'ಬೇಷರಂ ರಂಗ್' ವಿವಾದದ ಬೆನ್ನಲ್ಲೇ 'ಪಠಾಣ್' ಹೊಸ ಸಾಂಗ್ ರಿಲೀಸ್: ಶಾರುಕ್- ಡಿಪ್ಪಿ ಡ್ಯಾನ್ಸ್‌ಗೆ ಫ್ಯಾನ್ಸ್ ಫಿದಾ

'ಜೋಮೆ ಜೊ ಪಠಾಣ್' ಸಾಂಗ್

ಮೆಲೋಡಿ ಟ್ರ್ಯಾಕ್ 'ಜೋಮೆ ಜೊ ಪಠಾಣ್' ರಿಲೀಸ್ ಆಗಿ ಸದ್ದು ಮಾಡುತ್ತಿದೆ. ವಿಶಾಲ್ ಹಾಗೂ ಶೇಖರ್ ಟ್ಯೂನ್, ಕುಮಾರ್ ಲಿರಿಕ್ಸ್, ಅರ್ಜಿತ್ ಸಿಂಗ್ ವಾಯ್ಸ್‌ಗೆ ಬಾಲಿವುಡ್ ಪ್ರೇಕ್ಷಕರು ಫಿದಾ ಆಗಿದ್ದಾರೆ. ಕಿಂಗ್ ಖಾನ್ ಅಭಿಮಾನಿಗಳಂತೂ ರಿಪೀಟ್ ಮೋಡ್‌ನಲ್ಲಿ ಪದೇ ಪದೇ ಸಾಂಗ್ ನೋಡಿ ಎಂಜಾಯ್ ಮಾಡುತ್ತಿದ್ದಾರೆ. ಲೈಕ್ಸ್, ಕಾಮೆಂಟ್ ಮೂಲಕ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

ಶಾರುಕ್- ದೀಪಿಕಾ ಡ್ಯಾನ್ಸ್ ಸೂಪರ್

ಕಿಂಗ್ ಖಾನ್ ಶಾರುಕ್ ಹಾಗೂ ದೀಪಿಕಾ 4ನೇ ಬಾರಿಗೆ 'ಪಠಾಣ್' ಚಿತ್ರದಲ್ಲಿ ಒಟ್ಟಿಗೆ ನಟಿಸುತ್ತಿದ್ದಾರೆ. 'ಓಂ ಶಾಂತಿ ಓಂ', 'ಚೆನ್ನೈ ಎಕ್ಸ್‌ಪ್ರೆಸ್' ಹಾಗೂ 'ಹ್ಯಾಪಿ ನ್ಯೂ ಇಯರ್' ಈ ಜೋಡಿ ಕೆಮೆಸ್ಟ್ರಿ ಪ್ರೇಕ್ಷಕರಿಗೆ ಇಷ್ಟವಾಗಿತ್ತು. ಸದ್ಯ ರಿಲೀಸ್ ಆಗಿರುವ 'ಜೋಮೆ ಜೊ ಪಠಾಣ್' ಸಾಂಗ್‌ನಲ್ಲಿ ಮತ್ತೊಮ್ಮೆ ಈ ಜೋಡಿ ನೋಡಿ ಅಭಿಮಾನಿಗಳು ಖುಷಿಯಾಗಿದ್ದಾರೆ. ಮೆಲೋಡಿ ಟ್ಯೂನ್‌ಗೆ ಡಿಪ್ಪಿ ಡ್ಯಾನ್ಸ್ ಸಖತ್ತಾಗಿದೆ. ಇನ್ನು ಶಾರುಕ್ ಲುಕ್ ಹಾಗೂ ಎಕ್ಸ್‌ಪ್ರೆಷನ್ ನೋಡಿ ಫಿದಾ ಆಗಿದ್ದಾರೆ. ಅದ್ಭುತ ಲೊಕೇಶನ್‌ಗಳಲ್ಲಿ ಸಿಕ್ಕಾಪಟ್ಟೆ ಕಲರ್‌ಫುಲ್ ಆಗಿ ಸಾಂಗ್ ಶೂಟ್ ಮಾಡಿದ್ದಾರೆ.

ವಿವಾದ ಸೃಷ್ಟಿಸಿದ 'ಬೇಷರಂ ರಂಗ್'

ಹೌದು ಕೆಲ ದಿನಗಳ ಹಿಂದೆ ಬಿಡುಗಡೆಯಾದ 'ಬೇಷರಂ ರಂಗ್' ಸಾಂಗ್‌ನಲ್ಲಿ ದೀಪಿಕಾ ಸಿಕ್ಕಾಪಟ್ಟೆ ಬೋಲ್ಡ್ ಆಗಿ ಕಾಣಿಸಿಕೊಂಡಿದ್ದರು. ಅದರಲ್ಲೂ ಆಕೆ ಕೇಸರಿ ಬಣ್ಣದ ಬಿಕಿನಿ ತೊಟ್ಟು ಕುಣಿದಿದ್ದು ಕೆಲವರ ಆಕ್ರೋಶಕ್ಕೆ ಕಾರಣವಾಗಿತ್ತು. ಕೇಸರಿ ಬಣ್ಣಕ್ಕೆ ಅವಮಾನ ಮಾಡಿದ್ದಾರೆ ಎಂದು ಗರಂ ಆಗಿದ್ದರು. ಇದೇ ಕಾರಣಕ್ಕೆ ದೀಪಿಕಾರನ್ನು ಸಿಕ್ಕಾಪಟ್ಟೆ ಟ್ರೋಲ್ ಮಾಡಲಾಗ್ತಿದೆ. ಈ ವಿವಾದ ದಿನದಿಂದ ದಿನಕ್ಕೆ ತಾರಕಕ್ಕೇರುತ್ತಿದ್ದು, ಚಿತ್ರಕ್ಕೆ ಬಾಯ್ಕಾಟ್ ಭೀತಿ ಎದುರಾಗಿದೆ.

ಕುತೂಹಲ ಕೆರಳಿಸಿದ 'ಪಠಾಣ್'

ಆಕ್ಷನ್ ಎಂಟರ್‌ಟೈನರ್ 'ಪಠಾಣ್' ಭಾರೀ ನಿರೀಕ್ಷೆ ಮೂಡಿಸಿದೆ. ಸತತ ಸೋಲುಗಳಿಂದ ಕಂಗೆಟ್ಟಿರುವ ಬಾಲಿವುಡ್‌ಗೆ ಈ ಸಿನಿಮಾ ಗೆಲುವಿನ ಸಿಹಿ ತಂದುಕೊಡುವ ನಿರೀಕ್ಷೆ ಇದೆ. 4 ವರ್ಷಗಳ ಹಿಂದೆ ಶಾರುಕ್ ನಟನೆಯ 'ಜೀರೊ' ಸಿನಿಮಾ ಅಟ್ಟರ್ ಫ್ಲಾಪ್ ಆಗಿತ್ತು. ಆ ಸೋಲಿನ ಕಹಿ ಮರೆಸಲು ಇದೀಗ 'ಪಠಾಣ್' ಆಗಿ ಬರುತ್ತಿದ್ದಾರೆ. ಜನವರಿ 25ಕ್ಕೆ ವಿಶ್ವದಾದ್ಯಂತ ದೊಡ್ಡಮಟ್ಟದಲ್ಲಿ ಸಿನಿಮಾ ತೆರೆಗೆ ಬರಲಿದೆ.