'ಡಬ್ಬಿಂಗ್ ಬೇಕು' ಚಳುವಳಿ ಮತ್ತೆ ಶುರು: ಏನೇ ಆಗಲಿ 'ಮೋಗ್ಲಿ' ಕನ್ನಡಕ್ಕೆ ಬರಲಿ!

ಕರ್ನಾಟಕದಲ್ಲಿ ಡಬ್ಬಿಂಗ್ ಬ್ಯಾನ್ ಇಲ್ಲ.!

''ಕನ್ನಡಕ್ಕೆ ಡಬ್ಬಿಂಗ್ ಅವಶ್ಯಕ. ವಿದೇಶಿ ಸಿನಿಮಾಗಳನ್ನ ತಮಿಳು, ತೆಲುಗು, ಮಲಯಾಳಂ ಭಾಷೆಗಳಿಗೆ ಡಬ್ ಮಾಡಲಾಗುತ್ತೆ. ಆದರೂ ಆ ಭಾಷೆಗಳ ಮೇಲೆ ದುಷ್ಪರಿಣಾಮ ಆಗಿಲ್ಲ. ಕರ್ನಾಟಕದಲ್ಲಿ ಡಬ್ಬಿಂಗ್ ಬ್ಯಾನ್ ಆಗಿಲ್ಲ. ನಮಗೆ ಬೇಕಾದ ಭಾಷೆಗಳಲ್ಲಿ ಚಿತ್ರ ವೀಕ್ಷಿಸುವುದು ನಮ್ಮ ಹಕ್ಕು'' ಎಂದು ಕನ್ನಡಿಗರು ಟ್ವೀಟ್ ಮಾಡುತ್ತಿದ್ದಾರೆ.

'ಮೋಗ್ಲಿ' ಕೂಡ ಸೇರಲಿ

''ಈಗಾಗಲೇ 'ಫಾಸ್ಟ್ ಅಂಡ್ ಫ್ಯೂರಿಯಸ್', 'ಎನ್ನೈ ಅರಿಂದಾಲ್', 'ವಿವೇಗಮ್' ಸೇರಿದಂತೆ ಹಲವು ಸಿನಿಮಾಗಳು ಕನ್ನಡ ಭಾಷೆಗೆ ಡಬ್ ಆಗಿದೆ. ಈ ಲಿಸ್ಟ್ ಗೆ 'ಮೋಗ್ಲಿ' ಕೂಡ ಸೇರಲಿ'' ಅನ್ನೋದು ಹಲವರ ಬಯಕೆ.

ಕನ್ನಡಿಗರ ಕೋರಿಕೆ

''ಹಾಲಿವುಡ್ ಚಿತ್ರಗಳನ್ನ ಕನ್ನಡ ಭಾಷೆಯಲ್ಲಿ ನೋಡಲು ಐವತ್ತು ಮಿಲಿಯನ್ ಕನ್ನಡಿಗರು ಕಾಯುತ್ತಿದ್ದಾರೆ. ಡಬ್ಬಿಂಗ್ ಚಿತ್ರಗಳಿಗೆ ಕರ್ನಾಟಕದಲ್ಲಿ ದೊಡ್ಡ ಮಾರ್ಕೆಟ್ ಇದೆ. ಹೀಗಾಗಿ, 'ಮೋಗ್ಲಿ' ಚಿತ್ರವನ್ನ ಕನ್ನಡಕ್ಕೆ ಡಬ್ ಮಾಡಿ'' ಅಂತ 'ವಾರ್ನರ್ ಬ್ರೋಸ್ ಪಿಕ್ಚರ್ಸ್'ಗೆ ಕನ್ನಡಿಗರು ಕೇಳಿಕೊಳ್ಳುತ್ತಿದ್ದಾರೆ.

ಟ್ವಿಟ್ಟರ್ ನಲ್ಲಿ ಟ್ರೆಂಡಿಂಗ್

'ಮೋಗ್ಲಿ' ಬಾಯಲ್ಲಿ ಕನ್ನಡ ಬರಬೇಕು ಅಂತ ಪಣ ತೊಟ್ಟಿರುವ ಕನ್ನಡಿಗರು ಟ್ವಿಟ್ಟರ್ ನಲ್ಲಿ #MowgliInKannada ಟ್ರೆಂಡಿಂಗ್ ಮಾಡುತ್ತಿದ್ದಾರೆ.

ಕನ್ನಡಕ್ಕೆ ಯಾಕೆ ಇಲ್ಲ.?

''ಹಾಲಿವುಡ್ ಚಿತ್ರಗಳೆಲ್ಲಾ ಹಿಂದಿ, ತಮಿಳು, ತೆಲುಗಿಗೆ ಡಬ್ ಆಗುವಾಗ ಕನ್ನಡಕ್ಕೆ ಯಾಕೆ ಆಗಲ್ಲ.?'' ಎಂಬ ಪ್ರಶ್ನೆ ಉದ್ಭವವಾಗಿದೆ.

ಮಾತೃ ಭಾಷೆಯಲ್ಲಿ ನೋಡುವ ಹಕ್ಕು ಮಕ್ಕಳಿಗೆ ಇಲ್ವಾ.?

''ತಮ್ಮ ನೆಚ್ಚಿನ ಕಾರ್ಯಕ್ರಮಗಳನ್ನು ಮಾತೃ ಭಾಷೆಯಲ್ಲಿ ನೋಡುವ ಹಕ್ಕು ಕನ್ನಡದ ಮಕ್ಕಳಿಗೆ ಇಲ್ಲ. ಒತ್ತಾಯ ಪೂರ್ವಕವಾಗಿ ಬೇರೆ ಭಾಷೆಯಲ್ಲಿಯೇ ನೋಡಬೇಕು. ಈ ಡಬ್ಬಿಂಗ್ ಬ್ಯಾನ್ ಎಂಬ ಪಿಡುಗು ತೊಲಗಲಿ'' ಅಂತಿದ್ದಾರೆ ಟ್ವೀಟಿಗರು.

ಈಗಿನ ಮಕ್ಕಳಿಗೆ ಅವಕಾಶ ಸಿಗಲಿ.!

''ನಾನು ಚಿಕ್ಕವನಾಗಿದ್ದಾಗ, ಜಂಗಲ್ ಬುಕ್ ಅಥವಾ ಮೋಗ್ಲಿ ಕಥೆಯನ್ನ ಕನ್ನಡದಲ್ಲಿ ನೋಡಿರಲಿಲ್ಲ. ಈಗ ಆ ಅವಕಾಶ ನನ್ನ ಮಕ್ಕಳಿಗಾದರೂ ಸಿಗಲಿ'' ಅಂತಿದ್ದಾರೆ ನೆಟ್ಟಿಗರು.