'ಪ್ರೇಮಿಸಂ'ನಲ್ಲಿ ಸುನಿಲ್ ರಾವ್; ಗುಟ್ಟು ರಟ್ಟು!

ರತ್ನಜ ನಿರ್ದೇಶಿಸುತ್ತಿರುವ 'ಪ್ರೇಮಿಸಂ' ಚಿತ್ರದಲ್ಲಿ ಸುನಿಲ್ ರಾವ್ ಸಹ ಒಂದು ಪಾತ್ರ ಮಾಡಿದ್ದಾರೆ. ಫ್ಲಾಶ್ ಬ್ಯಾಕ್ ನಲ್ಲಿ ಬಂದು ಹೋಗುವ ಪಾತ್ರ ಅವರದ್ದು. ಸುನಿಲ್ ರಾವ್ ಜೊತೆಗೆ ಈ ಚಿತ್ರದಲ್ಲಿ ಚೇತನ್ ಚಂದ್ರ ಮತ್ತು ವರುಣ್ ಮತ್ತಿಬ್ಬರು ನಾಯಕರು. ನಾಯಕಿ ಮಾತ್ರ ಒಬ್ಬಳೆ, ಅಮೂಲ್ಯ.

ಇಷ್ಟಕ್ಕೂ ಸುನಿಲ್ ರಾವ್ ಅತಿಥಿ ಪಾತ್ರದಲ್ಲಿ ಕಾಣಿಸುತ್ತಾರೋ ಅಥವಾ ಮುಖ್ಯಪಾತ್ರದಲ್ಲಿ ದರ್ಶನ ನೀಡುತ್ತಾರೋ ಎಂಬುದು ಸದ್ಯಕ್ಕೆ ಸಸ್ಪೆನ್ಸ್. 'ಮಿನುಗು' ಚಿತ್ರದಲ್ಲಿ ನಟಿಸುತ್ತಿದ್ದ ಸಂದರ್ಭದಲ್ಲೇ ಸುನಿಲ್ ಈ ಚಿತ್ರಕ್ಕೂ ಬಣ್ಣ ಬಳಿದುಕೊಂಡಿದ್ದರಂತೆ. ಸುನಿಲ್ ಪಾತ್ರವನ್ನು ವಿದೇಶದಲ್ಲೂ ಚಿತ್ರೀಕರಿಸಿದ್ದಾರೆ ಎನ್ನುತ್ತವೆ ಮೂಲಗಳು.

'ಪ್ರೇಮಿಸಂ' ಚಿತ್ರದಲ್ಲಿ 'ಎಕ್ಸ್ ಕ್ಯೂಸ್ ಮಿ' ಯ ಸುನಿಲ್ ರಾವ್ ನಟಿಸಿರುವುದು ಇಷ್ಟು ದಿನ ಗುಟ್ಟಾಗಿ ಇಡಲಾಗಿತ್ತು. ಪ್ರೇಕ್ಷಕರಿಗೆ ಸರ್ ಪ್ರೈಸ್ ಕೊಡಬೇಕೆಂಬ ರತ್ನಜರ ಯೋಜನೆ ಇದೀಗ ತಲೆಕೆಳಗಾಗಿದೆ. ಸುನಿಲ್ ರಾವ್ ಪಾತ್ರ ಯಾವ ರೀತಿಯದು ಎಂಬಷ್ಟರ ಮಟ್ಟಿಗೆ ರತ್ನಜ ಗುಟ್ಟನ್ನು ಕಾಪಾಡಿಕೊಂಡಿದ್ದಾರೆ!