ಶಶಾಂಕ್ ಹೊಸ ಚಿತ್ರದ ನಾಯಕ ದುನಿಯಾ ವಿಜಯ್

ಭರವಸೆಯ ನಿರ್ದೇಶಕ ಶಶಾಂಕ್ ಹೊಸ ಚಿತ್ರಕ್ಕೆ 'ಬ್ಲ್ಯಾಕ್ ಕೋಬ್ರಾ' ಎಂದೇ ಖ್ಯಾತನಾದ ದುನಿಯಾ ವಿಜಯ್ ನಾಯಕ ನಟನಾಗಿ ಆಯ್ಕೆಯಾಗಿದ್ದಾರೆ. ಈ ಹಿಂದೆ ಸುದೀಪ್ ಜೊತೆ ಚಿತ್ರ ಮಾಡುವುದಾಗಿ ಶಶಾಂಕ್ ಪ್ರಕಟಿಸಿದ್ದರು. ಆ ಚಿತ್ರಕ್ಕೂ ಮುನ್ನ ದುನಿಯಾ ವಿಜಯ್‌ಗೆ ಶಶಾಂಕ್ ಆಕ್ಷನ್, ಕಟ್ ಹೇಳಲಿದ್ದಾರೆ.

ಸದ್ಯಕ್ಕೆ ಕಿಚ್ಚ ಮೂರು ಚಿತ್ರಗಳಲ್ಲಿ ಬಿಜಿ ಬಿಜಿ. ಅವರ ಡೇಟ್ಸ್ ಸಿಗಲು ಏಪ್ರಿಲ್ ವರೆಗೂ ಕಾಯಬೇಕು. ಅಷ್ಟರಲ್ಲಿ ಇನ್ನೊಂದು ಚಿತ್ರ ಮುಗಿಸಿಬಿಡೋಣ ಎಂಬುದು ಶಶಾಂಕ್ ಲೆಕ್ಕಾಚಾರ. ಈ ಚಿತ್ರಕ್ಕೆ 'ಶೌರ್ಯ' ನಿರ್ಮಿಸಿದ್ದ ಗಂಗಾಧರ್ ಮತ್ತು ಬಸವರಾಜ್ ನಿರ್ಮಾಪಕರು. ಡಿಸೆಂಬರ್‌‍ನಲ್ಲಿ ಸೆಟ್ಟೇರಲಿರುವ ಈ ಚಿತ್ರಕ್ಕೆ ಐಂದ್ರಿತಾ ರೆ ನಾಯಕಿಯಾಗುವ ಸಾಧ್ಯತೆಯಿದೆ.

ಇನ್ನೂ ಹೆಸರಿಡದ ಈ ಚಿತ್ರ ಶೇಕಡಾ ನೂರರಷ್ಟು ಮನರಂಜನಾತ್ಮಕ ಚಿತ್ರ ಎನ್ನುತ್ತಾರೆ ಶಶಾಂಕ್. ವಿಜಯ್ ದೇಹದಾರ್ಢ್ಯವನ್ನು ಗಮನದಲ್ಲಿಟ್ಟುಕೊಂಡು ಕತೆ ಹೆಣೆದಿದ್ದಾರೆ. ಚಿತ್ರದ ಮೊದಲರ್ಧ ಒಂದು ಚಿತ್ರದ ಒಂಥರಾ ಅನುಭವ ನೀಡಿದರೆ ದ್ವಿತೀಯಾರ್ಧ ಇನ್ನೊಂದು ಸಿನಿಮಾ ನೋಡಿದಂತಿರುತ್ತದೆ ಎನ್ನುತ್ತಾರೆ ಶಶಾಂಕ್.