ಬಿಗ್‌ಬಾಸ್ ಮನೆ ಸದಸ್ಯರಿಗೆ ಅರಣ್ಯವಾಸ, ಮನೆಗೆ ಎಂಟ್ರಿ ಕೊಟ್ಟ ಹೊಸ ಸ್ಪರ್ಧಿ! ಯಾರದು?

ಸ್ಪರ್ಧಿಗಳಿಗೆ ಹೊಸ ಟಾಸ್ಕ್

ಇದೀಗ ಬಿಗ್‌ಬಾಸ್ ಮನೆಯ ಸ್ಪರ್ಧಿಗಳಿಗೆ ಬಿಗ್‌ಬಾಸ್ ಹೊಸದೊಂದು ಟಾಸ್ಕ್‌ ನೀಡಿದ್ದಾರೆ. ಸ್ಪರ್ಧಿಗಳೆಲ್ಲರೂ ಬಿಗ್‌ಬಾಸ್ ಮನೆಯ ಅಂಗಳದಲ್ಲಿ ಕೃತಕವಾಗಿ ನಿರ್ಮಿಸಲಾಗಿರುವ ಕಾಡಿನಲ್ಲೇ ವಾಸ ಮಾಡಬೇಕು. ತಾವು ತಂದ ಬಟ್ಟೆಗಳನ್ನು ಧರಿಸದೆ ಗೋಣಿಚೀಲಗಳಿಂದ ಉಡುಪುಗಳನ್ನು ಮಾಡಿಕೊಳ್ಳಬೇಕು. ಶೌಚಾಲಯ ಹೊರತುಪಡಿಸಿ ಮನೆಯ ಇನ್ನೇನನ್ನೂ ಬಳಸಬಾರದು. ಟೂತ್‌ಬ್ರಶ್, ಪೇಸ್ಟ್‌ಗಳನ್ನು ಸಹ ಬಳಸುವಂತಿಲ್ಲ. ಅಡುಗೆಯನ್ನೂ ಸಹ ಸೌದೆ ಒಲೆಯಲ್ಲಿಯೇ ಮಾಡಿಕೊಳ್ಳಬೇಕು.

ಹೊಸ ಸದಸ್ಯೆ ಯಾರು?

ಮನೆಯ ಸದಸ್ಯರೆಲ್ಲರೂ ಈ ಟಾಸ್ಕ್‌ನಲ್ಲಿ ಭಾಗಿಯಾಗಿರುವಾಗ ಬಿಗ್‌ಬಾಸ್ ಮನೆಗೆ ಹೊಸ ಸದಸ್ಯರೊಬ್ಬರ ಎಂಟ್ರಿ ಆಗಿದೆ. ಮನೆಯ ಹೊಸ ಸದಸ್ಯರು ಮಹಿಳೆಯೇ ಆಗಿರುವುದು ಪ್ರೋಮೊದಿಂದ ಗೊತ್ತಾಗುತ್ತಿದೆಯಾದರೂ ಆ ಮಹಿಳೆ ಯಾರು ಎಂಬುದನ್ನು ಪ್ರೋಮೋದಲ್ಲಿ ತೋರಿಸಲಾಗಿಲ್ಲ. ಆದರೆ ಕೆಲವು ಮೂಲಗಳ ಪ್ರಕಾರ, ಇತ್ತೀಚೆಗಷ್ಟೆ ಎಲಿಮಿನೇಟ್ ಆದ ದೀಪಿಕಾ ದಾಸ್ ಅನ್ನು ಸೀಕ್ರೆಟ್ ರೂಂನಲ್ಲಿರಿಸಿ ಈಗ ಮತ್ತೆ ಬಿಗ್‌ಬಾಸ್‌ಗೆ ಕರೆತರಲಾಗಿದೆ ಎನ್ನಲಾಗುತ್ತಿದೆ.

ಸೋನು ಗೌಡ ಹೋಗುತ್ತಾರೆ ಎನ್ನಲಾಗಿತ್ತು

ಕೆಲವು ದಿನಗಳ ಹಿಂದೆ ಹಬ್ಬಿದ್ದ ಸುದ್ದಿಯಂತೆ, ಬಿಗ್‌ಬಾಸ್ ಮನೆಗೆ ಒಟಿಟಿ ಸ್ಪರ್ಧಿ ಸೋನು ಗೌಡ ಹೋಗುತ್ತಾರೆ ಎನ್ನಲಾಗಿತ್ತು. ಒಟಿಟಿ ಸೀಸನ್‌ನಲ್ಲಿ ಸೋನು ಗೌಡ ಪ್ರಬಲ ಕಂಟೆಸ್ಟೆಂಟ್ ಆಗಿ ಹೊರಹೊಮ್ಮಿದ್ದರು. ಫಿನಾಲೆ ವರೆಗೆ ಸೋನು ಗೌಡ ಬಂದಿದ್ದರು ಆದರೆ ಅಂತಿಮವಾಗಿ ಟಿವಿ ಸೀಸನ್‌ಗೆ ರಾಕೇಶ್ ಅಡಿಗ, ಸಾನಿಯಾ ಐಯ್ಯರ್, ಆರ್ಯವರ್ಧನ್ ಹಾಗೂ ರೂಪೇಶ್ ಶೆಟ್ಟಿ ಆಯ್ಕೆ ಆಗಿದ್ದರು. ರೂಪೇಶ್ ಶೆಟ್ಟಿಯನ್ನು ಚಾಂಪಿಯನ್ ಎಂದು ಹೆಸರಿಸಲಾಗಿತ್ತು.

ಮನೆಯಲ್ಲಿ ಉಳಿದಿರುವವರ್ಯಾರು?

ಇದೀಗ ಬಿಗ್‌ಬಾಸ್ ಮನೆಯಲ್ಲಿ ವಿನೋದ್ ಗೊಬ್ರಗಾಲ, ಆರ್ಯವರ್ಧನ್, ಅಮೂಲ್ಯ, ರಾಕೇಶ್ ಅಡಿಗ, ಪ್ರಶಾಂತ್ ಸಂಬರ್ಗಿ, ಅರುಣ್ ಸಾಗರ್, ಕಾವ್ಯಾ, ಅನುಪಮಾ, ದಿವ್ಯಾ ಉರುಡಗ, ರೂಪೇಶ್ ಶೆಟ್ಟಿ, ರೂಪೇಶ್ ರಾಜಣ್ಣ ಅವರುಗಳಿದ್ದಾರೆ. ಈಗ ಬಿಗ್‌ಬಾಸ್ ಮನೆಗೆ ಹೊಸ ಸ್ಪರ್ಧಿಯೊಬ್ಬರ ಎಂಟ್ರಿ ಆಗಿರುವುದರಿಂದ ಮನೆಯ ಸದಸ್ಯರ ನಡುವಿನ ಈಕ್ವೇಶನ್‌ಗಳು ಬದಲಾಗುವುದು ಪಕ್ಕಾ.