Head Bush Trailer: ಲಾಂಗ್ ಹಿಡ್ದು ಜಯರಾಜ್ ಬರೆದ ಬೆಂಗಳೂರು ಭೂಗತಲೋಕದ ರಕ್ತಸಿಕ್ತ ಅಧ್ಯಾಯ!

ಜಯರಾಜ್ ಆಗಿ ಡಾಲಿ ಆರ್ಭಟ

ಡಾನ್ ಜಯರಾಜ್ ಪಾತ್ರದಲ್ಲಿ ಧನಂಜಯ ನಿಜಕ್ಕೂ ಮೋಡಿ ಮಾಡಿದ್ದಾರೆ. ಬಾಡಿ ಲಾಂಗ್ವೇಜ್, ಲುಕ್ಕು, ಖದರ್ ಎಲ್ಲದರನ್ನು ಜಯರಾಜ್‌ನ ನೆನಪಿಸುವಂತೆ ಕಾಣ್ತಿದೆ. ಇನ್ನು ಪರ್ಫಾರ್ಮೆನ್ಸ್ ವಿಚಾರಕ್ಕೆ ಬಂದರೆ ಧನು ನಟರಾಕ್ಷಸನೇ ಸರಿ. ಸದಾ ಸಿಗರೇಟ್ ಹಿಡಿದು ಚಿಟಿಕೆ ಹೊಡೆಯುತ್ತಾ, ಎದುರಾಳಿಯ ರುಂಡ ಚೆಂಡಾಡುವ ಪರಿ, ಕಣ್ಣಲ್ಲೇ ಬೆಂಕಿ ಉಗುಳುತ್ತಾ ಡೈಲಾಗ್ ಹೇಳುವ ರೀತಿ ಮಜಾ ಕೊಡುತ್ತೆ. ಇಡೀ ಬೆಂಗಳೂರು ನಂದು ಎಂದು ಪಕ್ಕಾ ಗ್ಯಾಂಗ್‌ಸ್ಟರ್ ಜಯರಾಜ್ ಆಗಿ ಧನಂಜಯ ಖದರ್ ತೋರಿಸಿದ್ದಾರೆ.

ಕೊತ್ವಾಲ, ಗಂಗಾ ಖದರ್ ಸೂಪರ್

ಜಯರಾಜ್ ಪಾತ್ರದ ಸುತ್ತಾ 'ಹೆಡ್‌ಬುಷ್' ಸಿನಿಮಾ ಕಥೆ ಸುತ್ತುತ್ತೆ. ಆದರೂ ಚಿತ್ರದಲ್ಲಿ ಜಯರಾಜ್ ಬಂಟ ಗಂಗಾ ಆಗಿ ಲೂಸ್ ಮಾದ ಯೋಗಿ ಮಿಂಚಿದ್ದಾರೆ. ಇನ್ನು ಜಯರಾಜ್ ರೀತಿಯಲ್ಲೇ ಬೆಂಗಳೂರು ಭೂಗತಲೋಕದಲ್ಲಿ ಮೆರೆದ ಕೊತ್ವಾಲ್ ರಾಮಚಂದ್ರ ಪಾತ್ರದಲ್ಲಿ ವಸಿಷ್ಠ ಸಿನಿಮಾ ಅಬ್ಬರಿಸಿದ್ದಾರೆ. ಜಯರಾಜ್ ಇಲ್ಲದ ಸಮಸ್ಯೆದಲ್ಲಿ ಬೆಂಗಳೂರು ಭೂಗತಲೋಕದಲ್ಲಿ ನಂಬರ್ ವನ್ ಆಗಲು ಕೊತ್ವಾಲ ಹೇಗೆಲ್ಲಾ ಪ್ರಯತ್ನ ಪಟ್ಟ ಎನ್ನುವುದನ್ನು ಚಿತ್ರದಲ್ಲಿ ತೋರಿಸಲಾಗ್ತಿದೆ.

ಮೇಕಿಂಗ್, ಬಿಜಿಎಂ ಸಿಂಪ್ಲಿ ಸೂಪರ್

'ಹೆಡ್‌ಬುಷ್' ಸಿನಿಮಾ ಮೇಕಿಂಗ್ ಸೊಗಸಾಗಿದೆ. 70-80ರ ಕಾಲಘಟ್ಟವನ್ನು ಕಟ್ಟಿಕೊಡಲು ಚಿತ್ರತಂಡ ಬಹಳ ಶ್ರಮಿಸಿದೆ. ಅದು ಟ್ರೈಲರ್‌ನಲ್ಲಿ ಗೊತ್ತಾಗುತ್ತೆ. ಕಲಾಸಿಪಾಳ್ಯದ ಸುತ್ತಾಮುತ್ತಲಿನ ಪೇಟೆಗಳಲ್ಲಿ ಅವತ್ತಿನ ಕಾಲಕ್ಕೆ ಜಯರಾಜ ಆರ್ಭಟ ಹೇಗಿತ್ತು ಎನ್ನುವುದರ ಝಲಕ್ ನೋಡಬಹುದು. ಜಯರಾಜ್ ಉಪಟಳ ತಾಳಲಾರದೇ ಕೊನೆಗೆ ಪ್ರಧಾನಿಗಳೇ ಆತನನ್ನು ಮಟ್ಟ ಹಾಕುವಂತೆ ರಾಜ್ಯ ಸರ್ಕಾರದ ಮೇಲೆ ಒತ್ತಡ ತರುವಂತಹ ಸನ್ನಿವೇಶವನ್ನು ತೋರಿಸಲಾಗಿದೆ. ಇನ್ನು ಡಾನ್ ಜಯರಾಜ್ ಕೋರ್ಟ್ ಹಾಲ್‌ ಒಳಗೆ ಲಾಂಗ್ ಹಿಡಿದು ಬರುವ ಸನ್ನಿವೇಶದ ಜೊತೆಗೆ ಟ್ರೈಲರ್ ಮುಗಿಯುತ್ತೆ. ಚರಣ್ ರಾಜ್ ಹಂಟಿಂಗ್ ಬಿಜಿಎಂ ಟ್ರೈಲರ್ ಹೈಲೆಟ್.

ಅಕ್ಟೋಬರ್ 21ಕ್ಕೆ 'ಹೆಡ್‌ಬುಷ್' ತೆರೆಗೆ

ಡೈನಾಮಿಕ್ ಸ್ಟಾರ್ ದೇವರಾಜ್, ಪಾಯಲ್ ರಜಪೂತ್, ಶ್ರುತಿ ಹರಿಹರನ್, ರಘು ಮುಖರ್ಜಿ ಸೇರಿದಂತೆ ದೊಡ್ಡ ತಾರಾಗಣ ಚಿತ್ರದಲ್ಲಿದೆ. ದಾವಣಗೆರೆಯಲ್ಲಿ 'ಹೆಡ್‌ಬುಷ್' ಚಿತ್ರದ ಪ್ರೀ ರಿಲೀಸ್ ಈವೆಂಟ್ ನೆರವೇರಿದೆ. ಹಲವು ದಿನಗಳಿಂದ ನಟ ಧನಂಜಯ ಬೆಲ್‌ಬಾಟಂ ಗೆಟಪ್‌ನಲ್ಲಿ ಊರೂರು ಸುತ್ತಿ ಸಿನಿಮಾ ಪ್ರಮೋಷನ್ ಮಾಡಿದ್ದಾರೆ. ಎರಡು ಭಾಗಗಳಾಗಿ ಸಿನಿಮಾ ಪ್ರೇಕ್ಷಕರ ಮುಂದೆ ಬರ್ತಿದ್ದು, ಇದೇ ಶುಕ್ರವಾರ ಮೊದಲ ಭಾಗವನ್ನು ತೆರೆಮೇಲೆ ನೋಡಬಹುದು.