ಕರೀನಾ ಕಪೂರ್ - ಸೈಫ್ ಮೊಬೈಲ್ ಪ್ರೇಮ

ಹೊಸ ಚಿತ್ರವೊಂದರ ತಯಾರಿಯಲ್ಲಿ ತೊಡಗಿರುವ ನಿರ್ದೇಶಕಿ ರೀಮಾ ಕಾಗ್ಟಿ ಶೂಟಿಂಗ್ ವೇಳೆ ಮೊಬೈಲ್ ಫೋನ್ ಬಳಕೆಯನ್ನು ಕಟ್ಟುನಿಟ್ಟಾಗಿ ನಿಷೇಧಿಸಿದ್ದಾರೆ. ತಮ್ಮ ಸಿನಿಮಾದ ಪ್ರಮೊ ಚಿತ್ರಗಳು ಹೊರಹೋಗಬಾರದೆಂದು ಖಾಸಗಿ ಕ್ಯಾಮೆರಾಗಳಿಗೂ ಅವರು ಅನುಮತಿ ನೀಡಿಲ್ಲ. ಖ್ಯಾತ ನಟ ಅಮೀರ್ ಖಾನ್ ಗೂ ಸೆಟ್ ಗಳಲ್ಲಿ ಮೊಬೈಲ್ ಬಳಸುವುದೆಂದರೆ ಅಲರ್ಜಿ. ಅದರಿಂದ ಕೆಲಸಕ್ಕೆ ಬಾಧಕವಾಗುತ್ತದೆ ಎಂಬುದು ಅವರ ಖಡಕ್ಕಾದ ಮೊಬೈಲ್ ಮಾತು. ದೊಡ್ಡವರೇ ಹೀಗಿರುವಾಗ ಸೆಟ್ ನಲ್ಲಿ ಬೇರೆ ಯಾರಿಗೂ ಮೊಬೈಲ್ ಬಳಸುವ ಧೈರ್ಯ ಬರುತ್ತಿಲ್ಲವಂತೆ. ಆದರೆ...

ಇಂತಹ ಸನ್ನಿವೇಶದಲ್ಲಿ ಈಯಮ್ಮ ಕರೀನಾ ಮಾತ್ರ ಯಾವುದೇ ಎಗ್ಗಿಲ್ಲದೆ ಸಮಯ ಸಾಧಿಸಿ ಮೊಬೈಲ್ ಕಚ್ಚತೊಡಗುತ್ತಾಳೆ. ಒಂದೋ, ಮೆಸೇಜ್ ಮಾಡುತ್ತಿರುತ್ತಾಳೆ. ಇಲ್ಲವೇ, ವಟಗುಟ್ಟುತ್ತಿರುತ್ತಾಳೆ. ಕರೀನಾಳ ಈ ಕಸರತ್ತೆಲ್ಲ ಪ್ರಿಯಕರ ಸೈಫ್ ಅಲಿ ಖಾನ್ ಗೆ ಎಂಬುದನ್ನು ಬಿಡಿಸಿ ಹೇಳಬೇಕಾಗಿಲ್ಲ, ಅಲ್ಲವೇ? ಪಾಪ, ಪ್ರೇಮಿಗಳ ಕಷ್ಟ ನಿಮಗೇನ್ರೀ ಗೊತ್ತು !?