ಓದುಗರಿಗೆ ಹೊಸ ಆಫರ್ ಕೊಟ್ಟ ನಟಿ ರಂಜಿನಿ ರಾಘವನ್

ನಟನೆಗೂ ಸೈ, ನಿರ್ದೇಶನಕ್ಕೂ ಜೈ

ರಂಜಿನಿ ರಾಘವನ್ ಅವರು ಸಾಹಿತ್ಯ, ಕಲೆಯ ವಾತಾವರಣದಲ್ಲಿ ಹುಟ್ಟಿ ಬೆಳೆದವರು. ಕಲೆ ರಂಜನಿ ಅವರ ರಕ್ತದಲ್ಲೇ ಇದ್ದಿದ್ದರಿಂದ ನಟನೆಯಷ್ಟೇ ಅಲ್ಲದೇ, ಡ್ಯಾನ್ಸ್, ಸಾಹಿತ್ಯದಲ್ಲೂ ಸಾಧನೆ ಮಾಡಿದ್ದಾರೆ. ಬೆಂಗಳೂರಿನ ಶೇಷಾದ್ರಿಪುರಂ ಕಾಲೇಜಿನಿಂದ ಬಿಕಾಮ್ ಮುಗಿಸಿದ್ದಾರೆ. ನಾಗವೇಣಿ ಎಂಬ ಚಿಕ್ಕ ಪಾತ್ರದ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟವರು ರಂಜನಿ ರಾಘವನ್. ಆದಾದ ಬಳಿಕ 'ಆಕಾಶ ದೀಪ', 'ಪುಟ್ಟ ಗೌರಿ' ಧಾರಾವಾಹಿಗಳಲ್ಲಿ ನಟಿಸಿದರು. 'ಪುಟ್ಟ ಗೌರಿ' ಧಾರಾವಾಹಿ ಮೂಲಕ ಪ್ರೇಕ್ಷಕರಿಗೆ ಚಿರಪರಿಚಿತರಾದರು. 'ಪುಟ್ಟಗೌರಿ' ಧಾರಾವಾಹಿಯ ಬಳಿಕ ರಂಜನಿ ರಾಘವನ್ ಅವರು ಸುಮ್ಮನೆ ಕೂರದೇ, ಕ್ರಿಯೇಟಿವ್ ಆಗಿ ಕಥೆ ಬರೆದರು. 'ಇಷ್ಟ ದೇವತೆ' ಧಾರಾವಾಹಿಗೆ ಕಥೆ ಬರೆದು ನಿರ್ದೇಶನ ಸಹ ಮಾಡಿದರು.

ಅಚ್ಚ ಕನ್ನಡದ ಹುಡುಗಿ

ಬಳಿಕ ಸಿನಿಮಾಗಳಲ್ಲಿ ಅವಕಾಶ ಸಿಕ್ಕಿತು. 'ರಾಜಹಂಸ' ಚಿತ್ರದಲ್ಲಿ ನಾಯಕಿಯಾಗಿ ಹಾಗೂ 'ಸೂಫಿ' ಸಿನಿಮಾದಲ್ಲೂ ನಟಿಸಿದ್ದಾರೆ. ದಿಗಂತ್ ಜೊತೆ ನಟಿಸಿರುವ 'ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ' ಹಾಗೂ 'ಟಕ್ಕರ್' ಸಿನಿಮಾಗಳು ಅಮೇಜಾನ್ ಪ್ರೈಮ್‌ನಲ್ಲಿವೆ. ಒಳ್ಳೆಯ ಪಾತ್ರಗಳನ್ನು ಎದುರು ನೋಡುವ ರಂಜಿನಿ ರಾಘವನ್ ಅವರು, ಈಗ 'ಕನ್ನಡತಿ' ಎಂಬ ಧಾರಾವಾಹಿಯಲ್ಲಿ ಅಚ್ಚ ಕನ್ನಡದ ಹುಡುಗಿಯಾಗಿ ಮಿಂಚುತ್ತಿದ್ದಾರೆ. ಆಗಾಗ ಕತೆ, ಸಣ್ಣ-ಪುಟ್ಟ ಕವನಗಳನ್ನು ಬರೆಯುತ್ತಿರುತ್ತಾರೆ. ಕನ್ನಡ ಭಾಷೆಗೆ ತಮ್ಮ ಕೈಲಾಗುವ ಕೊಡುಗೆ ನೀಡಲು ರಂಜನಿ ರಾಘವನ್ ಅವರು ಪ್ರಯತ್ನಿಸುತ್ತಲೇ ಬಂದಿದ್ದಾರೆ.

ಬರಹಗಾರ್ತಿ ರಂಜಿನಿ ರಾಘವನ್

ಸಿನಿಮಾ, ಧಾರಾವಾಹಿ ಅಂತ ಬ್ಯುಸಿ ಇರುವ ಇವರು, ಬಿಡುವು ಸಿಕ್ಕಾಗಲೆಲ್ಲಾ ಸಾಹಿತಿ ಆಗಿ ಬಿಡುತ್ತಾರೆ. 'ಕಥೆ ಡಬ್ಬಿ' ಎಂಬ ಪುಟ್ಟ ಪುಟ್ಟ ಕಥೆಗಳಿರುವ ಪುಸ್ತಕ ಬರೆದು ಫೇಮಸ್ ಆಗಿದ್ದಾರೆ. ನಟನೆಯ ಜೊತೆಗೆ ಬರಹಗಾರ್ತಿಯೂ ಆಗಿದ್ದು, ಸಿಕ್ಕಾಪಟ್ಟೆ ಬ್ಯುಸಿ ಹುಡುಗಿ ರಂಜನಿ ರಾಘವನ್. ಹಾಗಿದ್ದರೂ ಬಿಡುವು ಮಾಡಿಕೊಂಡು ರೀಲ್ಸ್‌ಗಳನ್ನು ಮಾಡುತ್ತಿರುತ್ತಾರೆ. ಕಳೆದ ವರ್ಷ 'ಕತೆ ಡಬ್ಬಿ' ಎಂಬ ಪುಸ್ತಕವನ್ನು ಬರೆದು ಬಿಡುಗಡೆ ಮಾಡಿದ್ದರು. ಇದರಲ್ಲಿ ಮಾನವೀಯತೆಯ ಬಂಧಗಳ ಬಗ್ಗೆ ತಮ್ಮ ಸರಳ ಬರವಣಿಗೆ ಮೂಲಕ ಸೊಗಸಾಗಿ ತಿಳಿಸಿಕೊಟ್ಟಿದ್ದರು.

ಓದುಗರಿಗೆ ಹೊಸ ಆಫರ್

ಇದೀಗ ಓದುಗರಿಗೆ ಹೊಸ ಗಿಫ್ಟ್ ಕೊಟ್ಟಿದ್ದಾರೆ. ಅದೇ 'ಸ್ವೈಪ್ ರೈಟ್' ಪುಸ್ತಕ. ಹೊಸ ಹೆಸರಿನೊಂದಿಗೆ ಕಾದಂಬರಿಯನ್ನು ಓದುಗರಿಗೆ ಪರಿಚಯಿಸಿದ್ದಾರೆ. ಮೊನ್ನೆಯಷ್ಟೇ ಈ ಪುಸ್ತಕವನ್ನು ಬಿಡುಗಡೆ ಮಾಡಲಾಯ್ತು. ಅದಾಗಲೇ 3000 ಪ್ರತಿಗಳು ಮಾರಾಟ ಆಗಿವೆ. ಎರಡನೇ ಮುದ್ರಣಕ್ಕೂ ಸಜ್ಜಾಗಿದೆ. ಹೀಗಾಗಿ ಈಗ ರಂಜನಿ ರಾಘವನ್ ಅವರು ಓದುಗರಿಗೆ ಹೊಸ ಆಫರ್ ಅನ್ನು ಕೊಟ್ಟಿದ್ದಾರೆ. ಅದೇನೆಂದರೆ, ಡಿಸೆಂಬರ್ 20 ರೊಳಗೆ ಪುಸ್ತಕವನ್ನು ಖರೀದಿಸುವವರಿಗೆ 10% ಡಿಸ್ಕೌಂಟ್ ಅನ್ನು ಕೊಟ್ಟಿದ್ದಾರೆ.