ಕಾಲಿಗೆ ಕಚಗುಳಿ ಕೊಟ್ಟ ದಕ್ಷಿಣದ ಖ್ಯಾತ ನಟನ ಕಪಾಳಕ್ಕೆ ಹೊಡೆದ ರಾಧಿಕಾ!

ಚಿತ್ರೀಕರಣದ ಮೊದಲ ದಿನ ಆಗಿದ್ದೇನು.?

''ಅಂದು ದಕ್ಷಿಣ ಭಾರತ ಚಿತ್ರವೊಂದರ ಚಿತ್ರೀಕರಣದಲ್ಲಿ ನನ್ನ ಮೊದಲ ದಿನ. ಅಲ್ಲಿ ನನಗೆ ಯಾರೂ ಪರಿಚಯ ಇರಲಿಲ್ಲ. ದಕ್ಷಿಣದ ಪ್ರಖ್ಯಾತ ನಟರೊಬ್ಬರು, ನನ್ನ ಕಾಲಿಗೆ ಕಚಗುಳಿ ಇಡಲು ಶುರು ಮಾಡಿದರು. ನನಗೆ ಶಾಕ್ ಆಯ್ತು. ನಾನು ಅವರನ್ನ ಈ ಹಿಂದೆ ಭೇಟಿ ಆಗಿರಲಿಲ್ಲ. ಅವರು ತೋರಿದ ವರ್ತನೆಯಿಂದಾಗಿ ನಾನು ಅವರ ಕಪಾಳಕ್ಕೆ ಹೊಡೆದೆ'' ಎಂದು ರಾಧಿಕಾ ಆಪ್ಟೆ ಖಾಸಗಿ ವಾಹಿನಿಯ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.

ಯಾರು 'ಆ' ನಟ.?

''ದಕ್ಷಿಣದ ಪ್ರಖ್ಯಾತ ನಟ ನನ್ನೊಂದಿಗೆ ಅಸಭ್ಯವಾಗಿ ವರ್ತಿಸಿದರು. ನಾನು ಅವರ ಕಪಾಳಕ್ಕೆ ಹೊಡೆದೆ'' ಎಂದು ರಾಧಿಕಾ ಆಪ್ಟೆ ಹೇಳಿದ್ದಾರೆ ಹೊರತು, 'ಆ' ಪ್ರಖ್ಯಾತ ನಟ ಯಾರು ಎಂಬ ಗುಟ್ಟನ್ನ ರಾಧಿಕಾ ಆಪ್ಟೆ ಬಿಟ್ಟುಕೊಟ್ಟಿಲ್ಲ.

ಪದೇ ಪದೇ ಫೋನ್ ಮಾಡುತ್ತಿದ್ದರು.!

''ನಾನು ತಂಗಿದ್ದ ರೂಮ್ ಗೆ ದಕ್ಷಿಣದ ಪ್ರಖ್ಯಾತ ನಟ ಪದೇ ಪದೇ ಫೋನ್ ಮಾಡುತ್ತಿದ್ದ. ತುಂಬಾ ಹತ್ತಿರವಾಗಲು ಪ್ರಯತ್ನಿಸಿದ. ಅವರೊಂದಿಗೆ ನಾನು ಒರಟಾಗಿ ನಡೆದುಕೊಂಡಿದ್ದೆ'' ಎಂದು ಕೆಲವು ದಿನಗಳ ಹಿಂದೆ ರಾಧಿಕಾ ಆಪ್ಟೆ ಬಾಯ್ಬಿಟ್ಟಿದ್ದರು. ಅಂದು ಕೂಡ 'ಆ' ನಟ ಯಾರು ಅಂತ ರಾಧಿಕಾ ಬಾಯಿ ಬಿಟ್ಟಿರಲಿಲ್ಲ.

ದಕ್ಷಿಣದಲ್ಲಿ ರಾಧಿಕಾ ಆಪ್ಟೆ ನಟಿಸಿರುವ ಸಿನಿಮಾಗಳು ಯಾವುವು.?

ತೆಲುಗಿನಲ್ಲಿ 'ರಕ್ತ ಚರಿತ್ರ', 'ಲೆಜೆಂಡ್', 'ಧೋನಿ', ತಮಿಳಿನಲ್ಲಿ 'ಧೋನಿ', 'ಆಲ್ ಇನ್ ಆಲ್ ಅಳಗು ರಾಜಾ', 'ವೇಟ್ರಿ ಸೆಲ್ವನ್' ಹಾಗೂ 'ಕಬಾಲಿ' ಸಿನಿಮಾಗಳಲ್ಲಿ ರಾಧಿಕಾ ಆಪ್ಟೆ ನಟಿಸಿದ್ದಾರೆ. ಈ ಸಿನಿಮಾಗಳಲ್ಲಿ ಅಭಿನಯಿಸಿರುವ ಸ್ಟಾರ್ ನಟರ ಪೈಕಿ ರಾಧಿಕಾ ಆಪ್ಟೆ ಜೊತೆಗೆ ಅಸಭ್ಯವಾಗಿ ವರ್ತಿಸಿದವರು ಯಾರು ಎಂಬುದೇ ಸದ್ಯದ ಕುತೂಹಲ.