ಬಹುಮುಖ್ಯ ಬದಲಾವಣೆ ಜೊತೆ ಬರ್ತಿದೆ 'ಬಿಗ್ ಬಾಸ್ ಕನ್ನಡ-7'

ಸೂಪರ್ ಟು ಕನ್ನಡಕ್ಕೆ ಶಿಫ್ಟ್

ಬಿಗ್ ಬಾಸ್ ಕನ್ನಡದ ನಾಲ್ಕು ಆವೃತ್ತಿಗಳು ಆರಂಭದಲ್ಲಿ ಕಲರ್ಸ್ ಕನ್ನಡದಲ್ಲಿ ಪ್ರಸಾರವಾಗಿತ್ತು. ಆಮೇಲೆ ಕಲರ್ ಸೂಪರ್ ವಾಹಿನಿ ಬಂದ ಕಾರಣ, ಆ ವಾಹಿನಿಯನ್ನ ಮೇಲಕ್ಕೆ ತರಬೇಕು ಎಂಬ ಉದ್ದೇಶದಿಂದ ಸೂಪರ್ ವಾಹಿನಿಗೆ ಬಿಗ್ ಬಾಸ್ ಅಂತ ದೊಡ್ಡ ಶೋವನ್ನ ಶಿಫ್ಟ್ ಮಾಡಿದ್ದರು. ಇದೀಗ, ಮತ್ತೆ ಕಲರ್ಸ್ ಕನ್ನಡಕ್ಕೆ ಬಿಗ್ ಬಾಸ್ ಶಿಫ್ಟ್ ಆಗಿದೆ.

No 1 ಸ್ಥಾನದ ಮೇಲೆ ಕಣ್ಣಿಟ್ಟ ಕಲರ್ಸ್ ಕನ್ನಡ

ಸುದೀರ್ಘವಾಗಿ ಮೊದಲ ಸ್ಥಾನದಲ್ಲಿದ್ದ ಕಲರ್ಸ್ ಕನ್ನಡ ಕಾಲಕ್ರಮೇಣ ಮೊದಲ ಸ್ಥಾನವನ್ನ ಇನ್ನೊಂದು ವಾಹಿನಿಗೆ ಬಿಟ್ಟುಕೊಟ್ಟಿತ್ತು. ಇದೀಗ, ಮತ್ತೆ ಆ ಪಟ್ಟ ವಾಪಸ್ ಪಡೆಯಲು ನಿರ್ಧರಿಸಿದ್ದು, ಅದಕ್ಕಾಗಿ ಬಿಗ್ ಬಾಸ್ ಮೊರೆ ಹೋಗಿದೆ. ಹಾಗಾಗಿ, ಕಲರ್ಸ್ ಕನ್ನಡ ವಾಹಿನಿಗೆ ಬಿಗ್ ಬಾಸ್ ವಾಪಸ್ ಆಗ್ತಿದೆ. ಇದು ಸಹಜವಾಗಿ ಕಿರುತೆರೆ ಲೋಕದಲ್ಲಿ ಬದಲಾವಣೆ ತರುವ ನಿರೀಕ್ಷೆ ಇದೆ.

ವಾರಾಂತ್ಯದಲ್ಲಿ ಕೈಹಿಡಿಯುತ್ತಿಲ್ಲ ರಿಯಾಲಿಟಿ ಶೋಗಳು

ಹಾಗ್ನೋಡಿದ್ರೆ, ಕಲರ್ಸ್ ಕನ್ನಡ ಹಾಗೂ ಕಲರ್ಸ್ ಸೂಪರ್ ವಾಹಿನಿಯಲ್ಲಿ ರಿಯಾಲಿಟಿ ಶೋಗಳು ಕೈಹಿಡಿಯುತ್ತಿಲ್ಲ. ಮಜಾ ಟಾಕೀಸ್ ಮತ್ತು ಮಜಾಭಾರತ, ಕನ್ನಡದ ಕೋಟ್ಯಧಿಪತಿ, ಕಾಮಿಡಿ ಕಂಪನಿ ಕಮಾಲ್ ಮಾಡುತ್ತಿಲ್ಲ. ಹಾಗಾಗಿ, ಬಿಗ್ ಬಾಸ್ ಶೋ ಮೂಲಕ ಮತ್ತೆ ಹಳೇ ಖದರ್ ಗೆ ಬರುವ ಹುಮ್ಮಸ್ಸಿನಲ್ಲಿರಬಹುದು.

ಬಿಗ್ ಬಾಸ್ ಯಾವಾಗ?

ತೆಲುಗು, ತಮಿಳಿನಲ್ಲಿ ಬಿಗ್ ಬಾಸ್ ಈಗಾಗಲೇ ಆರಂಭವಾಗಿದ್ದು, ಕನ್ನಡದಲ್ಲಿ ಯಾವಾಗ ಎಂಬ ಕುತೂಹಲ ಕಾಡ್ತಿದೆ. ಸದ್ಯದವರೆಗೂ ಬಿಗ್ ಬಾಸ್ ಕುರಿತು ಯಾವುದೇ ಮಾಹಿತಿ ನೀಡಿಲ್ಲ ಆಯೋಜಕರು. ಇದೇ ಮೊದಲ ಸಲ ಏಳನೇ ಆವೃತ್ತಿ ಬಗ್ಗೆ ವಿಷಯ ಬಹಿರಂಗ ಮಾಡಿದ್ದು, ವಾಹಿನಿ ಬದಲಿಸಿದೆ ಎಂದಷ್ಟೇ ತಿಳಿಸಿದ್ದಾರೆ. ಬಹುಶಃ ಸೆಪ್ಟೆಂಬರ್ ಅಂತ್ಯಕ್ಕೆ ಅಥವಾ ಅಕ್ಟೋಬರ್ ಆರಂಭದಲ್ಲಿ ಬಿಗ್ ಬಾಸ್ ಆರಂಭವಾಗಬಹುದು.