Juhi Chawla Birthday: ಜುಹಿ ಚಾವ್ಲಾ ಒಟ್ಟು ಆಸ್ತಿ ಮೌಲ್ಯ ಎಷ್ಟು? ಐಷಾರಾಮಿ ಕಾರುಗಳು, ಬಂಗಲೆ ಏನು ಆ ವೈಭೋಗ!

ಜೂಹಿ ಚಾವ್ಲಾ ಆಸ್ತಿ ಮೌಲ್ಯ 45 ಕೋಟಿ

1967ರಲ್ಲಿ ಹರಿಯಾಣದ ಅಂಬಲದಲ್ಲಿ ಹುಟ್ಟಿ ಬೆಳೆದ ಜೂಹಿ ಓದಿದ್ದು ಮುಂಬೈನಲ್ಲಿ. ತಂದೆ ಆದಾಯ ಇಲಾಖೆಯಲ್ಲಿ ಸೇವೆ ಸಲ್ಲಿಸಿದ್ದರು. 1984ರಲ್ಲಿ ಮಿಸ್ ಇಂಡಿಯಾ ಪಟ್ಟ ಅಲಂಕರಿಸಿದ ಚೆಲುವೆ ಚಿತ್ರರಂಗಕ್ಕೆ ಬರುವುದು ಕಷ್ಟ ಆಗಲಿಲ್ಲ. ಹಲವು ಸೂಪರ್ ಹಿಟ್ ಸಿನಿಮಾಗಳಲ್ಲಿ ನಟಿಸಿದ ಚೆಲುವೆ ಬಳಿ 40ರಿಂದ 50 ಕೋಟಿ ಸಂಪತ್ತು ಇದೆ ಎನ್ನಲಾಗುತ್ತಿದೆ. ಕನ್ನಡದಲ್ಲಿ 'ಪ್ರೇಮಲೋಕ' ಸಕ್ಸಸ್ ಆಗುತ್ತಿದ್ದಂತೆ ಅತ್ತ ಬಾಲಿವುಡ್‌ನಲ್ಲಿ 'ಕಯಾಮತ್‌ ಸೇ ಕಯಾಮತ್ ತಕ್' ಸಿನಿಮಾ ಕೂಡ ಗೆದ್ದಿತ್ತು. ಅಲ್ಲಿಂದ ಮುಂದೆ ಆಕೆ ತಿರುಗಿ ನೋಡಲೇಯಿಲ್ಲ.

ಐಷಾರಾಮಿ ಬಂಗಲೆ, ಕಾರುಗಳು

ಜೂಹಿ ಚಾವ್ಲಾ ಸಿನಿಮಾಗಳಲ್ಲಿ ನಟಿಸಿದ್ದು ಮಾತ್ರವಲ್ಲ ಕೆಲ ವರ್ಷಗಳ ಕಾಲ ಕೆಕೆಆರ್ ಕ್ರಿಕೆಟ್ ತಂಡದ ಮಾಲೀಕರು ಆಗಿದ್ದರು. ಶಾರೂಕ್ ಖಾನ್ ಹಾಗೂ ಜೂಹಿ ಜಂಟಿಯಾಗಿ ತಂಡದ ಜವಾಬ್ದಾರಿ ವಹಿಸಿಕೊಂಡಿದ್ದರು. ಸಿನಿಮಾಗಳ ಜೊತೆಗೆ ಜಾಹೀರಾತು, ವ್ಯಾಪಾರ ವ್ಯವಹಾರದಿಂದಲೂ ಭರ್ಜರಿ ವರಮಾನ ಸಂಪಾದಿಸುತ್ತಿದ್ದಾರೆ. ನಿಂಬೆ ಹಣ್ಣಿನಂತ ಹುಡುಗಿ ಬಳಿ ಜಾಗ್ವಾರ್ ಎಕ್ಸ್‌ಎಲ್‌ಜೆ(1.11 ಕೋಟಿ ರೂ.), ಆಡಿ ಕ್ಯೂ(77 ಲಕ್ಷ) ಸೇರಿದಂತೆ ಹಲವು ಕಾರುಗಳಿವೆ. ಪತಿ ಜೈ ಮೆಹ್ತಾ 250 ಕೋಟಿ ರೂ. ಒಡೆಯ. ಹಾಗಾಗಿ ದಂಪತಿಯ ಅಂದಾಜು ಆಸ್ತಿ ಮೌಲ್ಯ 300 ಕೋಟಿ ರೂ.ಗೂ ಅಧಿಕ ಎನ್ನಲಾಗುತ್ತಿದೆ.

ಸೂಪರ್ ಹಿಟ್ ಸಿನಿಮಾಗಳಲ್ಲಿ ನಟನೆ

'ಧರ್', 'ಹಮ್ ಹೈನ್ ರಹಿ ಪ್ಯಾರ್ ಕೆ', 'ದೀವಾನ ಮಸ್ತಾನ', 'ಇಷ್ಕ್', 'ಗುಲಾಬ್ ಗ್ಯಾಂಗ್' ಸೇರಿದಂತೆ ಸಾಕಷ್ಟು ಸಿನಿಮಾಗಳಲ್ಲಿ ನಟಿಸಿದ್ದಾರೆ. 'ಭೂತ್‌ನಾತ್' ಚಿತ್ರದಲ್ಲಿ ಆಕೆಯ ನಟನೆಗೆ ಭಾರಿ ಮೆಚ್ಚುಗೆ ವ್ಯಕ್ತವಾಗಿತ್ತು. ನಟಿಯಾಗಿ ಮಾತ್ರವಲ್ಲದೇ ನಿರ್ಮಾಪಕಿಯಾಗಿ 'ಫಿರ್ ಭಿ ದಿಲ್ ಹೈ ಹಿಂದೂಸ್ತಾನಿ', 'ಅಶೋಕ', 'ಚಲ್ತೆ ಚಲ್ತೆ' ಸಿನಿಮಾಗಳನ್ನು ನಿರ್ಮಿಸಿದ್ದಾರೆ. ಇನ್ನು ಕಿರುತೆರೆಯ ಕಾರ್ಯಕ್ರಮಗಳಲ್ಲೂ ಜೂಹಿ ಮಿಂಚಿದ್ದಾರೆ.

ಜೂಹಿ ಬಗ್ಗೆ ಸ್ವಾರಸ್ಯಕರ ಸಂಗತಿಗಳು

ಚಿತ್ರರಂಗದಲ್ಲಿ ಯಾರೋ ಮಾಡಬೇಕಿದ್ದ ಪಾತ್ರ ಮತ್ಯಾರ ಪಾಲು ಆಗುವುದು ಹೊಸದೇನು ಅಲ್ಲ. ಜೂಹಿ ಚಾವ್ಲಾ ಕೂಡ ಸಾಕ್ಷಷ್ಟು ಒಳ್ಳೆ ಅವಕಾಶಗಳನ್ನು ಕಳೆದುಕೊಂಡಿದ್ದರು. 'ಕಯಾಮತ್‌ ಸೇ ಕಯಾಮತ್ ತಕ್' ಚಿತ್ರಕ್ಕೆ ಆಯ್ಕೆಯಾದ ಸಮಯದಲ್ಲೇ ಕಿರುತೆರೆಯ 'ಮಹಾಭಾರತ್' ಧಾರಾವಾಹಿಯಲ್ಲಿ ನಟಿಸುವ ಅವಕಾಶವೂ ಸಿಕ್ಕಿತ್ತು.ಆದರೆ ಆಕೆ ಸಿನಿಮಾ ಆಯ್ಕೆ ಮಾಡಿಕೊಂಡಿದ್ದರು. 'ರಾಜಾ ಹಿಂದೂಸ್ತಾನಿ' ಚಿತ್ರದಲ್ಲೂ ಈಕೆ ನಟಿಸಬೇಕಿತ್ತು. ಆದರೆ ಕರೀಷ್ಮಾ ಕಪೂರ್ ನಟಿಸುವಂತಾಯಿತು. ಜಾಜೀವ್ ಕಪೂರ್ ಜೊತೆ ನಟಿಸಿದ 'ಮೊಹಬತ್ ಮೊಹಬತ್' ಸಿನಿಮಾ ಬಿಡುಗಡೆ ಆಗಲೇಯಿಲ್ಲ.