಿಯಾ ಚಕ್ರವರ್ತಿ ಇಂದು ಎನ್‌ಸಿಬಿ ವಿಚಾರಣೆಗೆ ಹಾಜರಾಗಿದ್ದು, ಇಂದು ಸಂಜೆ ವೇಳೆಗೆ ಬಂಧನಕ್ಕೆ ಒಳಗಾಗುವ ಸಾಧ್ಯತೆ ಇದೆ.

ರಿಯಾ ಳ ಸಹೋದರ ಶೋವಿಕ್, ಸುಶಾಂತ್‌ ನ ಮಾಜಿ ವ್ಯವಸ್ಥಾಪಕ ಸ್ಯಾಮ್ಯುಯೆಲ್ ಮಿರಾಂಡಾ ಹಾಗೂ ಸುಶಾಂತ್ ಸಿಂಗ್ ನಿವಾಸದ ನೌಕರ ದೀಪೇಶ್ ಸಾವಂತ್ ಅವರುಗಳನ್ನು ಈಗಾಗಲೇ ಬಂಧಿಸಲಾಗಿದೆ.

ರಿಯಾ ಚಕ್ರವರ್ತಿಗೆ ಎನ್‌ಸಿಬಿಯು ನೊಟೀಸ್ ಜಾರಿ ಮಾಡಿದ್ದು, ರಿಯಾ ಈಗಾಗಲೇ ವಿಚಾರಣೆಗೆ ಹಾಜರಾಗಿದ್ದಾರೆ. ರಿಯಾ ರನ್ನು ಡ್ರಗ್ಸ್ ಜಾಲದೊಂದಿಗೆ ನಂಟು ವಿಷಯಕ್ಕೆ ಸಂಬಂಧಿಸಿದಂತೆ ವಿಚಾರಣೆ ನಡೆಸಲಿದೆ ಎನ್‌ಸಿಬಿ.

ರಿಯಾ ಳನ್ನು ಬಂಧಿಸುವ ಸಾಧ್ಯತೆ ಇದೆ

ವಿಚಾರಣೆ ನಂತರ ರಿಯಾ ಚಕ್ರವರ್ತಿಯನ್ನು ಬಂಧಿಸುವ ಸಾಧ್ಯತೆ ದಟ್ಟವಾಗಿದೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ರಿಯಾ ಚಕ್ರವರ್ತಿಯ ವಕೀಲ ಸತೀಶ್ ಮನೆಶಿಂಡೆ, 'ಬಂಧನಕ್ಕೆ ರಿಯಾ ಸಿದ್ಧವಾಗಿದ್ದಾರೆ. ಇದೊಂದು ದುರುದ್ದೇಶಪೂರ್ವಕ ಬಂಧನವಾದ್ದರಿಂದ ಆಕೆ ಎಲ್ಲದಕ್ಕೂ ತಯಾರಾಗಿದ್ದಾರೆ' ಎಂದಿದ್ದಾರೆ.

'ಪ್ರೀತಿಸುವುದು ಅಪರಾಧವೆಂದಾದರೆ, ಪರಿಣಾಮಗಳನ್ನು ಎದುರಿಸುತ್ತಾರೆ'

'ಒಬ್ಬರನ್ನು ಪ್ರೀತಿಸುವುದು ತಪ್ಪು ಎನ್ನುವುದಾದರೆ, ಆ ಪ್ರೀತಿಯ ಪರಿಣಾಮಗಳನ್ನು ಎದುರಿಸಲು ರಿಯಾ ಚಕ್ರವರ್ತಿ ಸಿದ್ಧವಾಗಿದ್ದಾರೆ. ಬಿಹಾರ ಪೊಲೀಸ್, ಎನ್‌ಸಿಬಿ, ಇಡಿ ಹಾಕಿರುವ ಯಾವುದೇ ಆರೋಪಗಳ ವಿರುದ್ಧವಾಗಿ ನಿರೀಕ್ಷಣಾ ಜಾಮೀನಿಗೆ ರಿಯಾ ಅರ್ಜಿ ಹಾಕಿಲ್ಲ'. ಎಂದು ವಕೀಲ ಸತೀಶ್ ಸ್ಪಷ್ಟಪಡಿಸಿದ್ದಾರೆ.

ಬಂಧನಕ್ಕೆ ಒಳಗಾಗಿರುವ ರಿಯಾ ಸಹೋದರ

ಎನ್‌ಸಿಬಿಯಿಂದ ಬಂಧನಕ್ಕೆ ಒಳಗಾಗಿರುವ ರಿಯಾ ಸಹೋದರ ಶೋವಿಕ್, ತಾನು ಅಕ್ಕನಿಗಾಗಿ ಡ್ರಗ್ಸ್ ಖರೀದಿ ಮಾಡಿದ್ದೆ ಎಂದು ಒಪ್ಪಿಕೊಂಡಿದ್ದಾರೆ ಎನ್ನಲಾಗಿದೆ. ಸುಶಾಂತ್ ಸಿಂಗ್ ಸಾವು ಪ್ರಕರಣದಲ್ಲಿ ಡ್ರಗ್ಸ್‌ನ ಪಾತ್ರವೂ ಇದೇ ಎಂಬ ಅನುಮಾನದ ಮೇಲೆ ಎನ್‌ಸಿಬಿ ತನಿಖೆ ನಡೆಸುತ್ತಿದೆ.

ಬಾಲಿವುಡ್ ಡ್ರಗ್ಸ್ ನಂಟು ಬಿಚ್ಚಿಕೊಳ್ಳುತ್ತಿದೆ

ಸುಶಾಂತ್ ಸಿಂಗ್ ಸಾವಿನ ತನಿಖೆ ಬಾಲಿವುಡ್‌ ನ ಡ್ರಗ್ಸ್‌ ನಂಟಿನ ಜಾಲವನ್ನು ಹೊರಗೆಳೆಯುತ್ತಿದೆ. ಸುಶಾಂತ್ ಸಿಂಗ್ ಸಾವಿನ ಕುರಿತಂತೆ ಸಿಬಿಐ ಮತ್ತೊಂದೆಡೆಯಿಂದ ತನಿಖೆ ನಡೆಸುತ್ತಿದ್ದು, ಸಿಬಿಐ, ರಿಯಾ ಅವರನ್ನು ಇನ್ನೂ ವಿಚಾರಣೆಗೆ ಒಳಪಡಿಸಿಲ್ಲ.