ಸುಶಾಂತ್ ಸಿಂಗ್-ಇರ್ಫಾನ್ ಖಾನ್ ಚಿತ್ರ ಬೇಡ ಎಂದು ಕೈಬಿಟ್ಟಿದ್ದರು ಕಂಗನಾ!

ಸುಶಾಂತ್-ಇರ್ಫಾನ್ ಖಾನ್ ಸಿನಿಮಾ!

ಡಿಎನ್‌ಎ ವೆಬ್‌ಸೈಟ್ ವರದಿ ಮಾಡಿದಂತೆ, 2016ರಲ್ಲಿ ಸುಶಾಂತ್ ಸಿಂಗ್ ರಜಪೂತ್ ಮತ್ತು ಇರ್ಫಾನ್ ಖಾನ್ ನಟಿಸಬೇಕಾದ ಚಿತ್ರವೊಂದರಲ್ಲಿ ನಟಿಸುವಂತೆ ಕಂಗನಾ ರಣಾವತ್‌ಗೆ ಆಫರ್ ಮಾಡಲಾಗಿತ್ತು. ಆದರೆ, ಈ ಚಿತ್ರವನ್ನು ಕಂಗನಾ ನಿರಾಕರಿಸಿದ್ದರು ಎಂಬ ವಿಚಾರ ಹೊರಬಿದ್ದಿದೆ.

ಈ ಸಿನಿಮಾ ಬೇಡ ಎನ್ನಲು ಕಾರಣವೇನು?

ಸುಶಾಂತ್-ಇರ್ಫಾನ್ ಸಿನಿಮಾ ಆಫರ್ ಬಂದಾಗ ಕಂಗನಾ ರಣಾವತ್ 'ರಂಗೊನ್' ಚಿತ್ರದಲ್ಲಿ ನಟಿಸುತ್ತಿದ್ದರು. ಹಾಗಾಗಿ, ಡೇಟ್ ಹೊಂದಾಣಿಕೆ ಆಗದ ಕಾರಣ ಈ ಪ್ರಾಜೆಕ್ಟ್ ಕೈಬಿಟ್ಟಿದ್ದರು ಎಂದು ವರದಿಯಾಗಿದೆ. ರಂಗೊನ್ ಚಿತ್ರದಲ್ಲಿ ಸೈಫ್ ಅಲಿ ಖಾನ್ ಮತ್ತು ಶಾಹೀದ್ ಕಪೂರ್ ನಟಿಸಿದ್ದರು.

ಕಥೆ ವಿವರಿಸಿದ್ದ ನಿರ್ದೇಶಕ

ಸುಶಾಂತ್-ಇರ್ಫಾನ್ ಹಾಗೂ ಕಂಗನಾ ಜೊತೆ ಸಿನಿಮಾ ಮಾಡಬೇಕೆಂದುಕೊಂಡಿದ್ದ ನಿರ್ದೇಶಕ ಹೋಮಿ ಅದಜಾನಿಯಾ ಕಥೆ ಸಹ ವಿವರಿಸಿದ್ದರು. ಈ ಬಗ್ಗೆ ಕಂಗನಾ ಆ ಸಮಯದಲ್ಲಿ ಪಿಟಿಐಗೆ ಪ್ರತಿಕ್ರಿಯಿಸಿ 'ಕಥೆ ಕೇಳಿ ಈ ಸಿನಿಮಾ ಮಾಡಲು ಉತ್ಸುಕನಾಗಿದ್ದೆ. ಆದರೆ, ರಂಗೊನ್ ಚಿತ್ರದ ನಂತರ ಹನ್ಸಲ್ ಮೆಹ್ತಾ ಅವರ ಚಿತ್ರಕ್ಕೆ ಡೇಟ್ ನೀಡಿದ್ದೇನೆ. ಹಾಗಾಗಿ, ಈ ಚಿತ್ರ ಮಾಡಲು ಸಾಧ್ಯವಾಗುತ್ತಿಲ್ಲ. ಆದರೆ, ಮುಂದಿನ ದಿನದಲ್ಲಿ ಖಂಡಿತ ಅವರೊಂದಿಗೆ ಕೆಲಸ ಮಾಡುತ್ತೇನೆ'' ಎಂದಿದ್ದರಂತೆ.

ಕೊನೆಗೆ ಆ ಸಿನಿಮಾ ಬರಲೇ ಇಲ್ಲ

ದುರಾದೃಷ್ಟವಶಾತ್ ಅಂದ್ರೆ ಸುಶಾಂತ್ ಸಿಂಗ್ ರಜಪೂತ್, ಇರ್ಫಾನ್ ಖಾನ್ ಮತ್ತು ಕಂಗನಾ ರಣಾವತ್ ಅವರನ್ನೊಳಗೊಂಡಂತೆ ಮೂಡಿಬರಬೇಕಿದ್ದ ಆ ಚಿತ್ರ ಕೊನೆಗೂ ತಯಾರಾಗಲೇ ಇಲ್ಲ. ಆ ಸ್ಕ್ರಿಪ್ಟ್ ಬಗ್ಗೆ ಚರ್ಚಿಸಿದ್ದ ಇಬ್ಬರು ನಟರು ಈಗ ಜೀವಂತವಾಗಿಲ್ಲ ಎನ್ನುವುದು ಊಹಿಸಿದರೆ ನಿಜಕ್ಕೂ ಬೇಸರವಾಗುತ್ತೆ.