ಶಾರುಖ್ ಖಾನ್ ಮನೆಯಲ್ಲಿ ಒಂದು ದಿನ ಅತಿಥಿಯಾಗುವ ಸುವರ್ಣಾವಕಾಶ!

Updated: Thursday, November 19, 2020, 17:40 [IST]

ಬಾಲಿವುಡ್ ಸೂಪರ್ ಸ್ಟಾರ್ ಶಾರುಖ್ ಖಾನ್ ಮನೆಯಲ್ಲಿ ನೀವು ಒಂದು ದಿನ ವಾಸ್ತವ್ಯ ಹೂಡುವ, ಮನೆಯ ಎಲ್ಲಾ ಸೌಕರ್ಯಗಳನ್ನು ಬಳಸುವ ಅವಕಾಶ ನಿಮಗೆ ಒದಗಿ ಬಂದರೆ!

ಇದನ್ನು ಕನಸು ಎನ್ನುವಂತಿಲ್ಲ, ಏಕೆಂದರೆ ಆ ಅವಕಾಶ ಇದೀಗ ಲಭ್ಯವಿದೆ. ಅದೂ ಉಚಿತವಾಗಿ. ಹೌದು ಶಾರುಖ್ ಖಾನ್-ಗೌರಿ ಖಾನ್ ರ ಮನೆಯಲ್ಲಿ ಒಂದು ದಿನದ ಮಟ್ಟಿಗೆ ಅತಿಥಿಗಳಾಗಿ ವಾಸ್ತವ್ಯ ಮಾಡಬಹುದಾದ ಅವಕಾಶ ಇದೆ.

ಶಾರುಖ್ ಖಾನ್ ಮನೆ ಎಂದ ಕೂಡಲೇ ಮುಂಬೈ ನ ಮನ್ನತ್ ನೆನಪಾಗುವುದು ಸಾಮಾನ್ಯ, ಆದರೆ ಅತಿಥಿ ಸತ್ಕಾರ ನಡೆಯಲಿರುವುದು ಮನ್ನತ್‌ ನಲ್ಲಲ್ಲ. ಶಾರುಖ್ ತಮ್ಮ ಜೀವನದ ಬಹುಪಾಲು ಸಮಯ ಕಳೆದ ದೆಹಲಿಯ ಮನೆಯಲ್ಲಿ. ಈ ಮನೆ ಸಹ ಮನ್ನತ್‌ಗಿಂತಲೂ ಯಾವುದರಲ್ಲೂ ಕಡಿಮೆ ಇಲ್ಲ.

ಒಳಾಂಗಣ ವಿನ್ಯಾಸ ಮಾಡಿರುವ ಗೌರಿ ಖಾನ್

ಒಂಳಾಂಗಣ ವಿನ್ಯಾಸಕಿ ಆಗಿರುವ ಶಾರುಖ್ ಪತ್ನಿ ಗೌರಿ ಖಾನ್ ಶಾರುಖ್ ಖಾನ್‌ರ ದೆಹಲಿಯ ಐಶಾರಾಮಿ ಮನೆಯನ್ನು ಪೂರ್ಣವಾಗಿ ಮರುವಿನ್ಯಾಸಗೊಳಿಸಿದ್ದು, ವಿದೇಶಿ ಸಂಸ್ಥೆ ಏರ್‌ಬಿಎನ್‌ಬಿ ಸಹಯೋಗದೊಂದಿಗೆ ಅತಿಥಿ ಸತ್ಕಾರಕ್ಕೆಂದು ಮನೆಯನ್ನು ಒದಗಿಸುತ್ತಿದ್ದಾರೆ.

ಒಬ್ಬರಿಗಷ್ಟೆ ಅತಿಥಿಯಾಗುವ ಅವಕಾಶ

ಆದರೆ ಎಲ್ಲರಿಗೂ ಈ ಅವಕಾಶ ಸಿಗುವುದಿಲ್ಲ, ಕೇವಲ ಆಯ್ದ ಒಬ್ಬರಿಗಷ್ಟೆ ಶಾರುಖ್ ಖಾನ್ ಮನೆಯಲ್ಲಿ ತಂಗುವ ಅವಕಾಶವಿದೆ. ನಿಮಗೆ ಆ ಅವಕಾಶ ಬೇಕೆಂದರೆ ಏರ್‌ಬಿಎನ್‌ಬಿ ವೆಬ್‌ಸೈಟ್‌ನಲ್ಲಿ ಈಗಲೇ ಆನ್‌ಲೈನ್ ಅರ್ಜಿ ಗುಜರಾಯಿಸಬೇಕು.

ಫೆಬ್ರವರಿ 13 ರಂದು ಶಾರುಖ್ ಮನೆಯಲ್ಲಿ ವಾಸ

ಆನ್‌ಲೈನ್‌ನಲ್ಲಿ ಬಂದ ಅರ್ಜಿಗಳನ್ನೆಲ್ಲಾ ಕೂಲಂಕುಶವಾಗಿ ಪರಿಶೀಲಿಸಿದ ನಂತರ ಡಿಸೆಂಬರ್ 30 ರಂದು ಆ ಲಕ್ಕಿ ಅತಿಥಿಯನ್ನು ಘೋಷಿಸಲಾಗುವುದು. ಆಯ್ಕೆಯಾದ ಅತಿಥಿಯು ಫೇಬ್ರವರಿ 13 ರಂದು ಶಾರುಖ್ ರ ಡೆಲ್ಲಿ ನಿವಾಸದಲ್ಲಿ ಒಂದು ದಿನ ವಾಸವಿರಬಹುದು.

ಹೋಮ್ ವಿತ್ ಓಪನ್ ಆರ್ಮ್ಸ್

ಡೆಲ್ಲಿ ನಿವಾಸದಲ್ಲಿ ವಾಸವಿರುವ ಆ ಒಬ್ಬ ಅತಿಥಿಗೆ ಸಾಕಷ್ಟು ಗಿಫ್ಟ್‌ಗಳು, ಶಾರುಖ್ ಕುಟುಂಬದೊಂದಿಗೆ ಭೋಜನ, ಐಶಾರಾಮಿ ಕಾರು ಸೇರಿಸಿ, ಶಾರುಖ್ ಮನೆಯ ಎಲ್ಲಾ ಸೌಕರ್ಯ ಬಳಸುವ ಅವಕಾಶ ದೊರೆಯಲಿದೆ. 'ಹೋಮ್‌ ವಿತ್‌ ಓಪನ್ ಆರ್ಮ್ಸ್' ಅಭಿಯಾನದ ಅಡಿಯಲ್ಲಿ ಈ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ.