4 ಭಾಷೆಗಳಲ್ಲೂ 'ವಿಜಯಾನಂದ' ಟೀಸರ್ ಸೂಪರ್ ಹಿಟ್

ಟೀಸರ್ ಹೇಗಿದೆ?

ವಿಜಯ ಸಂಕೇಶ್ವರ ತಾರುಣ್ಯದ ದಿನಗಳು ಹಾಗೂ ಉದ್ಯಮವನ್ನು ಶುರು ಮಾಡಿದ ಸಂದರ್ಭವನ್ನು ಟೀಸರ್‌ನಲ್ಲಿ ಹೈಲೆಟ್ ಮಾಡಿ ತೋರಿಸಲಾಗಿದೆ. ವಿಜಯ ಸಂಕೇಶ್ವರ ತಂದೆ ಬಿ. ಜಿ ಸಂಕೇಶ್ವರ ಪಾತ್ರದಲ್ಲಿ ಅನಂತ್‌ ನಾಗ್, ಮಂಡಿ ಮಾಲೀಕನ ಪಾತ್ರದಲ್ಲಿ ಕ್ರೇಜಿ ಸ್ಟಾರ್ ವಿ. ರವಿಚಂದ್ರನ್ ಮಿಂಚಿದ್ದಾರೆ. ವಿಜಯ ಸಂಕೇಶ್ವರ ಪಾತ್ರದಲ್ಲಿ ನಿಹಾಲ್ ಗಮನ ಸೆಳೆದಿದ್ದಾರೆ. ಪ್ರತಿ ಫ್ರೇಮ್ ನೈಜತೆಗೆ ಹತ್ತಿರ ಎನಿಸುವಂತಿದ್ದು, ಹಿನ್ನೆಲೆ ಸಂಗೀತವೂ ಸೊಗಸಾಗಿದೆ.

'ವಿಜಯಾನಂದ' ಟೀಸರ್‌ಗೆ ಸಖತ್ ರೆಸ್ಪಾನ್ಸ್

ದಕ್ಷಿಣ ಭಾರತದ 4 ಭಾಷೆಗಳಲ್ಲೂ 'ವಿಜಯಾನಂದ' ಟೀಸರ್‌ ಹಿಟ್ ಆಗಿದೆ. ಮೂರು ದಿನಕ್ಕೆ ಕನ್ನಡ ಟೀಸರ್‌ 2.7 ಮಿಲಿಯನ್ ವೀವ್ಸ್ ಗಿಟ್ಟಿಸಿದ್ರೆ, ತಮಿಳು ಟೀಸರ್ 2.1, ತೆಲುಗು ಟೀಸರ್ 1.5 ಹಾಗೂ ಮಲಯಾಳಂ ಟೀಸರ್‌ಗೆ 1.2 ವೀವ್ಸ್‌ ಸಿಕ್ಕಿದೆ. ಪರ ಭಾಷಿಕರು ಕೂಡ ಈ ಮೋಟಿವೇಷನಲ್ ಬಯೋಪಿಕ್ ಸಿನಿಮಾ ನೋಡಲು ಕಾತುರದಿಂದ ಕಾಯುತ್ತಿದ್ದಾರೆ.

ಪ್ರತಿಭಾನ್ವಿತ ತಂಡದ ಶ್ರಮ

ಕನ್ನಡ ಚಿತ್ರರಂಗ ಮೊದಲ ಅಫೀಷಿಯಲ್ ಹಾಗೂ ಕಮರ್ಷಿಯಲ್ ಬಯೋಪಿಕ್ ಸಿನಿಮಾ 'ವಿಜಯಾನಂದ'. ರಿಷಿಕಾ ಶರ್ಮಾ ಘಟಾನುಘಟಿ ಕಲಾವಿದರು ಮತ್ತು ನುರಿತ ತಂತ್ರಜ್ಞರ ತಂಡ ಕಟ್ಟಿಕೊಂಡು ಸಿನಿಮಾ ಕಥೆ ಹೇಳುತ್ತಿದ್ದಾರೆ. ವಿನಯಾ ಪ್ರಸಾದ್, ಪ್ರಕಾಶ್ ಬೆಳವಾಡಿ, ಅನೀಶ್ ಕುರುವಿಲ್ಲಾ, ಸಿರಿ ಪ್ರಹ್ಲಾದ್ ತಾರಾಗಣದಲ್ಲಿ ಇದ್ದಾರೆ. ಗೋಪಿ ಸುಂದರ್ ಸಂಗೀತ, ಕೀರ್ತನ್ ಪೂಜಾರಿ ಛಾಯಾಗ್ರಹಣ, ಹೇಮಂತ್ ಕುಮಾರ್ .ಡಿ ಸಂಕಲನ ಚಿತ್ರಕ್ಕಿದೆ.

ಇದೇ ವರ್ಷ 'ವಿಜಯಾನಂದ' ರಿಲೀಸ್

ಚಿತ್ರೀಕರಣ ಭರದಿಂದ ಸಾಗಿದ್ದು, ಇದೇ ವರ್ಷ ಚಿತ್ರವನ್ನು ಪ್ರೇಕ್ಷಕರ ಮುಂದೆ ತರುವ ಪ್ರಯತ್ನ ನಡೀತಿದೆ. ರೋರಿಂಗ್ ಸ್ಟಾರ್‌ ಶ್ರೀಮುರಳಿ ಸೇರಿದಂತೆ ಸಾಕಷ್ಟು ಸೆಲೆಬ್ರೆಟಿಗಳು 'ವಿಜಯಾನಂದ' ಟೀಸರ್ ನೋಡಿ ಮೆಚ್ಚಿಕೊಂಡಿದ್ದಾರೆ. ಕಳೆದ ವರ್ಷ ವಿಆರ್‌ಎಲ್‌ ಕ್ಯಾಂಪಸ್‌ನಲ್ಲೇ ಬಹಳ ದೊಡ್ಡಮಟ್ಟದಲ್ಲಿ ಸಿನಿಮಾ ಮುಹೂರ್ತ ನೆರವೇರಿತ್ತು. ಅಷ್ಟೇ ಅದ್ಧೂರಿಯಾಗಿ ಸಿನಿಮಾವನ್ನು ರಿಲೀಸ್ ಮಾಡಲು ತಂಡ ಮುಂದಾಗಿದೆ.