ಅವಕಾಶವಿಲ್ಲದ ನಟಿ ಇದೀಗ ಕಾಲ್ ಸೆಂಟರ್ ಕೆಲಸಗಾರ್ತಿ; ಮೀಡಿಯಾ ಮುಂದೆ ಕುಳಿತು ಅಳದ ಗಟ್ಟಿಗಿತ್ತಿ!

ಏಕ್ತಾ ಶರ್ಮಾ ಕಿರುತೆರೆಯ ಜನಪ್ರಿಯ ನಟಿ

1998ರಲ್ಲಿ ಮೊದಲ ಬಾರಿಗೆ ಜನಪ್ರಿಯ ಕ್ರೈಮ್ ಥ್ರಿಲ್ಲರ್ ಟಿವಿ ಸರಣಿ ಸಿಐಡಿಯಲ್ಲಿ ಅಭಿನಯಿಸುವ ಮೂಲಕ ಕಿರುತೆರೆ ಇಂಡಸ್ಟ್ರಿಗೆ ಪದಾರ್ಪಣೆ ಮಾಡಿದ ಏಕ್ತಾ ಶರ್ಮಾ ನಂತರ ಹತ್ತಾರು ಧಾರಾವಾಹಿಗಳಲ್ಲಿ ಇಪ್ಪತ್ತಕ್ಕೂ ಹೆಚ್ಚು ವರ್ಷಗಳ ಕಾಲ ಕೆಲಸ ನಿರ್ವಹಿಸಿದ್ದಾರೆ. ಜೋಶಿಲಿ, ಪ್ರತಿಮಾ, ಬ್ರಹ್ಮರಾಕ್ಷಸ್, ಡ್ಯಾಡಿ ಸಮ್ಜಾ ಕರೋ ಖುಸುಮ್ ರೀತಿಯ ಮುಂತಾದ ಟಿವಿ ಸರಣಿ ಮತ್ತು ಧಾರಾವಾಹಿಗಳಲ್ಲಿ ಅಭಿನಯಿಸಿರುವ ಏಕ್ತಾ ಶರ್ಮಾ ತನ್ನ ಅಭಿನಯದಿಂದ ವೀಕ್ಷಕರ ಮನ ಗೆದ್ದು ಜನಪ್ರಿಯ ನಟಿ ಎನಿಸಿಕೊಂಡಿದ್ದರು.

ಕೊರೊನಾ ಕೊಡ್ತು ಕೈ

ಹೀಗೆ ಸಾಲು ಸಾಲು ಧಾರಾವಾಹಿಗಳಲ್ಲಿ ಅಭಿನಯಿಸಿದ್ದ ಏಕ್ತಾ ಶರ್ಮಾ 2021ರಲ್ಲಿ ಅಂತಿಮವಾಗಿ ತೆರೆ ಮೇಲೆ ಕಾಣಿಸಿಕೊಂಡಿದ್ದರು. ಕೊರೊನಾ ಕಾರಣದಿಂದಾಗಿ ಅನೇಕ ಧಾರಾವಾಹಿಗಳ ಕೆಲಸ ನಿಂತಿದ್ದವು, ಹೀಗಾಗಿ ಏಕ್ತಾ ಶರ್ಮಾ ಕೂಡ ಕೆಲಸವಿಲ್ಲದೇ ಕೆಲ ದಿನಗಳ ಕಾಲ ಮನೆಯಲ್ಲೇ ಕೂರುವಂತಾಯಿತು. ತನ್ನ ಬಳಿ ಇದ್ದ ಒಡವೆಗಳನ್ನು ಅಡವಿಟ್ಟು ಸ್ವಲ್ಪ ದಿನ ಜೀವನ ಸಾಗಿಸಿದ ಏಕ್ತಾ ಶರ್ಮಾ ಆಫರ್‌ಗಳಿಗಾಗಿ ಎದುರು ನೋಡಿದ್ದಾರೆ. ಇದರಿಂದ ಯಾವುದೇ ಉಪಯೋಗವಿಲ್ಲ ಎಂಬುದನ್ನು ಅರಿತ ನಂತರ ನಟನಾ ಕ್ಷೇತ್ರವನ್ನೇ ಬಿಟ್ಟು ಕಾಲ್‌ ಸೆಂಟರ್‌ನಲ್ಲಿ ಕೆಲಸಕ್ಕೆ ಸೇರಿಕೊಂಡಿದ್ದಾರೆ.

ಅಳುತ್ತಾ ಕೂರಲಿಲ್ಲ, ಕೆಲಸಕ್ಕೆ ಹೊರಟೆ

ಇನ್ನು ಈ ವಿಷಯವನ್ನು ಸ್ವತಃ ಏಕ್ತಾ ಶರ್ಮಾ ಅವರೇ ದ ಇಂಡಿಯನ್ ಎಕ್ಸ್‌ಪ್ರೆಸ್ ಸಂದರ್ಶನದ ವೇಳೆ ಬಿಚ್ಚಿಟ್ಟಿದ್ದು "ಕೆಲಸವಿಲ್ಲದೇ ಹೋದಾಗ ನಾನು ಮನೆಯಲ್ಲಿ ಕುಳಿತು ಅಳಲಿಲ್ಲ, ನನ್ನ ಬಳಿ ಇದ್ದ ಒಡವೆಗಳನ್ನು ಮಾರಿದೆ ಹಾಗೂ ಎಲ್ಲಾ ಸರಿ ಹೋಗಬಹುದೆಂಬ ನಿರೀಕ್ಷೆಯಲ್ಲಿದ್ದೆ. ಆದರೆ ಯಾವುದೂ ಸರಿ ಹೋಗಲಿಲ್ಲ. ನಾನು ಶಿಕ್ಷಣ ಕಲಿತ ಮಹಿಳೆ, ಒಂದು ವರ್ಷ ಕಳೆದ ಬಳಿಕ ಕಾಲ್ ಸೆಂಟರ್ ಕೆಲಸಕ್ಕೆ ಸೇರಿದೆ" ಎಂದು ಹೇಳಿಕೊಂಡಿದ್ದಾರೆ.

ಕೋಪಿಷ್ಟ ಜನರ ಜೊತೆ ಮತನಾಡಬೇಕು

ಇನ್ನೂ ಮುಂದುವರೆದು ಮಾತನಾಡಿರುವ ಏಕ್ತಾ ಶರ್ಮಾ ತಾನು ಮಾಡುತ್ತಿರುವ ಕೆಲಸದ ಬಗ್ಗೆ ತನಗೆ ಹೆಮ್ಮೆ ಇದೆ ಎಂದಿದ್ದಾರೆ. ನಟಿಯಾಗಿದ್ದಾಗ ಅಕ್ಕಪಕ್ಕ ಸಹಾಯಕರನ್ನು ಇಟ್ಟುಕೊಂಡು ಡೈಯಟ್ ಆಹಾರ ಸೇವಿಸುತ್ತಾ ಐಷಾರಾಮಿ ಜೀವನ ಸಾಗಿಸುತ್ತಿದ್ದೆ, ಆದರೆ ಈಗ ಹಾಗಿಲ್ಲ, ಕೋಪಿಷ್ಟ ಗ್ರಾಹಕರೊಡನೆ ಮಾತನಾಡುತ್ತಿದ್ದೇನೆ, ಜೀವನವನ್ನು ವೀರರಂತೆ ಸಾಗಿಸಬೇಕೇ ಹೊರತು ಬಲಿಪಶುಗಳಾಗಬಾರದು ಎಂದಿದ್ದಾರೆ.