"ನಮ್ಮತ್ರ ಎರಡ್ಮೂರು ರೀಮೆಕ್ ರೈಟ್ಸ್ ಇದೆ, ಆದ್ರೆ ಈಗ..": ದರ್ಶನ್

'ಕ್ರಾಂತಿ' ರೀಮೆಕ್ ಸಿನಿಮಾನಾ?

'ಕ್ರಾಂತಿ' ರೀಮೆಕಾ ಎನ್ನುವ ಪ್ರಶ್ನೆಗೆ ದರ್ಶನ್, "101% ಇದು ರೀಮೆಕ್ ಸಿನಿಮಾ ಅಲ್ಲ, ರೀಮೆಕ್ ಮಾಡೋದು ಬಿಟ್ಟು ಸುಮಾರು ವರ್ಷಗಳಾಯಿತು. ಈಗಲೂ ನಮ್ಮತ್ರ ಎರಡ್ಮೂರು ರೀಮೆಕ್ ರೈಟ್ಸ್ ಇದೆ. ಮಾಡೋಣ ಸರ್ ಅಂತಾರೆ. ನಾನು ಹೇಳ್ದೆ ಇಷ್ಟೊಂದು ಚಾನಲ್ ಇದೆ. ಎಲ್ಲದರಲ್ಲೂ ಡಬ್ ಮಾಡಿ ಬಿಟ್ಟಿರುತ್ತಾರೆ. ರೀಮೆಕ್ ಮಾಡುವುದು ವೇಸ್ಟ್ ಈಗ. 'ಕ್ರಾಂತಿ' ಹಚ್ಚ ಕನ್ನಡದ ಸಿನಿಮಾ. ನಮ್ಮ ಸ್ವಂತಿಕೆ ಇರುವಂತಹ ಸಿನಿಮಾ" ಎಂದಿದ್ದಾರೆ.

'ವೇದಾಳಂ' ರೀಮೆಕ್ ರೈಟ್ಸ್?

4 ವರ್ಷಗಳ ಹಿಂದೆ ದರ್ಶನ್ ತಮಿಳಿನ 'ವೇದಾಳಂ' ಸಿನಿಮಾ ರೀಮೆಕ್‌ನಲ್ಲಿ ನಟಿಸ್ತಾರೆ ಎನ್ನಲಾಗಿತ್ತು. ಚಿತ್ರದಲ್ಲಿ ಅಮೂಲ್ಯ ದರ್ಶನ್ ಸಹೋದರಿಯ ಪಾತ್ರ ಎನ್ನುವ ಮಾತುಗಳು ಕೇಳಿಬಂದಿತ್ತು. ಆದರೆ ನಂತರ ಆ ಸಿನಿಮಾ ಸೆಟ್ಟೇರಲೇ ಇಲ್ಲ. ಇನ್ನೆರಡು ರೀಮೆಕ್ ರೈಟ್ಸ್ ಯಾವುದು ಎನ್ನುವ ಚರ್ಚೆ ನಡೀತಿದೆ. ಒಟ್ನಲ್ಲಿ ಚಿತ್ರರಂಗದಲ್ಲೀಗ ರೀಮೆಕ್ ಟ್ರೆಂಡ್ ನಿಂತು ಹೋಗಿದೆ. ಕಂಟೆಂಟ್ ಬೇಸ್ಡ್ ಸ್ವಮೇಕ್ ಸಿನಿಮಾಗಳನ್ನು ಮಾಡಬೇಕಿದೆ. ಒಂದ್ಕಾಲದಲ್ಲಿ ಸಾಕಷ್ಟು ರೀಮೆಕ್ ಸಿನಿಮಾಗಳಲ್ಲಿ ದರ್ಶನ್ ನಟಿಸುತ್ತಿದ್ದರು. ಈಗ ರೀಮೆಕ್ ಮಾಡುವುದಿಲ್ಲ ಎಂದು ಹೇಳಿದ್ದಾರೆ. ಈ ಮಾತು ಅಭಿಮಾನಿಗಳಿಗೂ ಖುಷಿ ತಂದಿದೆ.

ರೀಮೆಕ್ ಮಾಡಿ ಗೆದ್ದಿರುವ ದರ್ಶನ್

ದಶಕದ ಹಿಂದೆ ಒಂದಷ್ಟು ರೀಮೆಕ್ ಸಿನಿಮಾಗಳಲ್ಲಿ ದರ್ಶನ್ ನಟಿಸಿದ್ದರು. ಸೋತಾಗಲೆಲ್ಲಾ ರೀಮೆಕ್ ಸಿನಿಮಾ ಮಾಡಿ ಕಂಬ್ಯಾಕ್ ಮಾಡಿದ್ದು ಇದೆ. ತೆಲುಗಿನ 'ಡಾರ್ಲಿಂಗ್' ಚಿತ್ರವನ್ನು 'ಬುಲ್ ಬುಲ್' ಹೆಸರಿನಲ್ಲಿ ಕನ್ನಡಕ್ಕೆ ತಂದು ತಂಡ ಗೆದ್ದಿತ್ತು. ಅದಕ್ಕು ಮುನ್ನ ತೆಲುಗಿನ 'ಭದ್ರ' ಚಿತ್ರವನ್ನು 'ಗಜ' ಹೆಸರಿನಲ್ಲಿ ರೀಮೆಕ್ ಮಾಡಿದ್ದರು. ಇದೇ ಸಿನಿಮಾ ಬಾಕ್ಸಾಫೀಸ್ ಸುಲ್ತಾನ್ ಎನ್ನುವ ಬಿರುದು ತಂದುಕೊಟ್ಟಿತ್ತು. ಆದರೆ ನಂತರ ಒಂದಷ್ಟು ಸಿನಿಮಾಗಳು ಕೈ ಹಿಡಿಯಲಿಲ್ಲ.

'ಕ್ರಾಂತಿ' ಚಿತ್ರದ ಕಥೆಯೇನು?

ನಿರೂಪಕ ವಿನಾಯಕ್ ಜೋಶಿ, ನಮಗೆ ಗೊತ್ತಿರುವಂತೆ ಸಿನಿಮಾ ಕಥೆ ಏನು ಅಂದ್ರೆ, "ಒಬ್ಬ ಸ್ಮಾರ್ಟ್ ಆಗಿರುವ ಎನ್‌ಆರ್‌ಐ ಅವರ ಊರಿಗೆ ವಾಪಸ್ ಬರ್ತಾರೆ. ಒಂದು ಉದ್ದೇಶಕ್ಕೋಸ್ಕರ. ಆ ಉದ್ದೇಶ ಏನು? ಅದಕ್ಕಾಗಿ ಎಷ್ಟು ಹೋರಾಡುತ್ತಾರೆ, 'ಕ್ರಾಂತಿ' ಮಾಡ್ತಾನೆ ಎನ್ನುವುದೇ ಸಿನಿಮಾ ಕಥೆ ಎಂದಾಗ, 101% ಪರ್ಸೆಂಟ್ ನಿಜ ಎಂದು ದರ್ಶನ್ ಹೇಳಿದ್ದಾರೆ. ಮಾತು ಮುಂದುವರೆಸುವ ದರ್ಶನ್, ಯಾವುದೇ ಉದ್ದೇಶಕ್ಕಾಗಿ ಅವನು ಬರುವುದಿಲ್ಲ. ಅವನು ಓದಿದ ಸರ್ಕಾರಿ ಶಾಲೆ 100 ವರ್ಷ ಪೂರೈಸಿದ ಹಬ್ಬ ಇರುತ್ತದೆ. ಆ ಕಾರ್ಯಕ್ರಮಕ್ಕೆ ಬಂದಾಗ ಮುಂದೆ ಏನೆಲ್ಲಾ ನಡೆಯುತ್ತೆ? ಎನ್ನುವುದೇ ಸಿನಿಮಾ ಕಥೆ ಎಂದು ಹೇಳಿದ್ದಾರೆ.