ಮಲಯಾಳಂ ಯುವನಟ ಅನುಮಾನಾಸ್ಪದ ಸಾವು

ಮಲಯಾಳಂ ಯುವನಟ ಶರತ್ ಚಂದ್ರ ಅನುಮಾನಾಸ್ಪದವಾಗಿ ಸಾವನ್ನಪ್ಪಿದ್ದಾರೆ. ಅವರಿಗೆ 37 ವರ್ಷ ವಯಸ್ಸಾಗಿತ್ತು. ಅವರ ಮೃತದೇಹ ಅವರ ನಿವಾಸದಲ್ಲಿ ಪತ್ತೆಯಾಗಿದೆ. ಹೃದಯಾಘಾತದಿಂದ ಶರತ್ ಚಂದ್ರ ಸಾವನ್ನಪ್ಪಿದ್ದಾರೆ ಎಂದು ಅನುಮಾನಿಸಲಾಗಿದೆ.

'ಅನೀಸ್ಯ' ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ಶರತ್ ಚಂದ್ರ ಆ ನಂತರ 'ಅಂಗಮಲೈ ಡೈರೀಸ್', ದುಲ್ಕರ್ ಸಲ್ಮಾನ್ ಜೊತೆಗೆ 'ಸಿಐಎ', 'ಕೂಡೆ', 'ತಾತ್ವಿಕ ಅವಲೋಕನಂ' ಇನ್ನೂ ಕೆಲವು ಸಿನಿಮಾಗಳಲ್ಲಿ ನಟಿಸಿದ್ದರು.

ಸಿನಿಮಾ ರಂಗಕ್ಕೆ ಬರುವ ಮುನ್ನ ಐಟಿ ಉದ್ಯೋಗಿಯಾಗಿ ಶರತ್ ಚಂದ್ರ ಕೆಲಸ ಮಾಡಿದ್ದರು. ಬಳಿಕ ಡಬ್ಬಿಂಗ್ ಕಲಾವಿದರಾಗಿಯೂ ಕೆಲಸ ಮಾಡಿದ್ದರು. ಆ ಬಳಿಕ ಸಿನಿಮಾಗಳಲ್ಲಿ ನಟಿಸುವ ಅವಕಾಶ ದೊರಕಿತ್ತು. 'ಅಂಗಮಲೈ ಡೈರೀಸ್' ಸಿನಿಮಾದಲ್ಲಿ ಅವರ ನಟನೆಗೆ ಬಹು ಮೆಚ್ಚುಗೆ ವ್ಯಕ್ತವಾಗಿತ್ತು.

ನಟ ಆಂಟೊನಿ ವರ್ಗೀಸ್ ಸೇರಿದಂತೆ ಹಲವು ಮಂದಿ ಮಲಯಾಳಂ ಸ್ಟಾರ್ ನಟರು ಶರತ್ ಚಂದ್ರ ಅವರ ಚಿತ್ರವನ್ನು ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿ ಅವರ ನಿಧನಕ್ಕೆ ಸಂತಾಪ ಸೂಚಿಸಿದ್ದಾರೆ.

ಶರತ್ ಚಂದ್ರರ ಹಲವು ಅಭಿಮಾನಿಗಳು ತಮ್ಮ ಮೆಚ್ಚಿನ ನಟನ ನಿಧನಕ್ಕೆ ಸಂತಾಪ ಸೂಚಿಸಿದ್ದಾರೆ. ಮಲಯಾಳಂನ ಹಲವು ನಟರು, ಶರತ್ ಚಂದ್ರ ಜೊತೆಗೆ ನಟಿಸಿದ್ದ ನಟರು ಸಾಮಾಜಿಕ ಜಾಲತಾಣದ ಮೂಲಕ ಅವರ ನಿಧನಕ್ಕೆ ಕಂಬನಿ ಮಿಡಿದಿದ್ದಾರೆ.

ಕೊಚ್ಚಿಯವರಾಗಿದ್ದ ಶರತ್ ಚಂದ್ರ ಅವರ ಅಂತಿಮ ಕಾರ್ಯ ಕೊಚ್ಚಿಯಲ್ಲಿಯೇ ನಡೆಯಲಿದೆ.

Recommended Video