ಇನ್ನೆಷ್ಟು ದಿನ ಪ್ರಸಾರವಾಗುತ್ತವೆ ಟಿವಿ ಧಾರವಾಹಿಗಳು?

ಎಲ್ಲಾ ಚಿತ್ರೀಕರಣ ಬಂದ್ ಮಾಡುವಂತೆ ಆದೇಶ

ಹೌದು ಕೊರೊನಾ ಭಾರತಕ್ಕೆ ಪ್ರವೇಶವಿಟ್ಟ ಕೆಲವೇ ದಿನಗಳಲ್ಲಿ ಮುಂಜಾಗೃತೆಯಾಗಿ ಚಿತ್ರೀಕರಣಗಳನ್ನು ಬಂದ್ ಮಾಡುವಂತೆ ಆದೇಶ ಹೊರಡಿಸಲಾಯಿತು. ರಾಜ್ಯದಲ್ಲೂ ಸಹ ಈ ಆದೇಶಗಳು ಬೇಗನೇ ಜಾರಿಗೆ ಬಂದವು.

ಹೆಚ್ಚು ಶೂಟಿಂಗ್ ಮಾಡಿಟ್ಟುಕೊಂಡಿದ್ದವು ಕೆಲವು ಧಾರವಾಹಿಗಳು

ಚಿತ್ರೀಕರಣ ಬಂದ್ ಮಾಡುವ ಮುನ್ನಾ ಸಿಕ್ಕ ಕಡಿಮೆ ಕಾಲಾವಕಾಶದಲ್ಲಿ ಧಾರವಾಹಿ ಯುನಿಟ್‌ಗಳು ದಿನಕ್ಕೆರಡು ಶಿಫ್ಟ್‌ಗಳಂತೆ ಚಿತ್ರೀಕರಣ ಮಾಡಿ ದಿನವೊಂದಕ್ಕೆ ಎರಡು-ಮೂರು ಎಪಿಸೋಡ್‌ಗಳನ್ನು ಚಿತ್ರೀಕರಣ ಮಾಡಿಕೊಂಡಿದ್ದರು.

ಎರಡು ವಾರ ಧಾರವಾಹಿ ಪ್ರಸಾರವಾಗಿವೆ

ಅದರಂತೆ ಈಗಾಗಲೇ ಎರಡು ವಾರ ಧಾರವಾಹಿಗಳು ಪ್ರಸಾರವಾಗಿವೆ. ಆದರೆ ಹೀಗೆಯೇ ಹೆಚ್ಚು ದಿನ ನಡೆಯುವದಿಲ್ಲ. ಕೆಲವು ಧಾರವಾಹಿಗಳ ಬಳಿ ಕೇವಲ ಈ ವಾರಕ್ಕಾಗುವಷ್ಟು ಮಾತ್ರವೇ ಸರಕು ಉಳಿದಿದೆ. ಇನ್ನು ಕೆಲವು ಧಾರವಾಹಿ ತಂಡದ ಬಳಿ ಏಪ್ರಿಲ್ ಮೊದಲ ವಾರ ಮುಗಿಸುವಷ್ಟು ಸರಕು ಇದೆ.

ಸಮಯ ಕೊಲ್ಲುವ ಯತ್ನ ಮಾಡುತ್ತಿವೆ ಚಾನೆಲ್‌ಗಳು

ಶೂಟಿಂಗ್ ಮಾಡಿಕೊಂಡಿರುವ ಎಪಿಸೋಡ್‌ಗಳು ಕಡಿಮೆ ಇರುವ ಧಾರವಾಹಿಗಳು ಹಾಡುಗಳನ್ನು ಪೂರ್ಣ ಹಾಕಿ ಸಮಯ ಕೊಲ್ಲುವ ತಂತ್ರವನ್ನು ಅನುಸರಿಸುತ್ತಿವೆ. ಚಿತ್ರೀಕರಣ ಮಾಡಿಟ್ಟುಕೊಂಡಿರುವ ಎಪಿಸೋಡ್‌ಗಳು ಮುಗಿದ ಬಳಿಕ ಮರುಪ್ರಸಾರ ಮಾಡಲು ಬಹುತೇಕ ಎಲ್ಲಾ ಧಾರವಾಹಿ ತಂಡಗಳು ಸಜ್ಜಾಗಿವೆ.

ಒಂದು ದಿನಕ್ಕೆ ಒಂದೇ ಎಪಿಸೋಡ್ ಚಿತ್ರೀಕರಣ

ಉತ್ತಮ ಗುಣಮಟ್ಟದ ಧಾರವಾಹಿಗಳು ಒಂದು ಎಪಿಸೋಡ್ ಚಿತ್ರೀಕರಣ ಮಾಡಲು ಹೆಚ್ಚು ಸಮಯ ತೆಗೆದುಕೊಳ್ಳುವ ಕಾರಣ ಅವುಗಳ ಬಳಿ ಹೆಚ್ಚಿನ 'ಎಪಿಸೋಡ್ ಬ್ಯಾಂಕ್' ಇಲ್ಲ ಹಾಗಾಗಿ ಕೆಲವೇ ದಿನಗಳಲ್ಲಿ ಧಾರವಾಹಿಗಳು ಮರುಪ್ರಸಾರ ಆರಂಭವಾಗಲಿದೆ.