ವರ್ಮಾ ಮಗಳ ನಿಶ್ಚಿತಾರ್ಥ ನಿರ್ವಿಘ್ನವಾಗಿ ಸಂಪನ್ನ

ಹೈದರಾಬಾದಿನ ರಾಡಿಸನ್ ಹೋಟೆಲ್ ನಲ್ಲಿ ಜ.2 ರಂಉದ್ ನಡೆದ ಈ ಶುಭ ಸಮಾರಂಭದಲ್ಲಿ ಕೇವಲ ಆಪ್ತ ಬಂಧು ವರ್ಗಕ್ಕಷ್ಟೇ ಆಹ್ವಾನ ನೀಡಲಾಗಿತ್ತು ಎಂದು ತಿಳಿದು ಬಂದಿದೆ.

ಆದರೆ, ನಿರ್ದೇಶಕ ಎಸ್ ಎಸ್ ರಾಜಮೌಳಿ ಅವರ ಟ್ವೀಟ್ ನಂತರವಷ್ಟೇ ರೇವತಿ ವರ್ಮಾ ನಿಶ್ಚಿತಾರ್ಥದ ಸುದ್ದಿ ಹೊರ ಜಗತ್ತಿಗೆ ತಿಳಿಯಿತು.

ವರ್ಮಾ ಅಂತೂ ಎಂದಿನಂತೆ ಮದುವೆ, ಮಗಳ ಬಗ್ಗೆ ಮಾತನಾಡುವುದಿರಲಿ, ಟ್ವೀಟ್ ಕೂಡಾ ಮಾಡಿಲ್ಲ.

"Had the pleasure/previlage of watching @RGVzoomin playing a dutiful father at revathi's reception. What a sight!!!! Ha ha ha ha." ಎಂದು ರಾಜಮೌಳಿ ಟ್ವೀಟ್ ಮಾಡಿದ್ದರು.

ರೇವತಿ ಅವರ ಮದುವೆ ದಿನಾಂಕದ ಬಗ್ಗೆ ಇನ್ನೂ ಕುಟುಂಬ ವರ್ಗ ನಿರ್ಧರಿಸಿಲ್ಲ. ರೇವತಿ ಸೆಲೆಬ್ರಿಟಿ ಅಲ್ಲ ಆಕೆ ಮದುವೆಗೆ ಅನಗತ್ಯವಾಗಿ ಮಾಧ್ಯಮಗಳಲ್ಲಿ ಹೈಪ್ ನೀಡುವುದು ಇಷ್ಟವಿಲ್ಲ ಎಂದು ತಿಳಿದು ಬಂದಿದೆ.

ಪ್ರಚಾರದಿಂದ ದೂರ ಉಳಿಯಲು ಬಯಸುವ ಮಗಳು ಒಂದೆಡೆಯಾದರೆ, ಪ್ರಚಾರ ಪ್ರಿಯ ನಿರ್ದೇಶಕ ವರ್ಮಾ ತಮ್ಮ ತರ್ಲೆ ಟ್ವೀಟ್ ಗಳ ಮೂಲಕ ಎಲ್ಲರನ್ನು ಕಾಡುವುದು ಮಾಮೂಲಿ.

ಹಲವಾರು ವರ್ಷಗಳ ಕಾಲ ತಮಗೆ ಮಗಳಿದ್ದಾಳೆ ಎಂಬ ವಿಚಾರವನ್ನು ಗೌಪ್ಯವಾಗಿ ಕಾಪಾಡಿಕೊಂಡು ಬಂದಿದ್ದರು. ಪತ್ರಕರ್ತರು ಮದುವೆ ಬಗ್ಗೆ ಏನಾದರೂ ಪ್ರಶ್ನೆ ಕೇಳಿದರೆ ಹಾರಿಕೆಯ ಉತ್ತರ ಕೊಡುತ್ತಿದ್ದರು. ಮದುವೆ ಸಂಬಂಧಗಳಲ್ಲಿ ನನಗೆ ನಂಬಿಕೆ ಇಲ್ಲ ಎನ್ನುತ್ತಿದ್ದರು. ಆದರೆ ಅವರಿಗೆ ಮಗಳೊಬ್ಬರು ಇದ್ದಾರೆ ಎಂಬುದು ತಡವಾಗಿ ಬೆಳಕಿಗೆ ಬಂದಿತ್ತು.

ವರ್ಮಾ ಸಹೋದರಿಯ ಮಗನ ಮದುವೆ ಸಮಾರಂಭದಲ್ಲಿ ರಾಮ್ ಗೋಪಾಲ್ ಅವರ ಪುತ್ರಿ ರೇವತಿ ಕಾಣಿಸಿಕೊಂಡಿದ್ದರು. ವರ್ಮಾ ಅವರ ಮಾಜಿ ಹೆಂಡತಿ ರತ್ನಶ್ರೀ ಅವರು ಕೂಡಾ ಮದುವೆ ಸಮಾರಂಭದಲ್ಲಿದ್ದರು. ಆದರೆ, ವರ್ಮಾ ಮಾತ್ರ ಈ ಬಗ್ಗೆ ಯಾರಲ್ಲೂ ಏನು ಹೇಳಿರಲಿಲ್ಲ.

ರಕ್ತ ಚರಿತ ಚಿತ್ರದ ಸರಣಿ ಹೊರ ತರುವಲ್ಲಿ ನಿರತರಾಗಿದ್ದ ವರ್ಮಾ ಕೊಂಚ ಬ್ರೇಕ್ ತೆಗೆದುಕೊಂಡು ಸಹೋದರಿ ಮಗನ ಮದುವೆಗೆ ಹೋಗಿ ಬಂದಿದ್ದರು. ಆದರೆ, ಅಲ್ಲಿ ತಮ್ಮ ಮಗಳನ್ನು ಕಂಡ ಬಗ್ಗೆ ಹೇಳಿರಲಿಲ್ಲ.