ಅದ್ದೂರಿಯಾಗಿ ನೆರವೇರಿತು 'ಬೆಲ್ ಬಾಟಂ' ಚಿತ್ರದ ಮುಹೂರ್ತ

ಜಯತೀರ್ಥ ನಿರ್ದೇಶನದ 'ಬೆಲ್ ಬಾಟಂ' ಸಿನಿಮಾದ ಮುಹೂರ್ತ ಇಂದು ನೆರವೇರಿದೆ. ಬನಶಂಕರಿಯ ಧರ್ಮಗಿರಿ ದೇವಸ್ಥಾನದಲ್ಲಿ ಈ ಹೊಸ ಸಿನಿಮಾ ಸೆಟ್ಟೆರಿದೆ. ತಮ್ಮ ಹೊಸ ಚಿತ್ರದ ಸಂತಸವನ್ನು ತಮ್ಮ ಫೇಸ್ ಬುಕ್ ಖಾತೆಯಲ್ಲಿ ನಟಿ ಹರಿಪ್ರಿಯಾ ಹಂಚಿಕೊಂಡಿದ್ದಾರೆ.

ಈ ಸಿನಿಮಾದ ಮೂಲಕ 'ಕಿರಿಕ್ ಪಾರ್ಟಿ' ನಿರ್ದೇಶಕ ರಿಷಬ್ ಶೆಟ್ಟಿ ನಾಯಕ ಆಗಿದ್ದಾರೆ. ರಿಷಬ್ ಶೆಟ್ಟಿಗೆ ಹರಿಪ್ರಿಯಾ ಜೋಡಿಯಾಗಿದ್ದಾರೆ. ಈ ಹಿಂದೆ ಹರಿಪ್ರಿಯಾ ಜಯತೀರ್ಥ ಅವರ 'ಬುಲೆಟ್ ಬಸ್ಯಾ' ಚಿತ್ರದಲ್ಲಿ ಮತ್ತು ರಿಷಬ್ ಶೆಟ್ಟಿ ಅವರ 'ರಿಕ್ಕಿ' ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಈಗ ಮತ್ತೆ 'ಬೆಲ್ ಬಾಟಂ'ನಲ್ಲಿಯೂ ಈ ಕಾಂಬಿನೇಶನ್ ಗಳು ಒಂದಾಗಿದೆ.

'ಬೆಲ್ ಬಾಟಂ' ಒಂದು ಪತ್ತೇದಾರಿ ಕಥೆಯ ಸಿನಿಮಾವಾಗಿದೆ. ಇಡೀ ಸಿನಿಮಾ 80ರ ದಶಕದಲ್ಲಿ ನಡೆಯಲಿದೆ. ಆ ಕಾಲದ ಹಳ್ಳಿಯಲ್ಲಿ ಸಿನಿಮಾ ಕಥೆ ಸಾಗುತ್ತದೆ. ಇಲ್ಲಿ ಹರಿಪ್ರಿಯಾ ಸುಮ ಎಂಬ ಹುಡುಗಿ ಪಾತ್ರವನ್ನು ಮತ್ತು ರಿಷಬ್ ಶೆಟ್ಟಿ ದಿವಾಕರ್ ಎಂಬ ಪಾತ್ರ ಮಾಡುತ್ತಿದ್ದಾರೆ.