ಶಮಿತಾ ಶೆಟ್ಟಿ ಜತೆ ನೈಟ್ ಕ್ಲಬ್ ನಲ್ಲಿ ಶೇನ್ ವಾರ್ನ್!

By Staff

Published: Wednesday, May 20, 2009, 15:02 [IST]

ಚಿತ್ರನಟಿಯರು ಮತ್ತು ಕ್ರಿಕೆಟಿಗರ ನಡುವಣ ಸ್ನೇಹ, ಗಾಸಿಪ್ಪು ನಿನ್ನೆ ಮೊನ್ನೆಯದಲ್ಲ. ಪಟೌಡಿ - ಶರ್ಮಿಳಾ ಠಾಗೋರ್, ರವಿಶಾಸ್ತ್ರಿ - ರೀತೂ ಸಿಂಗ್, ಅಜರುದ್ದೀನ್ - ಸಂಗೀತಾ ಬಿಜಿಲಾನಿ, ಮೊಹಿನ್ ಖಾನ್ - ರೀನಾ ರಾಯ್ ಈ ರೀತಿಯ ಹಲವು ಉದಾಹರಣೆಗಳಿವೆ. ತೀರಾ ಇತ್ತೀಚಿಗೆ ಯುವರಾಜ್ ಸಿಂಗ್ - ದೀಪಿಕಾ ಪಡುಕೋಣೆ, ಮಹೇಂದ್ರ ಸಿಂಗ್ ಧೋನಿ - ಲಕ್ಷ್ಮಿ ರೈ ಬಗ್ಗೆಯೂ ಗಾಸಿಪ್ಪು ಗಳಿದ್ದವು. ಇಂತಹ ಗಾಸಿಪ್ಪುಗಳ ಸಾಲಿಗೆ ಇನ್ನೊಂದು ಜೋಡಿ ತಯಾರಾಗುತ್ತಿದೆ ಎನ್ನುವ ಗುಸುಗುಸು ಸುದ್ದಿ ದಕ್ಷಿಣ ಆಫ್ರಿಕಾದಿಂದ ಬಂದಿದೆ.

ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಮಾಜಿ ಆಟಗಾರ ಹಾಗೂ ಶಿಲ್ಪಾ ಶೆಟ್ಟಿ, ರಾಜ್ ಕುಂದ್ರಾ ಒಡೆತನದ ರಾಜಸ್ತಾನ್ ರಾಯಲ್ಸ್ ತಂಡದ ನಾಯಕ ಶೇನ್ ವಾರ್ನ್ ಮತ್ತು ಶಿಲ್ಪಾ ಶೆಟ್ಟಿ ತಂಗಿ ಶಮಿತಾ ಶೆಟ್ಟಿ ಮಧ್ಯೆ ಈ ರೀತಿಯ ಸುದ್ದಿಯೊಂದು ಸದ್ಯಕ್ಕೆ ಚಾಲ್ತಿಯಲ್ಲಿದೆ. ತನ್ನ ಖಾಸಗಿ ಬದುಕಿನಲ್ಲಿ ಸಭ್ಯಸ್ಥನಲ್ಲದ ಆಸ್ಟ್ರೇಲಿಯಾದ 'ಬ್ಯಾಡ್ ಬಾಯ್' ವಾರ್ನ್ ಮತ್ತು ಶಮಿತಾ ಶೆಟ್ಟಿ ನಡುವೆ ಗೆಳೆತನದ ಬೆಸುಗೆ ಏರ್ಪಟ್ಟಿದೆ ಎಂದು ಮೈದಾನದಲ್ಲೂ ಹೊರಗೂ ಕೇಳಿಬರುತ್ತಿದೆ. ಹಿಂದಿ ಚಿತ್ರರಂಗದಲ್ಲಿ ಅಷ್ಟೇನೂ ಹೆಸರು ಮಾಡದ ಶಮಿತಾರನ್ನು ಒಮ್ಮೆಯಷ್ಟೆ ಭೇಟಿಯಾಗಿದ್ದ ವಾರ್ನ್ ಈಗ ಫುಲ್ ಟೈಂ ತನ್ನ ತಂಡದ ಜತೆ ಕಂಡು ಶಮಿತಾಳ ಮೇಲೆ ಆತನ ಕಣ್ಣು ಬಿದ್ದಿದೆ ಎಂದು ಸುದ್ದಿ. ಹೇಳಿ ಕೇಳಿ ವಾರ್ನ್ 'ರಸಿಕ' ಬೇರೆ.

ಕೆಲವು ಮೂಲಗಳ ಪ್ರಕಾರ, ಶಮಿತಾ ಹಾಗೂ ಶೇನ್ ವಾರ್ನ್ ಜತೆಯಾಗಿ ನೈಟ್ ಕ್ಲಬ್ಬಿನಲ್ಲಿ ಇರುವುದನ್ನು ಮಾಧ್ಯಮದವರು ಕಂಡಿದ್ದರು. ಮಾಧ್ಯಮದ ಮಂದಿ ಈ ಹೊಸ ಜೋಡಿಗಳ ಫೋಟೋ ತೆಗೆಯಲು ಪ್ರಯತ್ನಿಸಿದಾಗ ಶಮಿತಾ ಕ್ಲಬ್ಬಿನ ಹಿಂಬಾಗಿಲಿನಿಂದ ಹೊರಟು ಹೋಗಿದ್ದಾಳೆ. ಈ ವಿಷಯದ ಬಗ್ಗೆ ಶಮಿತಾರನ್ನೇ ಕೇಳಿದರೆ, ''ಅದು ಕೇವಲ ತಂಡದ ಗೆಲುವಿನ ಸಲುವಾಗಿ ನಡೆಸಿದ ಪಾರ್ಟಿ. ಅಲ್ಲಿ ಕೇವಲ ನಾನು ವಾರ್ನ್ ಮಾತ್ರ ಇರಲಿಲ್ಲ, ಇಡೀ ರಾಜಸ್ತಾನ್ ರಾಯಲ್ಸ್ ತಂಡದ ಆಟಗಾರರಿದ್ದರು. ನಾನೇನೂ ಪ್ರತ್ಯೇಕವಾಗಿ ವಾರ್ನ್ ಜೊತೆ ಬಂದಿಲ್ಲ ಎಂದು ಶಮಿತಾ ಉತ್ತರ ನೀಡಿದ್ದಾರೆ.

(ದಟ್ಸ್ ಕನ್ನಡ ಚಿತ್ರವಾರ್ತೆ)

More from Filmibeat