ರಂಜಾನ್‌ ಸಂಪ್ರದಾಯ ಮುರಿದ ಸಲ್ಮಾನ್ ಖಾನ್: ಅಭಿಮಾನಿಗಳಿಗೆ ನಿರಾಸೆ

ಪ್ರತಿ ವರ್ಷ ಸಲ್ಮಾನ್ ಸಿನಿಮಾ ಬಿಡುಗಡೆ ಆಗುತ್ತಿತ್ತು

ಪ್ರತಿ ವರ್ಷ ಈದ್‌ ಹಬ್ಬಕ್ಕೆ ಸಲ್ಮಾನ್ ಖಾನ್ ಸಿನಿಮಾ ಬಿಡುಗಡೆ ಆಗಿಯೇ ತೀರುತ್ತದೆ. 'ಈದ್ ಗೆ ಸಲ್ಮಾನ್ ಸಿನಿಮಾ ಬರುತ್ತೆ, ಸಲ್ಮಾನ್ ಸಿನಿಮಾ ಬಂದ ದಿನ ಈದ್ ಆಗುತ್ತದೆ' ಎನ್ನುವ ಮಾತೇ ಬಾಲಿವುಡ್‌ನಲ್ಲಿದೆ.

ಈದ್‌ ಗೆ ಸಲ್ಮಾನ್ ಸಿನಿಮಾ ಇಲ್ಲ

ಆದರೆ ಈ ಬಾರಿ ಈದ್‌ಗೆ ಸಲ್ಮಾನ್ ಸಿನಿಮಾ ನೋಡುವ ಅವಕಾಶ ಅಭಿಮಾನಿಗಳಿಗಿಲ್ಲ. ಸೋಮವಾರ ರಂಜಾನ್ ಅಥವಾ ಈದ್‌ ಹಬ್ಬವಾಗಿದ್ದು, ಲಾಕ್‌ಡೌನ್ ಕಾರಣದಿಂದಾಗಿ ಚಿತ್ರಮಂದಿರಗಳು ಬಂದ್ ಆಗಿರುವ ಕಾರಣ ಈ ಬಾರಿ ಸಲ್ಮಾನ್ ಸಿನಿಮಾ ಬಿಡುಗಡೆ ಆಗುತ್ತಿಲ್ಲ.

ಕಳೆದ 10 ವರ್ಷದಿಂದ ಪಾಲಿಸಿಕೊಂಡು ಬಂದ ಸಂಪ್ರದಾಯ

ಕಳೆದ ಹತ್ತು ವರ್ಷದಲ್ಲಿ ರಂಜಾನ್ ಹಬ್ಬಕ್ಕೆ ಸಲ್ಮಾನ್ ಸಿನಿಮಾ ಬಿಡುಗಡೆ ಆಗದೇ ಇರುವುದು ಇದು ಕೇವಲ ಎರಡನೇ ಬಾರಿಯಷ್ಟೆ. 2010 ರಿಂದಲೂ ರಂಜಾನ್‌ ಗೆ ಸಲ್ಮಾನ್ ಸಿನಿಮಾ ಬಿಡುಗಡೆ ಮಾಡುವ ಪರಿಪಾಠ ಪಾಲಿಸಿಕೊಂಡು ಬರುತ್ತಿದ್ದಾರೆ. 2013 ರ ರಂಜಾನ್‌ ಗೆ ಸಲ್ಮಾನ್ ಸಿನಿಮಾ ಬಿಡುಗಡೆ ಆಗಿರಲಿಲ್ಲ. ಮತ್ತೆ ಈಗ ಸಲ್ಮಾನ್ ಸಿನಿಮಾ ಬಿಡುಗಡೆ ಆಗುತ್ತಿಲ್ಲ.

ಹಿಟ್ ಆಗುತ್ತವೆ ಎಂಬ ನಂಬಿಕೆ

ಈದ್ ದಿನ ಬಿಡುಗಡೆ ಆಗುವ ಸಲ್ಮಾನ್ ಖಾನ್ ಅವರ ಬಹುತೇಕ ಎಲ್ಲಾ ಸಿನಿಮಾಗಳೂ ಸಹ ಸೂಪರ್ ಹಿಟ್ ಆಗುತ್ತವೆ. ದಬಂಗ್, ಭಜರಂಗಿ ಭಾಯಿಜಾನ್, ಕಿಕ್, ಸುಲ್ತಾನ್, ಬಾಡಿಗಾರ್ಡ್, ಏಕ್‌ ಥಾ ಟೈಗರ್, ಟ್ಯೂಬ್‌ಲೈಟ್ ಇವೆಲ್ಲವೂ ರಂಜಾನ್ ದಿನವೇ ಬಿಡುಗಡೆ ಆದ ಸಿನಿಮಾಗಳು.