'ಗಿಚ್ಚಿ ಗಿಲಿಗಿಲಿ' ಸೀಸನ್ 2ರ ನಿರೂಪಕರಾಗಿ ನಿರಂಜನ್ ದೇಶಪಾಂಡೆ

'ಮಿಲನ'ದ ಅಂಜನ್ ಆಗಿ ಮಿಂಚು

ಬರೋಬ್ಬರಿ ನಾಲ್ಕು ವರ್ಷಗಳ ಕಾಲ ಆರ್ ಜೆ ಆಗಿ ವೃತ್ತಿ ಜೀವನ ಮಾಡಿದ ನಿರಂಜನ್ ಅವರು ನಟನಾಗಿ ವೀಕ್ಷಕರನ್ನು ರಂಜಿಸಿದ ಪ್ರತಿಭೆ. ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ "ಮಿಲನ" ಧಾರಾವಾಹಿಯಲ್ಲಿ ಅಂಜನ್ ಪಾತ್ರಕ್ಕೆ ಜೀವ ತುಂಬುವ ಮೂಲಕ ನಟನಾಗಿಯೂ ಅವರು ಭಡ್ತಿ ಪಡೆದಿದ್ದರು. ಒಂದಷ್ಟು ಸಿನಿಮಾಗಳಲ್ಲಿ ನಿರಂಜನ್ ಸಣ್ಣ ಪುಟ್ಟ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಬಿಗ್‌ಬಾಸ್ ಶೋನಲ್ಲೂ ಭಾಗಿ

ಕನ್ನಡ ಕಿರುತೆರೆಯ ಜನಪ್ರಿಯ ರಿಯಾಲಿಟಿ ಶೋ 'ಬಿಗ್ ಬಾಸ್ ಸೀಸನ್' 4 ರ ಸ್ಪರ್ಧಿಯಾಗಿ ದೊಡ್ಮನೆಯೊಳಗೆ ಕಾಲಿಟ್ಟಿದ್ದ ನಿರಂಜನ್ ನಡವಳಿಕೆ, ಮಾತು ಜೊತೆಗೆ ಆಟದ ಮೂಲಕ ವೀಕ್ಷಕರಿಗೆ ಮಗದಷ್ಟು ಹತ್ತಿರವಾದರು. ಸುಮಾರು 50 ದಿನಕ್ಕಿಂತಲೂ ಹೆಚ್ಚು ಬಿಗ್ ಬಾಸ್ ಮನೆಯೊಳಗೆ ಇದ್ದ ನಿರಂಜನ್ ದೇಶಪಾಂಡೆ ಇದ್ದಷ್ಟು ದಿನ ವೀಕ್ಷಕರನ್ನು ರಂಜಿಸಿದ್ದರು.

ನಿರೂಪಕರಾಗಿಯೂ ಫೇಮಸ್ಸು!

'ಮಜಾಭಾರತ' ಕಾರ್ಯಕ್ರಮದ ನಿರೂಪಕರಾಗಿ ಕಿರುತೆರೆಯಲ್ಲಿ ಮಿಂಚಿದ ನಿರಂಜನ್ ದೇಶಪಾಂಡೆ ನಂತರ 'ತುತ್ತಾಮುತ್ತಾ' ಸೀಸನ್ 1 ಮತ್ತು 2, 'ಸವಾಲಿಗೆ ಸೈ', 'ಗಿಚ್ಚಿಗಿಲಿ ಶೋ'ಗಳ ನಿರೂಪಕರಾಗಿ ಸದ್ದು ಮಾಡಿದ್ದರು. ಈಗ 'ನನ್ನಮ್ಮ ಸೂಪರ್ ಸ್ಟಾರ್' ಸೀಸನ್ 2 ರ ನಿರೂಪಕರಾಗಿ ಕಿರುತೆರೆಯಲ್ಲಿ ಬ್ಯುಸಿಯಾಗಿರುವ ಇವರು ಸದ್ಯದಲ್ಲಿ 'ಗಿಚ್ಚಿ ಗಿಲಿಗಿಲಿ'- 2 ಶೋ ಮೂಲಕ ಮತ್ತೊಮ್ಮೆ ಕಿರುಪರದೆ ಮೇಲೆ ಕಮಾಲ್ ಮಾಡಲಿದ್ದಾರೆ.

ನಿರಂಜನೆ ನಟನೆಯ ಚಿತ್ರಗಳು

ರಂಗಭೂಮಿ ಕಲಾವಿದರಾಗಿ ಗುರುತಿಸಿಕೊಂಡಿರುವ ನಿರಂಜನ್ ದೇಶಪಾಂಡೆ ಚಂದ್ರಮೋಹನ್ ನಿರ್ದೇಶನದ "ಬೊಂಬೆ ಮಿಠಾಯಿ" ಸಿನಿಮಾದಲ್ಲಿ ನಾಯಕನಾಗಿ ತೆರೆ ಮೇಲೆ ಕಾಣಿಸಿಕೊಂಡಿದ್ದರು. ಮುಂದೆ 'ಪಾದರಸ', 'ನನ್ನ ಪ್ರಕಾರ', 'ಸಂಪ್ನೋಕಿ ರಾಣಿ', 'ಸವರ್ಣ ದೀರ್ಘ ಸಂಧಿ', 'ಪಾಪಿ ಚಿರಾಯು', 'ಆಮ್ಲೆಟ್' ಸಿನಿಮಾಗಳಲ್ಲಿ ನಿರಂಜನ್ ಬಣ್ಣ ಹಚ್ಚಿದ್ದಾರೆ.