ಬಾಲಿವುಡ್‌ ಸ್ಟಾರ್ ನಟನ ಪತ್ನಿ ವಿರುದ್ಧ ವಂಚನೆ ಪ್ರಕರಣ ದಾಖಲು

ಆಲಿಯಾ ನನಗೆ 2005ರಿಂದಲೂ ಪರಿಚಯ

ಮಾಧ್ಯಮಗಳೊಟ್ಟಿಗೆ ಮಾತನಾಡಿರುವ ಮಂಜು ಘರ್‌ವಾಲ್, ''ನಾನು ಹಾಗೂ ಆಲಿಯಾ 2005ರಿಂದಲೂ ಗೆಳೆಯರು. ಮೊದಲಿನಿಂದಲೂ ಆಲಿಯಾಗೆ ಸಿನಿಮಾ ನಿರ್ಮಾಣ ಮಾಡಬೇಕು ಎಂಬ ಕನಸಿತ್ತು. ಆರ್ಥಿಕವಾಗಿ ಸಾಧ್ಯವಾದಾಗ ಸಿನಿಮಾ ನಿರ್ಮಾಣ ಮಾಡುವ ಯೋಚನೆಯಲ್ಲಿ ಇಬ್ಬರೂ ಇದ್ದೆವು. ಸಿನಿಮಾ ನಿರ್ಮಾಣ ಮಾಡುವ ಸಮಯ ಬಂದಾಗ ನಾನು ಕ್ರಿಯೇಟಿವ್ ವಿಷಯದ ಮೇಲುಸ್ತುವಾರಿ ವಹಿಸಿಕೊಂಡೆ ಆಲಿಯಾ ಹಣಕಾಸಿನ ವಿಷಯದ ಮೇಲುಸ್ತುವಾರಿ ವಹಿಸಿಕೊಂಡರು'' ಎಂದು ಪ್ರಕರಣ ವಿವರಿಸಿದ್ದಾರೆ ಮಂಜು.

ಚೆಕ್‌ಗಳೆಲ್ಲ ಬೌನ್ಸ್ ಆಗಿವೆ: ಮಂಜು ಆರೋಪ

''ನಾನು 'ಹೋಲಿ ಕವ್' ಸಿನಿಮಾಕ್ಕೆ ಕಲಾವಿದರನ್ನು, ತಂತ್ರಜ್ಞರನ್ನು ಆರಿಸಿ ಅವರ ಡೇಟ್ಸ್ ಫೈನಲ್ ಮಾಡಿ ಅವರಿಗೆ ಚೆಕ್ ನೀಡಿದೆ. ಆದರೆ ಆಲಿಯಾ ನೀಡಿದ ಚೆಕ್‌ಗಳೆಲ್ಲವೂ ಒಂದೊಂದಾಗಿ ಬೌನ್ಸ್ ಆದವು. ಸಿನಿಮಾಕ್ಕೆ ಹಾಕಿದ ಬಂಡವಾಳದ ಜೊತೆಗೆ ನಾನು ನನ್ನ ಕೈಯಿಂದಲೂ ಹಣ ಹಾಕಿ ಕಲಾವಿದರಿಗೆ ಹಣ ನೀಡಿದೆ. ಆದರೆ ಆಲಿಯಾ ಬಳಿ ಹಣ ಕೇಳಿದಾಗ ಆಕೆ ಕೊಡುವುದಿಲ್ಲ ಎಂದರು'' ಎಂದಿದ್ದಾರೆ ಮಂಜು.

ತಂದೆಯಿಂದಲೂ 30 ಲಕ್ಷ ಪಡೆದಿದ್ದಾಳೆ: ಮಂಜು ಆರೋಪ

''ನನ್ನ ತಂದೆ ತಮ್ಮ ಉಜ್ಜೈನಿಯಲ್ಲಿನ ತಮ್ಮ ಮನೆ ಮಾರಿದರು. ಆ ವಿಷಯ ಆಲಿಯಾಗೆ ಗೊತ್ತಿತ್ತು, ನನ್ನ ತಂದೆಯನ್ನು ಒಪ್ಪಿಸಿ ಅವರಿಂದಲೂ 30 ಲಕ್ಷ ಹಣವನ್ನು ಆಲಿಯಾ ಪಡೆದಳು. ಆದರೆ ಈಗ ಆ ಹಣವನ್ನೂ ಆಕೆ ನೀಡುತ್ತಿಲ್ಲ. ಬಹಳ ಒತ್ತಾಯದ ಬಳಿಕ 22 ಲಕ್ಷ ಹಣ ವಾಪಸ್ ನೀಡಿದ್ದಾಳೆ. ಇನ್ನೂ 31 ಲಕ್ಷ ರುಪಾಯಿ ಹಣ ವಾಪಸ್ ಬರಬೇಕಿದೆ. ಅಲ್ಲದೆ 'ಹೋಲಿ ಕವ್' ಸಿನಿಮಾ ಇರುವ ಹಾರ್ಡ್‌ ಡಿಸ್ಕ್‌ ಅನ್ನು ಆಲಿಯಾಳೆ ಇಟ್ಟುಕೊಂಡಿದ್ದಾಳೆ'' ಎಂದಿದ್ದಾರೆ ಮಂಜು ಘರ್‌ವಾಲ್.

ಮುಂದಿನ ತಿಂಗಳು ಸಿನಿಮಾ ಬಿಡುಗಡೆ

''ನಾನು ಪೊಲೀಸರಿಗೆ ದೂರು ನೀಡುವ ಜೊತೆಗೆ ಪಶ್ಚಿಮ ಭಾರತ ಸಿನಿ ಕಾರ್ಮಿಕರ ಒಕ್ಕೂಟಕ್ಕೂ ದೂರು ನೀಡಿದ್ದೇನೆ. ಆದರೆ ಆಲಿಯಾ ಮೆಡಿಕಲ್ ದಾಖಲೆಯೊಂದನ್ನು ಪೊಲೀಸರಿಗೆ ಸಲ್ಲಿಸಿ ಉತ್ತರ ನೀಡಲು ಕಾಲಾವಕಾಶ ಕೇಳಿದ್ದಾಳೆ. 'ಹೋಲಿ ಕವ್' ಸಿನಿಮಾವು ಆಗಸ್ಟ್‌ನಲ್ಲಿ ಬಿಡುಗಡೆ ಆಗಲಿದ್ದು, ನಾನು ನನ್ನ ಹಣ ಪಡೆಯಲು ಹಾಗೂ ಸಿನಿಮಾದಲ್ಲಿ 'ಕ್ರಿಯೇಟಿವ್ ಮತ್ತು ಸಹ ನಿರ್ಮಾಪಕ' ಎಂದು ಕ್ರೆಡಿಟ್ ಪಡೆಯಲು ಹೋರಾಟಕ್ಕೆ ನಿಂತಿದ್ದೇನೆ'' ಎಂದಿದ್ದಾರೆ. 'ಹೋಲಿ ಕವ್' ಸಿನಿಮಾವನ್ನು ಸಾಯಿ ಕಬೀರ್ ನಿರ್ದೇಶನ ಮಾಡಿದ್ದಾರೆ. ಸಂಜಯ್ ಮಿಶ್ರಾ ಮತ್ತು ತಿಮಾಂಶು ಧುಲಿಯಾ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಆಲಿಯಾ ಸಿದ್ಧಿಕಿ ಹಾಗೂ ನವಾಜುದ್ದೀನ್ ಸಿದ್ದಿಕಿ ಒಟ್ಟಿಗಿಲ್ಲ. ನವಾಜುದ್ದೀನ್ ಸಿದ್ದಿಕಿ ವಿಚ್ಛೇಧನಕ್ಕಾಗಿ ಅರ್ಜಿ ಸಲ್ಲಿಸಿದ್ದಾರೆ ಆದರೆ ಆಲಿಯಾ ವಿಚ್ಛೇಧನಕ್ಕೆ ಒಪ್ಪಿಲ್ಲ, ಪ್ರಕರಣ ನ್ಯಾಯಾಲಯದಲ್ಲಿದೆ.