ಚಾಲೆಂಜಿಂಗ್ ಸ್ಟಾರ್ ಗೆ ಹಾರ್ಲೆ ಡೇವಿಡ್ಸನ್ ಉಡುಗೊರೆ

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಮತ್ತೊಮ್ಮೆ ಗೆಲುವಿನ ಅಲೆಯಲ್ಲಿ ತೇಲಾಡಿದ್ದಾರೆ. ಅವರ ಅಭಿನಯದ 'ಬುಲ್ ಬುಲ್' ಚಿತ್ರ ಅರ್ಧ ಸೆಂಚುರಿ ಪೂರೈಸಿದೆ. ಇದೇ ಖುಷಿಯಲ್ಲಿರುವ ಚಿತ್ರದ ನಿರ್ಮಾಪಕರು ಅವರಿಗೆ ಒಂದು ಸಣ್ಣ ಉಡುಗೊರೆಯನ್ನು ಕೊಡಲು ಮುಂದಾಗಿದ್ದಾರೆ.

ಸುಮಾರು ರು.20 ಲಕ್ಷ ಬೆಲೆ ಬಾಳುವ ಹಾರ್ಲೆ ಡೇವಿಡ್ಸನ್ ಬೈಕನ್ನು ಗಿಫ್ಟ್ ಕೊಡಲಿದ್ದಾರೆ ನಿರ್ಮಾಪಕರು. 'ಬುಲ್ ಬುಲ್' ಚಿತ್ರವನ್ನು ವಿ.ಹರಿಕೃಷ್ಣ, ಎಂಡಿ ಶ್ರೀಧರ್, ಕೃಷ್ಣಕುಮಾರ್, ಕವಿರಾಜ್ ಹಾಗೂ ದಿನಕರ್ ತೂಗುದೀಪ ಅವರು ಸೇರಿ ನಿರ್ಮಿಸಿದ್ದರು.

ಬೃಂದಾವನ ಗ್ಯಾಲರಿ

ಇದೇ ಜುಲೈ 12ರಂದು ನಡೆಯುವ 'ಬುಲ್ ಬುಲ್' ಐವತ್ತನೇ ದಿನದ ಸಂಭ್ರಮದಲ್ಲಿ ಈ ಬೈಕ್ ಕೀ ದರ್ಶನ್ ಕೈಗೆ ನೀಡಲಿದ್ದಾರೆ. ಕ್ರೂಸರ್ ಬೈಕ್ಸ್ ಗಳ ಅತಿದೊಡ್ಡ ಅಭಿಮಾನಿಯಾಗಿರುವ ದರ್ಶನ್ ಅವರ ಗ್ಯಾರೇಜ್ ನಲ್ಲಿ ಇಂಟ್ರೂಡರ್ ಹಾಗೂ ಹಯಬುಸದಂತಹ ದುಬಾರಿ ಬೈಕ್ ಗಳು ಇವೆ.

ಈ ಹಿಂದೆ ದರ್ಶನ್ ಗೆ ಅವರ ಪತ್ನಿ ವಿಜಯಲಕ್ಷ್ಮಿ ಐಶಾರಾಮಿ ಜಾಗ್ವಾರ್ ಕಾರನ್ನು ಉಡುಗೊರೆಯಾಗಿ ನೀಡಿದ್ದರು. ಇಷ್ಟಕ್ಕೂ ದರ್ಶನ್ ಗೆ ಟೂ ವ್ಹೀಲರ್ ಏನೋ ಗಿಫ್ಟ್ ಆಗಿ ಸಿಗುತ್ತಿದೆ. ಆದರೆ ಅದರಲ್ಲಿ ಹೆಂಡತಿ ಮಕ್ಕಳನ್ನು ಕೂರಿಸಿಕೊಂಡು ತಿರುಗಾಡಲು ಸಾಧ್ಯವಾಗುತ್ತದೆಯೇ? ಎಂಬ ಪ್ರಶ್ನೆ ಅಭಿಮಾನಿಗಳದು. (ಏಜೆನ್ಸೀಸ್)