ಪ್ರೈವೇಟ್ ನಂಬರ್ ನಲ್ಲಿ ಚಿನ್ನದ ಗಣಿಗೆ ಪಯಣ

ಊರಿಂದ ಊರಿಗೆ ಪಯಣಿಸಬೇಕಾದರೆ ಬಸ್ಸು, ರೈಲು, ಕಾರು ಇತ್ಯಾದಿ ವಾಹನಗಳನ್ನು ಅವಲಂಬಿಸುತ್ತೇವೆ. ಆದರೆ ಯುವಜೋಡಿಯೊಂದು ಬೈಕ್‌ನಲ್ಲಿ ಪ್ರವಾಸ ಕೈಗೊಂಡಿದೆ. ಬೆಂಗಳೂರಿನಿಂದ ಆರಂಭವಾದ ಇವರ ಪಯಣ ಚಿನ್ನದ ಗಣಿಯವರೆಗೂ ಸಾಗುತ್ತದೆ.

ಈ ಸಂದರ್ಭದಲ್ಲಿ ಯುವಜೋಡಿ ಕಾಂತರಾಜ್ ರಚನೆಯ 'ಚಲಿಸುತಿದೆ ನೆನೆ ನೆನೆದು ಕನಸುಗಳ ಮೆರವಣಿಗೆ...' ಎಂಬ ಹಾಡು ಕೂಡ ಹೇಳುತ್ತಾರೆ. ಈ ಗೀತೆಯ ಚಿತ್ರೀಕರಣವನ್ನು 'ಪ್ರೈವೇಟ್ ನಂ' ಚಿತ್ರಕ್ಕಾಗಿ ನಿರ್ದೇಶಕ ಆನಂದಕುಮಾರ್ ಚಿತ್ರೀಕರಿಸಿಕೊಂಡರು. ಪ್ರೀತಮ್ ಹಾಗೂ ನಿಹಾರಿಕ ಈ ಹಾಡಿನ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದರು.

ಎರಡು ಗೀತೆಗಳ ಚಿತ್ರೀಕರಣ ಬಾಕಿಯಿದ್ದು, ಆ ಗೀತೆಗಳು ಜುಲೈ ಅಂತ್ಯದಲ್ಲಿ ದಕ್ಷಿಣ ಆಫ್ರಿಕಾದ ಪ್ರಸಿದ್ಧ ದ್ವೀಪ ಮಡಗಾಸ್ಕರ್ ಹಾಗೂ ಅಲ್ಲಿನ ಸುಂದರ ತಾಣಗಳಲ್ಲಿ ಚಿತ್ರೀಕರಣಗೊಳ್ಳಲಿದೆ ಎನ್ನುತ್ತಾರೆ ನಿರ್ದೇಶಕರು. ಎ.ಕೆ.ಸಿನಿ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ಗಣೇಶ್‌ಶೆಟ್ಟಿ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಅಗಸ್ತ್ಯ ರವರ ಸಂಗೀತವಿದೆ.

ಪ್ರೇಮಾನಂದ್ ಛಾಯಾಗ್ರಹಣ, ವೆಂಕಟೇಶ್‌ಪ್ರಸಾದ್ ಸಂಭಾಷಣೆ, ರಾಜೇಶ್ ಫರ್ನಾಂಡಿಸ್ ತಾಂತ್ರಿಕ ನಿರ್ದೇಶನ, ರಿಷಿಬಾರ್ನೆ ಅವರ ಸಂಕಲನವಿದೆ. ಪ್ರೀತಂ, ನಿಹಾರಿಕಸಿಂಗ್, ಕ್ಲಾಡಿಯಾ, ಶರಣ್, ಚಿದಾನಂದ್, ಶ್ರೀಲಕ್ಷ್ಮೀ, ಬ್ಯಾಂಕ್‌ಜನಾರ್ದನ್, ಅರಿಸಿಕೆರೆರಾಜು, ಕೆಂಪೇಗೌಡ, ರಾಜೇಶ್ ಮುಂತಾದವರ ತಾರಾಗಣ ಚಿತ್ರಕ್ಕಿದೆ.