ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಕಥೆಯೊಂದು ಶುರುವಾಗಲಿದೆ

ಯಾವುದು ಆ ಧಾರಾವಾಹಿ?

ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಈಗಾಗಲೇ ಕೆಲ ಧಾರಾವಾಹಿಗಳು ಮುಕ್ತಾಯಗೊಂಡಿದ್ದು, ಇದರ ಜಾಗಗಳಲ್ಲಿ ಹೊಸ ಹೊಸ ಧಾರಾವಾಹಿಗಳು ಶುರುವಾಗುತ್ತಿವೆ. ಈ ವಾಹಿನಿಯಲ್ಲಿ ಬಹಳ ಬೇಗ ಹೊಸ ಧಾರಾವಾಹಿ ಶುರುವಾಗಲಿದೆ. ಅದರಲ್ಲೂ ಒಂದು ಧಾರಾವಾಹಿಯಲ್ಲ. ಎರಡೆರಡು ಧಾರಾವಾಹಿ ಶುರುವಾಗುತ್ತಿದೆ. ಆ ಧಾರಾವಾಹಿಗಳು ಯಾವುವು.? ಅದರಲ್ಲಿ ಯಾರೆಲ್ಲಾ ಇದ್ದಾರೆ.? ಅದರ ಕಥೆ ಏನು ಎಂಬುದನ್ನು ಮುಂದೆ ನೋಡೋಣ ಬನ್ನಿ..

ಮರಿ ಕೋಗಿಲೆಯ ಕಥೆ

ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಕೀರ್ತಿ ಕುಮಾರ ಹಾಡುಗಾರ ಧಾರಾವಾಹಿ ಶುರುವಾಗಬೇಕಿದೆ. ಆದರೆ ಯಾವಾಗ ಎಂಬ ಬಗ್ಗೆ ಇನ್ನೂ ತಿಳಿದು ಬಂದಿಲ್ಲ. ಈ ಧಾರಾವಾಹಿಯಲ್ಲಿ ಹರ ಹರ ಮಹಾದೇವ ಖ್ಯಾತಿಯ ವಿನಯ್ ಗೌಡ ಹಾಗೂ ನಟಿ ರಜನಿ ನಟಿಸಿದ್ದಾರೆ. ಈ ಬಗ್ಗೆ ವಿನಯ್ ಗೌಡ ಕೂಡ ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ರಜಿನಿ ಅವರು ಹಳ್ಳಿ ಮಗಳ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ವಿನಯ್ ಗೌಡ ಹಾಡುಗಾರನ ಪಾತ್ರದಲ್ಲಿ ನಟಿಸಿದ್ದಾರೆ. ಇದರಲ್ಲಿ ಮರಿ ಕೋಗಿಲೆಯೂ ಇದ್ದು, ಮಗು, ಹಾಗೂ ಹಾಡಿನ ಸುತ್ತ ಧಾರಾವಾಹಿಯ ಕಥೆ ಸಾಗುತ್ತದೆ. ಇದರ ಪ್ರೋಮೋವನ್ನು ಎರಡು ತಿಂಗಳ ಹಿಂದೆಯೇ ವಾಹಿನಿ ತನ್ನ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದೆ.

ಸ್ವಾವಲಂಬಿ ಹೆಣ್ಣಿನ ಜೀವನ

ಇನ್ನು ಇದರ ಜೊತೆಗೆ ಮತ್ತೊಂದು ಧಾರಾವಾಹಿಯು ಶುರುವಾಗುತ್ತಿದೆ. ಕಥೆಯೊಂದು ಶುರುವಾಗಿದೆ ಟೈಟಲ್ ನಲ್ಲಿ ಹೊಸ ಧಾರಾವಾಹಿಯ ಪ್ರೋಮೋ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಹರಿದಾಡುತ್ತಿದೆ. ಪ್ರೋಮೋದಲ್ಲಿ ತೋರಿಸಿದಂತೆ ಈ ಧಾರಾವಾಹಿಯಲ್ಲಿ ಹೆಣ್ಣಿಗೆ ಪ್ರಾಮುಖ್ಯತೆಯನ್ನು ನೀಡಲಾಗಿದೆ. ಕೃತಿ ಹೆಸರಿನಲ್ಲಿ ನಟಿ ಅಕ್ಷತಾ ದೇಶಪಾಂಡೆ ಈ ಧಾರಾವಾಹಿಯಲ್ಲಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಸ್ವಾವಲಂಬಿ ಹೆಣ್ಣಿನ ಸವಿಯಾದ ಪ್ರೇಮ ಕಥೆ ಎಂದು ವರ್ಣಿಸಲಾಗಿದ್ದು, ಅತೀ ಶೀಘ್ರದಲ್ಲಿ ಪ್ರಸಾರವಾಗಲಿದೆ ಎನ್ನಲಾಗಿದೆ. ಆದರೆ ಯಾವಾಗ ಏನು ಎಂಬುದು ಇನ್ನೂ ತಿಳಿದು ಬಂದಿಲ್ಲ.

ಹಿಂದಿ, ಕನ್ನಡದಲ್ಲೂ ಮೂಡಿ ಬರಲಿರುವ ಧಾರಾವಾಹಿ

ಇನ್ನು ಈ ಧಾರಾವಾಹಿಯೂ ಬೆಂಗಾಲಿಯಲ್ಲಿ ಮೂಡಿ ಬಂದ ಸೀರಿಯಲ್ ರಿಮೇಕ್ ಎನ್ನಲಾಗಿದೆ. ಇದು ಬೆಂಗಾಲಿಯಲ್ಲಿ ಘಟಚೋರಾ ಎಂಬ ಧಾರಾವಾಹಿಯ ರೀಮೇಕ್ ಎಂದಿದ್ದು, ಹಿಂದಿಯಲ್ಲೂ ಈ ಧಾರಾವಾಹಿಯನ್ನು ತೇರಿ ಮೇರಿ ದೊರಿಯಾನ್ ಎಂದು ರೀಮೇಕ್ ಮಾಡಲಾಗಿದೆಯಂತೆ. ಘಟಚೋರಾ ಎಂಬ ಬೆಂಗಾಲಿ ಧಾರಾವಾಹಿಯನ್ನು ಆಧರಿಸಿ, ಕನ್ನಡದಲ್ಲಿ ಕಥೆಯೊಂದು ಶುರುವಾಗಿದೆ ಸೀರಿಯಲ್ ಅನ್ನು ನಿರ್ಮಿಸಲಾಗಿದೆ ಎನ್ನಲಾಗುತ್ತಿದೆ. ಆದರೆ ಈ ಬಗ್ಗೆ ಹೆಚ್ಚಿನ ಮಾಹಿತಿಯನ್ನು ಮುಂದಿನ ದಿನಗಳಲ್ಲಿ ತಿಳಿಯಬೇಕಿದೆ.