ದೊಡ್ಡ ಸಿಗ್ನಲ್ ಕೊಟ್ಟ ಹೊಂಬಾಳೆ ಫಿಲ್ಮ್ಸ್? ಯಾವ ಚಿತ್ರದಲ್ಲಿ ಯಾರಿಗೆ ನಾಯಕಿ ಆಗುತ್ತಾರೆ ಕೀರ್ತಿ ಸುರೇಶ್?

ಸುಧಾ ಕೊಂಗರ ಚಿತ್ರದಲ್ಲಿ ಕೀರ್ತಿ?

ಬಹಳ ಹಿಂದೆಯೇ ತಮಿಳು ನಿರ್ದೇಶಕಿ ಸುಧಾ ಕೊಂಗರ ನಿರ್ದೇಶನದಲ್ಲಿ ಹೊಂಬಾಳೆ ಸಂಸ್ಥೆ ಪ್ಯಾನ್ ಇಂಡಿಯಾ ಸಿನಿಮಾ ಘೋಷಿಸಿದೆ. ಆದರೆ ಆ ಚಿತ್ರದ ನಾಯಕ, ನಾಯಕಿ ಯಾರು ಎನ್ನುವುದು ಇನ್ನು ಕನ್ಫರ್ಮ್‌ ಆಗಿಲ್ಲ. ಈ ಹಿಂದೆ ಹೀರೊ ಆಗಿ ತಮಿಳು ನಟ ಸೂರ್ಯ ಹೆಸರು ಕೇಳಿಬಂದಿತ್ತು. ನಂತರ ಸಿಂಬು ಹೆಸರು ಚಾಲ್ತಿಗೆ ಬಂದಿದೆ. ಇದೇ ಚಿತ್ರದಲ್ಲಿ ಸಿಂಬು ಜೋಡಿಯಾಗಿ ಕೀರ್ತಿ ಸುರೇಶ್ ನಟಿಸಬಹುದು ಎನ್ನುವುದು ಕೆಲವರ ಲೆಕ್ಕಾಚಾರ.

ಸುದೀಪ್ ಜೋಡಿಯಾಗಿ ಮಹಾನಟಿ?

ಇತ್ತೀಚೆಗೆ ಕಿಚ್ಚ ಸುದೀಪ್ ಹಾಗೂ ಹೊಂಬಾಳೆ ಫಿಲ್ಮ್ಸ್ ಬ್ಯಾನರ್‌ನಲ್ಲಿ ಸಿನಿಮಾ ಬರುತ್ತೆ ಎನ್ನುವ ಮಾತುಗಳು ಕೇಳಿಬಂದಿತ್ತು. ಕಿಚ್ಚನ ಜೊತೆ ನಿರ್ಮಾಪಕರಾದ ಕಾರ್ತಿಕ್ ಗೌಡ ಫೋಟೊ ಕ್ಲಿಕ್ಕಿಸಿಕೊಂಡು ಮಾಡಿದ್ದ ಪೋಸ್ಟ್ ಇಂತಾದೊಂದು ಅನುಮಾನಕ್ಕೆ ಕಾರಣವಾಗಿತ್ತು. ಇದೇ ಚಿತ್ರಕ್ಕೆ ಮಹಾನಟಿ ಕೀರ್ತಿ ಸುರೇಶ್ ನಾಯಕಿಯಾಗಿ ಆಯ್ಕೆ ಆಗಬಹುದು ಎನ್ನುವುದು ಸುದೀಪ್ ಅಭಿಮಾನಿಗಳ ಊಹೆಯಾಗಿದೆ. ಸುಧಾ ಕೊಂಗರ ನಿರ್ದೇಶನದಲ್ಲಿ ಸುದೀಪ್- ಕೀರ್ತಿ ನಟಿಸಿದರೂ ಅಚ್ಚರಿಪಡಬೇಕಿಲ್ಲ ಎನ್ನುವುದು ಕೆಲವರ ವಾದ.

ಯುವ ಅಥವಾ ರಕ್ಷಿತ್ ಚಿತ್ರಕ್ಕೆ ಕೀರ್ತಿ?

ಹೊಂಬಾಳೆ ಸಂಸ್ಥೆ ರಕ್ಷಿತ್ ಶೆಟ್ಟಿ ನಿರ್ದೇಶಿಸಿ ನಟಿಸುವ 'ರಿಚರ್ಡ್ ಆಂಟನಿ' ಚಿತ್ರವನ್ನು ನಿರ್ಮಾಣ ಮಾಡುತ್ತಿದೆ. ಇನ್ನು ಸಂತೋಷ್ ಆನಂದ್‌ರಾಮ್ ಹಾಗೂ ರಾಘವೇಂದ್ರ ರಾಜ್‌ಕುಮಾರ್ ಕಿರಿಯ ಪುತ್ರ ಯುವರಾಜ್‌ಕುಮಾರ್ ಕಾಂಬಿನೇಷನ್‌ನಲ್ಲಿ ಸಿನಿಮಾ ಘೋಷಿಸಿದೆ. ಈ ಎರಡರಲ್ಲಿ ಒಂದು ಚಿತ್ರಕ್ಕೆ ಕೀರ್ತಿ ಸುರೇಶ್ ನಾಯಕಿ ಆಗಬಹುದು, ಸ್ಯಾಂಡಲ್‌ವುಡ್‌ಗೂ ಎಂಟ್ರಿ ಕೊಡ್ತಾರೆ ಎನ್ನುವುದು ಕೆಲವರ ಲೆಕ್ಕಾಚಾರ. ಒಟ್ನಲ್ಲಿ ಹೊಂಬಾಳೆ ಸಂಸ್ಥೆಯ ಯಾವ ಚಿತ್ರದಲ್ಲಿ ಮಹಾನಟಿ ನಟಿಸ್ತಾರೋ ಕಾದು ನೋಡಬೇಕು.

ತಮಿಳು, ತೆಲುಗು ಚಿತ್ರಗಳಲ್ಲಿ ಕೀರ್ತಿ ಬ್ಯುಸಿ

'ಮಹಾನಟಿ' ಆಗಿ ರಾಷ್ಟ್ರಮಟ್ಟದಲ್ಲಿ ಸದ್ದು ಮಾಡಿದ ಚೆಲುವೆ ಕೀರ್ತಿ ಸುರೇಶ್ ಸಾಲು ಸಾಲು ಸಿನಿಮಾಗಳಲ್ಲಿ ನಟಿಸ್ತಿದ್ದಾರೆ. ತಮಿಳಿನ 'ಮಾಮನನ್' ಹಾಗೂ 'ಸಿರೆನ್' ಚಿತ್ರಗಳಲ್ಲಿ ಬಣ್ಣ ಹಚ್ಚಿದ್ದಾರೆ. 'ಭೋಳಾ ಶಂಕರ' ಚಿತ್ರದಲ್ಲಿ ಚಿರಂಜೀವಿ ಸಹೋದರಿಯಾಗಿ ನಟಿಸ್ತಿರೋ ಮಲಯಾಳಿ ಚೆಲುವೆ 'ದಸರಾ' ಚಿತ್ರದಲ್ಲಿ ನಾನಿಗೆ ಜೋಡಿಯಾಗಿದ್ದಾರೆ. ನಿಧಾನವಾಗಿ ಗ್ಲಾಮರಸ್ ರೋಲ್‌ಗಳಿಗೂ ಸೈ ಎನ್ನುತ್ತಿದ್ದಾರೆ.