ಮಂಡ್ಯದಲ್ಲಿ ಹೊಸ ಮನೆಗೆ ನಟಿ ರಮ್ಯಾ ಗೃಹಪ್ರವೇಶ

ಕಡೆಗೂ ಗೋಲ್ಡನ್ ಗರ್ಲ್ ರಮ್ಯಾ ಅವರು ತಮ್ಮ ಕನಸಿನ ಮನೆಗೆ ಗೃಹಪ್ರವೇಶ ಮಾಡಿದ್ದಾರೆ. ಮಂಡ್ಯದಲ್ಲಿ ಹೊಸ ಮನೆಗೆ ಶುಕ್ರವಾರ (ನ.16) ಗೃಹಪ್ರವೇಶ ಮಾಡಿದರು. ಮಂಡ್ಯದ ಕೆ.ಆರ್.ರಸ್ತೆಯಲ್ಲಿರುವ 9, 200ಚದರ ಅಡಿ ವಿಸ್ತೀರ್ಣದ ವಿಶಾಲ ಮನೆಗೆ ಅವರ ಪ್ರವೇಶವಾಗಿದೆ.

ಈ ಮೂಲಕ ರಮ್ಯಾ ಅವರು ಮಂಡ್ಯದಲ್ಲಿ ನೆಲೆಸಿ ಅಲ್ಲಿನ ಜನರಿಗೆ ಇನ್ನಷ್ಟು ಹತ್ತಿರವಾಗಬೇಕೆಂಬ ಕನಸು ನೆರವೇರಿದೆ. ಈ ಭವ್ಯವಾದ ಭಂಗಲೆ ಮಾಜಿ ಶಾಸಕ ಸಾದತ್ ಆಲಿಖಾನ್ ಅವರಿಗೆ ಸೇರಿದ್ದು ಸುಮಾರು ಐವತ್ತು ವರ್ಷಗಳಷ್ಟು ಹಿಂದೆ ನಿರ್ಮಾಣವಾಗಿದೆ. ಆದರೂ ಭಂಗಲೆ ಮಾತ್ರ ಗಟ್ಟಿಮುಟ್ಟಾಗಿದ್ದು ಸಕಲ ವ್ಯವಸ್ಥೆಗಳೂ ಇವೆ.

ಗೋಲ್ಡನ್ ಗರ್ಲ್ ರಮ್ಯಾ

ಏಳು ವರ್ಷಗಳಿಂದ ಈ ಭಂಗಲೆ ಖಾಲಿಯಾಗಿ ಉಳಿದಿತ್ತು. ಪಕ್ಕಾ ವಾಸ್ತು ಪ್ರಕಾರ ಕಟ್ಟಿರುವ ಈ ಭಂಗಲೆಯ ಆವರಣದಲ್ಲಿ ಸಾಕಷ್ಟು ಗಿಡಮರಗಳಿದ್ದು ಆಹ್ಲಾದಕರ ವಾತಾವರಣವನ್ನೂ ನಿರ್ಮಿಸಿವೆ. ಅಂದಹಾಗೆ ಈ ಭಂಗಲೆಯನ್ನು ಬಾಡಿಗೆಗೆ ತೆಗೆದುಕೊಂಡಿದ್ದಾರೋ ಅಥವಾ ಭೋಗ್ಯಕ್ಕೆ ಹಾಕಿಕೊಂಡಿದ್ದಾರಾ ಎಂಬ ಬಗ್ಗೆ ಮಾಹಿತಿ ಇಲ್ಲ.

ಆರು ತಿಂಗಳ ಮಟ್ಟಿಗೆ ಇಂತಿಷ್ಟು ಎಂದು ಹಣ ಪಾವತಿಸಿದ್ದಾರೆ ಎನ್ನಲಾಗಿದೆ. ಮುಂದಿನ ಲೋಕಸಭೆ ಚುನಾವಣೆಗೂ ರಮ್ಯಾ ಸ್ಪರ್ಧಿಸುತ್ತಿದ್ದು ಮಂಡ್ಯಗೆ ಭೇಟಿ ನೀಡಿದಾಗಲೆಲ್ಲಾ ಈ ಮನೆಗೆ ಭೇಟಿ ನೀಡಲಿದ್ದಾರೆ. ಮಂಡ್ಯದಲ್ಲಿ ಅವರ ಅಧಿಕೃತ ನಿವಾಸ ಇದು. (ಏಜೆನ್ಸೀಸ್)