ಜೂ ಎನ್‌ಟಿಆರ್ ಸಿನಿಮಾಕ್ಕೆ ಬಾಲಿವುಡ್ ಸ್ಟಾರ್ ಅನ್ನು ಎಳೆದು ತರಲಿರುವ ಪ್ರಶಾಂತ್ ನೀಲ್!

ತೆಲುಗಿಗೆ ಬರಲಿದ್ದಾರಾ ಆಮಿರ್ ಖಾನ್?

ಬಾಲಿವುಡ್‌ನ ಸ್ಟಾರ್ ನಟ, ಮಿಸ್ಟರ್ ಪರ್ಫೆಕ್ಷನಿಸ್ಟ್ ಎಂದೇ ಹೆಸರಾಗಿರುವ ಆಮಿರ್ ಖಾನ್ ಅವರನ್ನು ಜೂ ಎನ್‌ಟಿಆರ್‌ರ ಸಿನಿಮಾಕ್ಕಾಗಿ ಪ್ರಶಾಂತ್ ನೀಲ್ ಕರೆತರಲಿದ್ದಾರೆ ಎನ್ನಲಾಗುತ್ತಿದೆ. ಈ ಬಗ್ಗೆ ಈಗಾಗಲೇ ಒಂದು ಸುತ್ತಿನ ಮಾತುಕತೆಯನ್ನು ಆಮಿರ್ ಖಾನ್‌ ಜೊತೆ ಮುಗಿಸಿದ್ದಾರಂತೆ ಪ್ರಶಾಂತ್ ನೀಲ್. ಆಮಿರ್ ಖಾನ್ ಸಹ ಸಿನಿಮಾದಲ್ಲಿ ನಟಿಸಲು ಉತ್ಸುಕರಾಗಿದ್ದಾರೆ ಎನ್ನಲಾಗುತ್ತಿದೆ.

ಖಳನ ಪಾತ್ರದಲ್ಲಿ ಆಮಿರ್ ಖಾನ್!

ಆಮಿರ್ ಖಾನ್‌, ಜೂ ಎನ್‌ಟಿಆರ್-ಪ್ರಶಾಂತ್ ನೀಲ್ ಕಾಂಬಿನೇಶನ್ ಸಿನಿಮಾದಲ್ಲಿ ಖಳನ ಪಾತ್ರದಲ್ಲಿ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ. ಹೀರೋ ಅಷ್ಟೆ ಪ್ರಧಾನವಾದ ಪಾತ್ರ ಇದಾಗಿರಲಿದ್ದು, ಇಬ್ಬರಿಗೂ ಸಮಾನ ಸ್ಕೋಪ್ ಹಾಗೂ ಸ್ಪೇಸ್ ಅನ್ನು ಪ್ರಶಾಂತ್ ನೀಲ್ ಸೃಷ್ಟಿಸಲಿದ್ದಾರಂತೆ. ಇದೇ ಸಿನಿಮಾದಲ್ಲಿ ಬಾಲಿವುಡ್ ನಟಿ ಜಾಹ್ನವಿ ಕಪೂರ್ ಸಹ ನಾಯಕಿಯಾಗಿ ಜೂ ಎನ್‌ಟಿಆರ್ ಜೊತೆ ನಟಿಸಲಿದ್ದಾರೆ ಎಂಬ ಮಾತುಗಳು ಸಹ ಕೇಳಿ ಬರುತ್ತಿವೆ ಆದರೆ ಸುದ್ದಿ ಖಾತ್ರಿಯಾಗಿಲ್ಲ.

ಅತಿಥಿ ಪಾತ್ರದಲ್ಲಿ ನಟಿಸಲ್ಲ ಆಮಿರ್ ಖಾನ್

ಇನ್ನು ನಟ ಆಮಿರ್ ಖಾನ್, ಯಾರ ಸಿನಿಮಾದಲ್ಲಿಯೂ ಅತಿಥಿ ಪಾತ್ರದಲ್ಲಿ ನಟಿಸುವುದಿಲ್ಲ. ತಮ್ಮ ಆತ್ಮೀಯ ಗೆಳೆಯರಾದ ಸಲ್ಮಾನ್ ಖಾನ್, ಶಾರುಖ್ ಖಾನ್ ಅವರುಗಳು ಹಲವು ಬಾರಿ ಕೇಳಿದ್ದಾಗಿಯೂ ಅವರು ಈ ವರೆಗೆ ಅತಿಥಿ ಪಾತ್ರದಲ್ಲಿ ನಟಿಸಿಲ್ಲ. ಹಾಗಾಗಿ ಜೂ ಎನ್‌ಟಿಆರ್ ಸಿನಿಮಾದಲ್ಲಿ ಸಹ ಅವರದ್ದು ಅತಿಥಿ ಪಾತ್ರ ಆಗಿರುವುದಿಲ್ಲ ಪೂರ್ಣ ಪ್ರಮಾಣದ ಪಾತ್ರವಾಗಿರುತ್ತದೆ ಎನ್ನಲಾಗುತ್ತಿದೆ. ಇನ್ನು ಸಲ್ಮಾನ್ ಖಾನ್ ಈಗಾಗಲೇ ತೆಲುಗು ಸಿನಿಮಾ 'ಗಾಡ್ ಫಾದರ್'ನಲ್ಲಿ ನಟಿಸಿದ್ದಾರೆ. ಈಗ ಆಮಿರ್ ಖಾನ್ ಸಹ ದಕ್ಷಿಣಕ್ಕೆ ಬರುವ ಮನಸ್ಸು ಮಾಡಿದ್ದಾರೆ.

ಹಾಲಿವುಡ್ ಸಿನಿಮಾದಲ್ಲಿ ಜೂ ಎನ್‌ಟಿಆರ್‌

ಇನ್ನು ನಟ ಜೂ ಎನ್‌ಟಿಆರ್ ಪ್ರಸ್ತುತ ಕೊರಟಾಲ ಶಿವ ನಿರ್ದೇಶನದ ಹೊಸ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಆ ಸಿನಿಮಾದ ಬಳಿಕವಷ್ಟೆ ಪ್ರಶಾಂತ್ ನೀಲ್ ಸಿನಿಮಾದಲ್ಲಿ ನಟಿಸಲಿದ್ದಾರೆ. ಈ ನಡುವೆ ಜೂ ಎನ್‌ಟಿಆರ್‌ಗೆ ಒಂದು ಬಾಲಿವುಡ್ ಹಾಗೂ ಒಂದು ಹಾಲಿವುಡ್ ಆಫರ್ ಸಹ ಬಂದಿದೆ ಎನ್ನಲಾಗುತ್ತಿದೆ. ಜೂ ಎನ್‌ಟಿಆರ್‌ ನಟನೆಯ 'RRR' ಸಿನಿಮಾ ಅನ್ನು ಹಾಲಿವುಡ್ ಸಿನಿ ಕರ್ಮಿಗಳು ಹಾಗೂ ಪ್ರೇಕ್ಷಕರು ಮೆಚ್ಚಿಕೊಂಡಿರುವ ಕಾರಣ ಜೂ ಎನ್‌ಟಿಆರ್‌ಗೆ ಹಾಲಿವುಡ್‌ನಲ್ಲೂ ಬೇಡಿಕೆ ಶುರುವಾಗಿದೆ.