ಮದುವೆ ನಂತರ ಏನಾಯ್ತು? 'ಯೇ ಮಾಯ ಚೇಸಾವೆ' ಸೀಕ್ವೆಲ್‌ನಲ್ಲಿ ಸಮಂತಾ ಜಾಗಕ್ಕೆ ಕನ್ನಡ ನಟಿ?

ಚೈಸ್ಯಾಮ್ ಮತ್ತೆ ಒಟ್ಟಿಗೆ ನಟಿಸುತ್ತಾರಾ?

'ಯೇ ಮಾಯ ಚೇಸಾವೆ' ಚೈತು- ಸ್ಯಾಮ್ ಇಬ್ಬರಿಗೂ ಬಹಳ ಇಷ್ಟವಾದ ಸಿನಿಮಾ. ಈ ಸಿನಿಮಾ ಸೀಕ್ವೆಲ್ ಅಂದರೆ ಇಬ್ಬರು ನಟಿಸೋಕೆ ಸಿದ್ಧರಿರುತ್ತಾರೆ. ಕೆಲ ದಿನಗಳ ಹಿಂದೆ ಚೈತನ್ಯಾ ಮತ್ತೆ ಸ್ಯಾಮ್ ಜೊತೆ ನಟಿಸೋಕೆ ಅಭ್ಯಂತರ ಇಲ್ಲ ಎಂದಿದ್ದರು. ಹಾಗಾಗಿ ಗೌತಮ್ ವಾಸುದೇವ್ ಮನನ್ ಇವರಿಬ್ಬರನ್ನು ಒಟ್ಟುಗೂಡಿಸಿ ಕಾರ್ತಿಕ್- ಜೆಸ್ಸಿ ಲವ್ ಸ್ಟೋರಿ ಮುಂದುವರೆಸಿದರೂ ಅಚ್ಚರಿಪಡಬೇಕಿಲ್ಲ. ಸದ್ಯಕ್ಕೆ ಮಯೋಸೈಟಿಸ್ ಸಮಸ್ಯೆಯಿಂದ ಬಳಲುತ್ತಿರುವ ಸ್ಯಾಮ್ ಹೊಸ ಸಿನಿಮಾಗಳನ್ನು ಒಪ್ಪಿಕೊಳ್ತಿಲ್ಲ.

ನಾಗ ಚೈತನ್ಯಾ ಜೊತೆ ರಶ್ಮಿಕಾ?

ಸದ್ಯ 'ಯೇ ಮಾಯ ಚೇಸಾವೆ' ಸೀಕ್ವೆಲ್‌ಗೆ ಕನ್ನಡದ ನಟಿ ರಶ್ಮಿಕಾ ಮಂದಣ್ಣ ಹೆಸರು ಕೇಳಿಬರ್ತಿದೆ. ಕೊಡಗಿನ ಬೆಡಗಿ ಈ ಟಾಲಿವುಡ್, ಬಾಲಿವುಡ್ ಸಿನಿಮಾಗಳಲ್ಲಿ ಬ್ಯುಸಿಯಾಗಿರೋದು ಗೊತ್ತೇಯಿದೆ. ನ್ಯಾಷನಲ್ ಕ್ರಶ್ ಅನ್ನಿಸಿಕೊಂಡಿರೋ ಚೆಲುವೆ ರಶ್ಮಿಕಾ ಸೀಕ್ವೆಲ್‌ನಲ್ಲಿ ನಟಿಸ್ತಾರೆ ಎನ್ನಲಾಗ್ತಿದೆ. 'ಪುಷ್ಪ'-2 ಬಿಟ್ಟರೆ ರೋಶ್ ಯಾವುದೇ ತೆಲುಗು ಸಿನಿಮಾ ಒಪ್ಪಿಕೊಂಡಿಲ್ಲ.

ಕಾರ್ತಿ- ಜೆಸ್ಸಿ ಮದುವೆ ನಂತ್ರ ಏನಾಯ್ತು?

12 ವರ್ಷಗಳ ಹಿಂದೆ ಬಂದ 'ಯೇ ಮಾಯ ಚೇಸಾವೆ' ಚಿತ್ರದಲ್ಲಿ ಕಾರ್ತಿಕ್- ಜೆಸ್ಸಿ ಲವ್ ಸ್ಟೋರಿ ನೋಡಿದ್ದೆವು. ಜೋಡಿ ಕೊನೆಗೆ ಮದುವೆ ಆಗಿತ್ತು. ಮದುವೆ ನಂತರ ಕಥೆ ಏನಾಯಿತು ಎನ್ನುವುದನ್ನು ಸೀಕ್ವೆಲ್‌ನಲ್ಲಿ ಹೇಳುತ್ತಾರಂತೆ. ಇಬ್ಬರು ಡಿವೋರ್ಸ್ ತೆಗೆದುಕೊಳ್ಳುವ ಕಥೆಯೂ ಇರುತ್ತಂತೆ. ಚೈಸ್ಯಾಮ್ ರಿಯಲ್‌ ಲೈಫ್‌ನಲ್ಲಿ ನಡೆದಿದ್ದೇ ಮುಂದುವರೆದ ಭಾಗದಲ್ಲಿ ಬರಲಿದೆ ಎನ್ನುವ ಗುಸುಗುಸು ಕೇಳಿಬರ್ತಿದೆ.

ಸೀಕ್ವೆಲ್‌ಗಾಗಿ ಅಭಿಮಾನಿಗಳ ಕಾತರ

ಎಲ್ಲಾ ವಿಭಾಗಗಳಲ್ಲೂ ಸೂಪರ್ ಅನ್ನಿಸಿಕೊಂಡಿದ್ದ ರೊಮ್ಯಾಂಟಿಕ್ ಲವ್ ಸ್ಟೋರಿ ಸೀಕ್ವೆಲ್‌ಗಾಗಿ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಇದೇ ಕ್ರೇಜ್‌ನ ಎನ್‌ಕ್ಯಾಶ್ ಮಾಡಿಕೊಳ್ಳಲು ಮೇಕರ್ಸ್ ಕೂಡ ಕಾಯುತ್ತಿದ್ದಾರೆ. ಗೌತಮ್ ವಾಸುದೇವ್ ಮೆನನ್ ಈಗಾಗಲೇ ಸಿನಿಮಾ ಕಥೆ ಹೆಣೆಯುವ ಕೆಲಸ ಆರಂಭಿಸಿದ್ದಾರೆ. ಶೀಘ್ರದಲ್ಲೇ ಸಿನಿಮಾ ಸೆಟ್ಟೇರುವ ನಿರೀಕ್ಷೆ ಇದೆ. ಆದರೆ ಕಾರ್ತಿಕ್- ಜೆಸ್ಸಿ ಪಾತ್ರಗಳಲ್ಲಿ ಯಾರು ನಟಿಸುತ್ತಾರೆ ಎನ್ನುವುದು ಮಾತ್ರ ಕುತೂಹಲ ಕೆರಳಿಸಿದೆ.