'ತಾರಕ್' ಸುಂದರಿ ಶಾನ್ವಿಗೆ ಒಲಿದು ಬಂದ ಮತ್ತೊಂದು ಅವಕಾಶ

ನಟಿ ಶಾನ್ವಿ ಶ್ರೀವತ್ಸವ್ ದಿನೇ ದಿನೇ ತನ್ನ ಜನಪ್ರಿಯತೆಯನ್ನು ಹೆಚ್ಚಿಸಿಕೊಳ್ಳುತ್ತಿದ್ದಾರೆ. ಕನ್ನಡದ ಅನೇಕ ಸ್ಟಾರ್ ನಟರ ಜೊತೆ ಸಿನಿಮಾ ಮಾಡಿರುವ ಶಾನ್ವಿ ಇತ್ತೀಚಿಗಷ್ಟೆ 'ಮಫ್ತಿ' ಚಿತ್ರದ ನಾಯಕಿ ಆಗಿದ್ದರು. ಆ ಸಿನಿಮಾ ಬಳಿಕ ಈಗ ಮತ್ತೊಂದು ಹೊಸ ಸಿನಿಮಾವನ್ನು ಶಾನ್ವಿ ಶುರು ಮಾಡುವ ತವಕದಲ್ಲಿ ಇದ್ದಾರೆ.

ಈ ಬಾರಿ ಮಹಿಳಾ ಪ್ರಧಾನ ಸಿನಿಮಾಗೆ ಶಾನ್ವಿ ನಾಯಕಿ ಆಗಲಿದ್ದಾರೆ. ಇದೊಂದು ಸಸ್ಪೆನ್ಸ್ ಥ್ರಿಲ್ಲರ್ ರೀತಿಯ ಸಿನಿಮಾ ಆಗಿದ್ದು, ವರುಣದೇವ ಕೊಲವು ಎಂಬುವವರು ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದಾರಂತೆ. ಈ ಚಿತ್ರದ ಪಾತ್ರಕ್ಕೆ ಶಾನ್ವಿ ಅವರು ತುಂಬ ಚೆನ್ನಾಗಿ ಸೂಟ್ ಆಗುತ್ತಾರೆ ಎನ್ನುವುದು ನಿರ್ದೇಶಕ ಅಭಿಪ್ರಾಯವಾಗಿದೆ. ಅಂದಹಾಗೆ ಈ ಸಿನಿಮಾದಲ್ಲಿ ಸುಹಾಸಿನಿ ಮತ್ತು ಕಿಶೋರ್ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಲಿದ್ದಾರೆ. 'ಮಫ್ತಿ' ಖ್ಯಾತಿಯ ಸಿನಿಮಾಟೋಗ್ರಾಫರ್ ನವೀನ್ ಕುಮಾರ್ ಛಾಯಾಗ್ರಹಣ ಇರಲಿದೆಯಂತೆ. ಸದ್ಯಕ್ಕೆ ಈ ಚಿತ್ರದ ಟೈಟಲ್ ಇನ್ನು ಪಕ್ಕಾ ಆಗಿಲ್ಲ.

ಇನ್ನು ಶಾನ್ವಿ ಶ್ರೀವತ್ಸವ ನಟ ಯಶ್, ದರ್ಶನ್, ಶ್ರೀ ಮುರಳಿ, ಗಣೇಶ್ ಜೊತೆ ನಟಿಸಿದ್ದಾರೆ. ಅದರ ಜೊತೆಗೆ ರಕ್ಷಿತ್ ಶೆಟ್ಟಿ ಅವರ ಮುಂದಿನ ಸಿನಿಮಾ 'ಅವನೇ ಶ್ರೀಮನ್ನಾರಾಯಣ' ಚಿತ್ರಕ್ಕೆ ನಾಯಕಿ ಆಗಿದ್ದಾರೆ. ಈ ರೀತಿ ಕನ್ನಡದಲ್ಲಿ 'ತಾರಕ್' ಸುಂದರಿ ಶಾನ್ವಿ ಅವರ ಡಿಮ್ಯಾಂಡ್ ದಿನೇ ದಿನೇ ಜಾಸ್ತಿಯಾಗುತ್ತಿದೆ.