ಸಲ್ಲು ಫ್ಯಾಮಿಲಿಯಲ್ಲಿ ಮತ್ತೊಂದು ವಿಚ್ಛೇದನ, ಸೋಹೈಲ್-ಸೀಮಾ ದೂರ

ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ ಸೊಹೈಲ್ ಖಾನ್

1998 ರಲ್ಲಿ ಸೆಲೆಬ್ರಿಟಿ ವಸ್ತ್ರ ವಿನ್ಯಾಸಕಿ ಸೀಮಾ ಸಚ್‌ದೇವ್ ಅವರ ಜೊತೆ ಸೊಹೈಲ್ ಖಾನ್‌ ಮದುವೆಯಾಗಿದ್ದರು. ಈ ಇಬ್ಬರಿಗೆ ನಿರ್ವಾಣ್ ಖಾನ್ ಹಾಗೂ ಯೋಹಾನ್ ಖಾನ್‌ ಮಕ್ಕಳಿದ್ದಾರೆ. ಸೊಹೈಲ್‌ಗೆ ಈಗ 51 ವರ್ಷವಾಗಿದ್ದು, ಸೀಮಾಗೆ 46 ವರ್ಷವಾಗಿದೆ. ಸದ್ಯ ಈ ಇಬ್ಬರು ದಂಪತಿಗಳು 24 ವರ್ಷ ಸಂಸಾರ ಮಾಡಿ ಈಗ ಇದ್ದಕ್ಕಿಂದ್ದಂತೆ ವಿಚ್ಛೇದನಕ್ಕೆ ಮುಂದಾಗಿದ್ದಾರೆ. ಆದರೆ, ಇಬ್ಬರ ಈ ಧಿಡೀರ್ ನಿರ್ಧಾರಕ್ಕೆ ಕಾರಣ ಇನ್ನು ತಿಳಿದು ಬಂದಿಲ್ಲ. ವಿಚ್ಛೇದನಕ್ಕೂ ಮುನ್ನ ಇವರಿಬ್ಬರು ಹಲವು ದಿನಗಳಿಂದ ಪ್ರತ್ಯೇಕವಾಗಿ ವಾಸ ಮಾಡುತ್ತಿದ್ದರು ಎಂಬ ಮಾಹಿತಿ ತಿಳಿದು ಬಂದಿದೆ. ಸದ್ಯ ಇಂದು (ಮೇ 13) ಇಬ್ಬರು ಒಪ್ಪಿಗೆ ಸೂಚಿಸಿ ಮುಂಬೈ ಕೌಟುಂಬಿಕ ನ್ಯಾಯಾಲಯಕ್ಕೆ ಆಗಮಿಸಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದಾರೆ.

2017 ರಲ್ಲಿ ಅರ್ಬಾಜ್, ಆರೋರಾ ವಿಚ್ಛೇದನ

ಸೊಹೈಲ್ ಖಾನ್ ಅಣ್ಣ ಅರ್ಬಾಜ್ ಖಾನ್‌ ಹಾಗೂ ಮಲೈಕಾ ಆರೋರ ಡಿವೋರ್ಸ್‌ ಪಡೆದುಕೊಂಡಿದ್ದಾರೆ. ಸಲ್ಮಾನ್‌ ಖಾನ್ ಫ್ಯಾಮಿಲಿಯಲ್ಲಿ ಇದು ಮೊದಲನೇ ವಿಚ್ಛೇದನ ಪ್ರಕರಣವಾಗಿತ್ತು. 1998 ರಲ್ಲಿ ನಟಿ ಮಲೈಕಾ ಆರೋರಾ ಜೊತೆಗೆ ಅರ್ಬಾಜ್ ಖಾನ್ ವಿವಾಹವಾಗಿದ್ದರು. ವಿವಾಹವಾದ ಕೆಲ ವರ್ಷದ ಬಳಿಕ ಇಬ್ಬರ ನಡುವೆ ಭಿನ್ನಾಭಿಪ್ರಾಯ ಮೂಡಿ ದೂರಾಗಲು ನಿರ್ಧರಿಸಿದರು. 2017 ರ ಮೇ ನಲ್ಲಿ ಇಬ್ಬರಿಗೂ ವಿಚ್ಛೇದನೆ ದೊರೆತು ದೂರ ದೂರ ಆದರೂ. ಇವರಿಗೆ 18 ವರ್ಷದ ಅರ್ಹಾನ್ ಹೆಸರಿನ ಮಗನಿದ್ದಾನೆ. ಸದ್ಯ ಮಲೈಕಾ ಆರೋರಾ, ಅರ್ಜುನ್ ಕಪೂರ್ ಜೊತೆ ಡೇಟಿಂಗ್ ನಲ್ಲಿದ್ದಾರೆ. ವಿಚ್ಚೇದನಾ ಪಡೆದು ದೂರ ಆಗಿದ್ದರೂ ಸಹ ಮಗನ ಕಾಳಜಿ ಮಾಡುವುದರಲ್ಲಿ ಇಬ್ಬರು ಯಾವುದೇ ಕೊರತೆ ಮಾಡಿಲ್ಲ.

ಸೋಹೈಲ್, ಸೀಮಾ ವಿಚ್ಛೇದನದ ಬಗ್ಗೆ ಅಧಿಕೃತವಾಗಿ ತಿಳಿಸಿಲ್ಲ

ಅರ್ಬಾಜ್ ಖಾನ್ ಡಿವೋರ್ಸ್‌ ನಂತರ ಸಲ್ಲು ಕುಟುಂಬದಲ್ಲಿ ಸೊಹೈಲ್ ವಿಚ್ಛೇದನದ ಕುರಿತು ಚರ್ಚೆ ಆರಂಭವಾಗಿದೆ. ಕೇವಲ 5 ವರ್ಷದಲ್ಲೇ ಸೊಹೈಲ್ ಕೂಡ ವಿಚ್ಛೇದನಕ್ಕೆ ಮುಂದಾಗಿರುವುದು ಕುತೂಹಲಕ್ಕೆ ಕಾರಣವಾಗಿದೆ. ಸದ್ಯ ಸಲ್ಲು ಫ್ಯಾಮಿಲಿಯಲ್ಲಿ ಇಷ್ಟೆಲ್ಲ ಬೆಳವಣಿಗೆಯಾಗುತ್ತಿದ್ದು, ಈವರೆಗೂ ಡಿವೋರ್ಸ್ ಕುರಿತಾಗಿ ಸೊಹೈಲ್ ಅಗಲಿ ಸೀಮಾ ಆಗಲಿ ಯಾವುದೇ ಅಧಿಕೃತ ಹೇಳಿಕೆಯನ್ನು ನೀಡಿಲ್ಲ. ಹೀಗಾಗಿ ಈ ಸುದ್ದಿ ಸದ್ಯ ಬಾಲಿವುಡ್‌ ಅಂಗಳದಲ್ಲಿ ಭಾರಿ ಸದ್ದು ಮಾಡುತ್ತಿದ್ದು, ಇಬ್ಬರ ವಿರಸದ ಬಗ್ಗೆ ಅಧಿಕೃತ ಮಾಹಿತಿ ಮಾತ್ರ ಹೊರ ಬೀಳ ಬೇಕಿದೆ.

ಇಬ್ಬರು ತಮ್ಮಂದಿರ ಸಂಸಾರ ನೋಡಿ ಸಲ್ಲು ಮದುವೆಯಾಗಿಲ್ವಾ?

ಬಾಲಿವುಡ್‌ನ ಸುಲ್ತಾನ ಆಗಿರುವ ನಟ ಸಲ್ಮಾನ್ ಖಾನ್ ಈಗಲೂ ಎಷ್ಟೋ ಹುಡುಗಿಯರಿಗೆ ಅಚ್ಚಮೆಚ್ಚು. ಆ ಮಟ್ಟಿಗಿನ ಫಿಮೇಲ್ ಫ್ಯಾನ್ಸ್‌ನ್ನು ನಟ ಸಲ್ಮಾನ್ ಖಾನ್ ಹೊಂದಿದ್ದಾರೆ. 56 ವರ್ಷವಾದರೂ ಸಹ ಇನ್ನು ಮದುವೆಯಾಗದೇ ಸ್ಟಿಲ್ ಬ್ಯಾಚುಲರ್‌ ಆಗಿ ಇದ್ದಾರೆ. ಆದರೆ, ಇವರ ತಮ್ಮಂದಿರಾದ ಅರ್ಬಜ್ ಹಾಗೂ ಸೊಹೈಲ್ ಮದುವೆಯಾಗಿ ಸಂಸಾರ ಚೆನ್ನಾಗಿ ನಡೆಸುತ್ತಿದ್ದರು. ಈಗ ಧಿಡೀರ್ ಅಂತ ಡಿವೋರ್ಸ್‌ ಪಡೆಯಲು ಮುಂದಾಗಿದ್ದಾರೆ. ಒಂದು ಕಡೆ ಸಲ್ಮಾನ್ ಖಾನ್ ಮದುವೆಯಾಗದೇ ಇರಲು ತಮ್ಮಂದಿರ ಸಂಸಾರವೇ ಕಾರಣಾನ ಎಂಬ ಅನುಮಾನಗಳು ಕೂಡ ಅಭಿಮಾನಿ ಬಳಗದಲ್ಲಿ ವ್ಯಕ್ತವಾಗಿದೆ.