'ಅಯ್ಯ 2' ಚಿತ್ರದಿಂದ ನಟಿ ವೈಶಾಲಿ ದೀಪಕ್ ಔಟ್

ಚಿರಂಜೀವಿ ಸರ್ಜಾ ಮುಖ್ಯಭೂಮಿಕೆಯಲ್ಲಿರುವ ಅಯ್ಯ 2 ಚಿತ್ರದಿಂದ ವೈಶಾಲಿ ದೀಪಕ್ ಔಟ್ ಆಗಿದ್ದಾರೆ ಸುದ್ದಿ ಹೊರಬಿದ್ದಿದೆ. ಓಂ ಪ್ರಕಾಶ್ ರಾವ್ ಆಕ್ಷನ್ ಕಟ್ ಹೇಳುತ್ತಿರುವ ಈ ಚಿತ್ರದ ಜೊತೆಗೆ ಅವರದೇ ಹುಚ್ಚ 2 ಚಿತ್ರದಲ್ಲೂ ವೈಶಾಲಿ ಅಭಿನಯಿಸುತ್ತಿದ್ದಾರೆ.

ಇತ್ತೀಚೆಗಷ್ಟೇ ಜಯನಗರದಲ್ಲಿ ಅಯ್ಯ 2 ಚಿತ್ರದ ಒಂದಷ್ಟು ಸನ್ನಿವೇಶಗಳನ್ನು ಸೆರೆಹಿಡಿಯಲಾಗಿತ್ತು. ವೈಶಾಲಿ ದೀಪಕ್ ಸೇರಿದಂತೆ ಹಲವು ಕಲಾವಿದರು ಚಿತ್ರೀಕರಣದಲ್ಲಿ ಪಾಲ್ಗೊಂಡಿದ್ದರು. ಆದರೆ ಇದೀಗ ಏನಾಯಿತೋ ಏನೋ ವೈಶಾಲಿ ಚಿತ್ರದಿಂದ ಹೊರಬಿದ್ದಿದ್ದಾರೆ.

ವೈಶಾಲಿ ಅವರು ಇಂಗ್ಲಿಷ್ ರಂಗಭೂಮಿ ಹಿನ್ನೆಲೆಯಿಂದ ಬಂದವರು. ಕ್ರೈಸ್ಟ್ ಕಾಲೇಜು ಹುಡುಗಿ. ಚಿತ್ರದ ನಿರ್ದೇಶಕ ಓಂ ಹಾಗೂ ವೈಶಾಲಿ ನಡುವೆ ಹೊಂದಾಣಿಕೆ ಕೊರತೆಯಿಂದ ಹೀಗಾಗಿದೆ ಎನ್ನುತ್ತವೆ ಮೂಲಗಳು.

ಅದೇನೇ ಇರಲಿ ವೈಶಾಲಿ ಜಾಗಕ್ಕೆ ಓಂ ಮತ್ತೊಬ್ಬ ಬೆಡಗಿಯನ್ನು ಆಯ್ಕೆ ಮಾಡಿದ್ದಾರೆ. ಆಕೆಯ ಹೆಸರು ಐಶ್ವರ್ಯಾ ದೇವನ್. ಹಾಸ್ಯನಟ ಶರಣ್ ಅವರ ಶ್ರೀಮತಿ ಜಯಲಲಿತಾ ಚಿತ್ರದಲ್ಲಿ ಇವರು ಅಭಿನಯಿಸುತ್ತಿದ್ದಾರೆ. ಒಟ್ಟಿನಲ್ಲಿ ಓಂ ಚಿತ್ರದಿಂದ ನಾಯಕಿಯರು ಹೊರಬೀಳುವುದು ಹೊಸತಲ್ಲ ಬಿಡಿ ಎಂದು ಗಾಂಧಿನಗರ ಮುಗುಮ್ಮಾಗಿದೆ.