ದುಬೈನಲ್ಲಿ 'ದಿ ಡರ್ಟಿ' ವಿದ್ಯಾ ಬಾಲನ್ ಊಲಾಲಾ ಊಲಾಲಾ!

ದಿ ಡರ್ಟಿ ಪಿಕ್ಚರ್ ಚಿತ್ರಪಟ

ಅದರಲ್ಲೂ, ಸಂಗೀತ ನಿರ್ದೇಶಕ, ಗಾಯಕ ಬಪ್ಪಿ ಲಹರಿ ಅವರ ವಿಶಿಷ್ಟ ಕಂಠ ಮತ್ತು ಶ್ರೇಯಾ ಘೋಷಾಲ್ ಅವರ ಮಾದಕ ಧ್ವನಿಯಲ್ಲಿ ಮೊಳಗುತ್ತಿರುವ 'ಊಲಾಲಾ ಊಲಾಲಾ ಊಲಾಲಾ ಊಲಾಲಾ' ಹಾಡು ಪಾಪ್ಯುಲಾರಿಟಿ ಚಾರ್ಟಲ್ಲಿ ಅಗ್ರಸ್ಥಾನ ಪಡೆದುಕೊಂಡಿದೆ. ನಾಸಿರುದ್ದಿನ್ ಷಾ ಅವರೊಂದಿಗೆ ವಿದ್ಯಾ ಬಾಲನ್ ಅವರ ಮಾದಕ ನರ್ತನ ಪಡ್ಡೆಗಳ ಎದೆಬಡಿತವನ್ನು ಸಿಕ್ಕಾಪಟ್ಟೆ ಹೆಚ್ಚಿಸಿದೆ.

ವಿದ್ಯಾ ಬಾಲನ್ ಡಿಸೆಂಬರ್ ತಿಂಗಳಲ್ಲಿ ದುಬೈನ ಚಿತ್ರರಸಿಕರ ಹೃದಯಕ್ಕೇ ನೇರವಾಗಿ ಲಗ್ಗೆ ಹಾಕಲಿದ್ದಾರೆ. ಮತ್ತು ಬರಿಸುವ ನಟಿ ವಿದ್ಯಾ, ಮಾಂತ್ರಿಕ ನಟ ನಾಸಿರುದ್ದಿನ್ ಮತ್ತು ಮತ್ತಿನ ರಾಜ ಇಮ್ರಾನ್ ಹಶ್ಮಿ ಸೇರಿದಂತೆ ಇಡೀ ಚಿತ್ರದ ತಂಡ ಅಂತಾರಾಷ್ಟ್ರೀಯ ಏಡ್ಸ್ ದಿನ, ಡಿ. 1ರಂದು ದುಬೈನಲ್ಲಿರುವ ರಾಮೀ ರಾಯಲ್ ಹೊಟೇಲ್ ನಲ್ಲಿರುವ ಇಟ್ಸ್ ಮಿರ್ಚಿ ನೈಟ್ ಕ್ಲಬ್ ಗೆ ಮಟಮಟ ಮಧ್ಯರಾತ್ರಿ ದಾಂಗುಡಿಯಿಡಲಿದ್ದಾರೆ.

ವಿದ್ಯಾ ಬಾಲನ್ ರನ್ನು ಭೇಟಿ ಮಾಡಿ ಅವರೊಂದಿಗೆ ಊಲಾಲಾ ಹಾಡಿಗೆ ಹೆಜ್ಜೆ ಹಾಕುವ ಅವಕಾಶ ದುಬೈ ಜನತೆಗೆ ಒಲಿದುಬಂದಿದೆ. ಚಿತ್ರ ಬಹುತೇಕ ಡಿ.29ರಂದು ಸಿಲ್ಕ್ ಸ್ಮಿತಾ ಅವರ ಹುಟ್ಟುಹಬ್ಬದಂದು ಇಡೀ ವಿಶ್ವದಾದ್ಯಂತ ಬಿಡುಗಡೆಯಾಗುವ ಸಾಧ್ಯತೆಯಿದೆ. ಆದರೆ, ಸಾಕಷ್ಟು ವಿವಾದಗಳನ್ನು ಎಬ್ಬಿಸಿರುವ ದಿ ಡರ್ಟಿ ಪಿಕ್ಚರ್ ಎಲ್ಲ ಕೋರ್ಟಿನ ಅಡೆತಡೆಗಳನ್ನು ದಾಟಿ, ಸೆನ್ಸಾರ್ ಮಂಡಳಿಯ ಸರ್ಟಿಫಿಕೇಟ್ ಪಡೆದು ಹೊರಬರಬೇಕಷ್ಟೆ.