ಸಿನಿಮಾ ಪ್ರದರ್ಶನ ವೇಳೆಯಲ್ಲಿ ಮತ್ತೆ ಬದಲಾವಣೆ

By Staff

Published: Friday, May 29, 2009, 13:09 [IST]

ಮೇ 29ರಿಂದ ಜಾರಿಗೆ ಬರುವಂತೆ ರಾಜ್ಯಾದ್ಯಂತ ಸಿನಿಮಾಗಳ ಪ್ರದರ್ಶನ ವೇಳೆ ಮತ್ತೊಮ್ಮೆ ಬದಲಾಗಿದೆ. ಸಿನಿಮಾ ಪ್ರೇಕ್ಷಕರ ಅನುಕೂಲಕ್ಕೆ ಈ ಬದಲಾವಣೆ ಮಾಡಲಾಗಿದೆ ಎಂದು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಪ್ರಕಟಣೆಯಲ್ಲಿ ತಿಳಿಸಿದೆ. ಹೊಸ ಬದಲಾದ ಸಮಯದ ಪ್ರಕಾರ ಬೆಳಗಿನ ಪ್ರದರ್ಶನ 11ಗಂಟೆಗೆ, ಮ್ಯಾಟಿನಿ 2, ಸಂಜೆ ಆಟ 5 ಗಂಟೆಗೆ ಮತ್ತು ರಾತ್ರಿ ಆಟ 8 ಗಂಟೆಗೆ.

ಕರ್ನಾಟಕ ಚಲನಚಿತ್ರ ಮಂಡಳಿ ಅಂತಿಮಗೊಲಿಸಿದ್ದ ಈ ಹಿಂದಿನ ಸಮಯಕ್ಕೆ ಕೆಲವು ನಿರ್ಮಾಪಕರು ಅಪಸ್ವರ ಎತ್ತಿದ್ದರು. ಮೇ 22ನೇ ತಾರೀಕಿನಿಂದ 11.15, 2.30, 6.15 ಮತ್ತು ರಾತ್ರಿ 9 ಗಂಟೆಗೆ ಸಿನಿಮಾ ಪ್ರದರ್ಶನ ನಡೆಯಲಿದೆ ಎಂದು ಪ್ರಕಟಿಸಿತ್ತು. ಆದರೆ ನಿರ್ಮಾಪಕರ ಹಿತ ದೃಷ್ಟಿಯಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಮಂಡಳಿಯ ಕಾರ್ಯದರ್ಶಿ ಥಾಮಸ್ ಡಿಸೋಜ ಹೇಳಿದ್ದಾರೆ.

ಈ ಹಿಂದೆ ಪ್ರಕಟಿಸಿದ್ದ ಬೆಳಗಿನ ಹಾಗೂ ಮಧ್ಯಾಹ್ನದ ಪ್ರದರ್ಶನ ವೇಳೆಯಲ್ಲಿ ಯಾವುದೇ ಬದಲಾವಣೆ ಇಲ್ಲ. ಸಂಜೆ 6 ಗಂಟೆಗೆ ನಿಗದಿಯಾಗಿದ್ದ ಪ್ರದರ್ಶನ ವೇಳೆ ಈಗ ಸಂಜೆ 5 ಗಂಟೆಗೆ ಬದಲಾಗಿದೆ. ರಾತ್ರಿ 8.30ಕ್ಕೆ ನಿಗದಿಯಾಗಿದ್ದ ರಾತ್ರಿ ಆಟ ಈಗ ರಾತ್ರಿ 8 ಗಂಟೆಗೆ ಆರಂಭವಾಗಲಿದೆ.

(ದಟ್ಸ್ ಕನ್ನಡ ಚಿತ್ರವಾರ್ತೆ)

More from Filmibeat