ಕನ್ನಡದಲ್ಲಿಯೇ ಶುಭಾಶಯ ಕೋರಿ ಮತ್ತೆ ಮನಗೆದ್ದ ಅನುಷ್ಕಾ ಶೆಟ್ಟಿ

ಕುಟುಂಬದೊಂದಿಗೆ ಆನಂದಿಸೋಣ

ಯುಗಾದಿ ಶುಭಾಶಯಗಳು. ನಿಮಗೂ ಹಾಗು ನಿಮ್ಮ ಕುಟುಂಬದ ಎಲ್ಲರಿಗೂ ಈ ಯುಗಾದಿಯು ಸಂತೋಷ ಹಾಗು ಸಮೃದ್ಧತೆಯನ್ನು ತರಲಿ. ನಾವೆಲ್ಲರೂ ಈ ಸಮಯವನ್ನು ಕುಟುಂಬದೊಂದಿಗೆ ಆನಂದಿಸೋಣ ಎಂದು ಅನುಷ್ಕಾ ಇನ್‌ಸ್ಟಾಗ್ರಾಂಲ್ಲಿ ಬರೆದಿದ್ದಾರೆ.

ಮನೆಯಲ್ಲಿಯೇ ಸುರಕ್ಷಿತರಾಗಿರಿ

ಹಬ್ಬದ ಶುಭಾಶಯದ ಕೋರುವುದರ ಜತೆಗೆ ಅವರು ಜನರಿಗೆ ಆರೋಗ್ಯದ ಬಗ್ಗೆ ಎಚ್ಚರಿಕೆ ವಹಿಸುವಂತೆ ಸಂದೇಶವನ್ನೂ ನೀಡಿದ್ದಾರೆ. 'ಸರಕಾರದ ಆದೇಶದಂತೆ ಎಲ್ಲರೂ ಮನೆಯಲ್ಲೇ ಇರಿ ಸುರಕ್ಷಿತವಾಗಿರಿ ಎಂದು ವಿನಂತಿಸುತ್ತೇನೆ' ಎಂಬುದಾಗಿ ಹೇಳಿದ್ದಾರೆ. ಈ ಸಂದೇಶವನ್ನು ಇಂಗ್ಲಿಷ್‌ನಲ್ಲಿ ಕೂಡ ಅವರು ಬರೆದಿದ್ದಾರೆ.

ಕನ್ನಡಿಗರಿಗೆ ಖುಷಿ ನೀಡಿದ ಪೋಸ್ಟ್

ಇನ್‌ಸ್ಟಾಗ್ರಾಂನ ಪೋಸ್ಟ್‌ನಲ್ಲಿ ಹಾಕಿಕೊಂಡಿರುವ ಫೋಟೊದಲ್ಲಿಯೂ ಕನ್ನಡದಲ್ಲಿಯೇ ಯುಗಾದಿ ಹಬ್ಬದ ಶುಭಾಶಯಗಳು ಎಂದಿದೆ. ಇದು ಕನ್ನಡಿಗರಲ್ಲಿ ಖುಷಿ ಮೂಡಿಸಿದೆ. 50 ಸಾವಿರಕ್ಕೂ ಅಧಿಕ ಮಂದಿ ಈ ಪೋಸ್ಟ್ಅನ್ನು ಮೆಚ್ಚಿಕೊಂಡಿದ್ದಾರೆ.

ಪ್ರತಿಬಾರಿಯೂ ಕನ್ನಡದಲ್ಲಿ ಹಾರೈಕೆ

ಸಾಮಾನ್ಯವಾಗಿ ರಾಜ್ಯದಲ್ಲಿ ಹುಟ್ಟಿ ಬೆಳೆದ, ಕನ್ನಡ ಸಿನಿಮಾಗಳಲ್ಲಿ ನಟಿಸುವ ಅನೇಕ ನಟ-ನಟಿಯರು ಕನ್ನಡದಲ್ಲಿ ಶುಭ ಹಾರೈಸಿದರೆ ಅಥವಾ ಸಂದೇಶ ಹಂಚಿಕೊಂಡರೆ ತಮ್ಮ ಘನತೆಗೆ ಕುಂದುಂಟಾಗುವುದೇನೋ ಎಂಬಂತೆ ಇಂಗ್ಲಿಷ್‌ನಲ್ಲಿಯೇ ಪೋಸ್ಟ್‌ಗಳನ್ನು ಹಾಕುತ್ತಾರೆ. ಅವರ ನಡುವೆ ಅನುಷ್ಕಾ, ಪ್ರತಿ ಬಾರಿಯೂ ಕನ್ನಡದಲ್ಲಿಯೇ ಸಂದೇಶ ಹಾಕುವುದು ಕನ್ನಡ ಸಿನಿಮಾ ಪ್ರೇಮಿಗಳಿಗೆ ಖುಷಿ ನೀಡುತ್ತಿದೆ.

ಕನ್ನಡತಿಯ ಪಾತ್ರದಲ್ಲಿ

ಮೈಸೂರು ಆಸ್ಥಾನದ ಸಂಗೀತ ವಿದ್ವಾಂಸರಾಗಿದ್ದ ಖ್ಯಾತ ಸಂಗೀತಗಾರ್ತಿ ಮೈಸೂರು ನಾಗರತ್ನಮ್ಮ ಅವರ ಬದುಕನ್ನು ಆಧರಿಸಿದ ಪಾತ್ರದಲ್ಲಿ ಅನುಷ್ಕಾ ನಟಿಸಲಿದ್ದಾರೆ. ಸಿಂಗೀತಂ ಶ್ರೀನಿವಾಸ್ ನಿರ್ದೇಶನದ ಈ ಚಿತ್ರದ ಮೂಲಕ ಅನುಷ್ಕಾ, ಕನ್ನಡತಿಯ ಪೋಷಾಕು ಧರಿಸುತ್ತಿದ್ದಾರೆ.

ಕಮಲ್ ಹಾಸನ್ ಜತೆ ಅನುಷ್ಕಾ

ಇದರ ಜತೆಗೆ ಅನುಷ್ಕಾ, ಕಮಲ್ ಹಾಸನ್ ಅವರೊಂದಿಗೂ ನಟಿಸಲಿದ್ದಾರೆ ಎಂದು ಹೇಳಲಾಗಿದೆ. 'ಇಂಡಿಯನ್ 2' ಚಿತ್ರದ ಬಳಿಕ ಕಮಲ್ ಹಾಸನ್ ಸಂಪೂರ್ಣವಾಗಿ ರಾಜಕೀಯಕ್ಕೆ ಕಾಲಿರಿಸಲಿದ್ದಾರೆ ಎನ್ನಲಾಗಿತ್ತು. ಆದರೆ ಅವರು ಗೌತಮ್ ವಾಸುದೇವ್ ಮೆನನ್ ಚಿತ್ರದಲ್ಲಿ ನಟಿಸಲು ಒಪ್ಪಿಕೊಂಡಿದ್ದಾರೆ. 'ವೆಟ್ಟಿಯಾಡು ವಿಲೈಯಾಡು' ಚಿತ್ರದ ಸೀಕ್ವೆಲ್‌ನಲ್ಲಿ ಕಮಲ್ ಜತೆಗೆ ಅನುಷ್ಕಾ ಶೆಟ್ಟಿ ಅಭಿನಯಿಸಲಿದ್ದಾರೆ ಎಂದು ಹೇಳಲಾಗಿದೆ.