'ಯುವರತ್ನ' ಚಿತ್ರಕ್ಕೆ ಈ ನಟಿಯನ್ನೇ ಹೀರೋಯಿನ್ ಮಾಡಿ: ಫ್ಯಾನ್ಸ್ ಒತ್ತಾಯ

ಯುವರತ್ನಕ್ಕೆ ಸಾಥ್ ಕೊಡಲಿ ಅನುಪಮಾ

ನಟಸಾರ್ವಭೌಮ ಚಿತ್ರದಲ್ಲಿ ಪುನೀತ್ ರಾಜ್ ಕುಮಾರ್ ಜೊತೆ ನಟಿಸಿರುವ ಅನುಪಮಾ ಪರಮೇಶ್ವರನ್ ಅವರು, ಯುವರತ್ನ ಚಿತ್ರಕ್ಕೆ ನಾಯಕಿಯಾಗಲಿ ಎಂದು ಅಪ್ಪು ಅಭಿಮಾನಿಗಳು ಒತ್ತಾಯ ಮಾಡ್ತಿದ್ದಾರೆ.

ಅಪ್ಪು-ಅನುಪಮಾ ಜೋಡಿ ಸೂಪರ್

ನಟಸಾರ್ವಭೌಮ ಚಿತ್ರದ ಸೆಕೆಂಡ್ ಹಾಫ್ ನಲ್ಲಿ ಬರುವ ಅನುಪಮಾ ತಮ್ಮ ಮುದ್ದಾದ ನಟನೆ ಮತ್ತು ನೋಟದ ಮೂಲಕ ಕನ್ನಡ ಪ್ರೇಕ್ಷಕರ ಮನಸ್ಸು ಕದ್ದಿದ್ದು, ಅಪ್ಪು ಮತ್ತು ಅನುಪಮಾ ಜೋಡಿಗೆ ಕ್ಲೀನ್ ಬೋಲ್ಡ್ ಆಗಿದ್ದಾರೆ. ಪುನೀತ್ ಗೆ ಅನುಪಮಾ ಅತ್ಯುತ್ತಮ ಜೋಡಿ, ಹಾಗಾಗಿ ಯುವರತ್ನ ಚಿತ್ರದಲ್ಲಿ ಇವರನ್ನೇ ನಾಯಕಿಯನ್ನಾಗಿಸಿ ಎಂದು ಬೇಡಿಕೆ ಇಡ್ತಿದ್ದಾರೆ.

ಸಾಧ್ಯತೆ ಇದೆಯಾ?

ಯುವರತ್ನ ಚಿತ್ರತಂಡ ಇನ್ನು ಐದಾರು ದಿನದಲ್ಲಿ ಚಿತ್ರೀಕರಣ ಶುರು ಮಾಡಲಿದ್ದಾರೆ. ಹಾಗ್ನೋಡಿದ್ರೆ, ಇಷ್ಟೋತ್ತಿಗಾಗಲೇ ಹೀರೋಯಿನ್ ಯಾರು ಎಂದು ಆಯ್ಕೆ ಮಾಡಿಕೊಂಡಿರಬಹುದು. ಒಂದು ವೇಳೆ ನಾಯಕಿಯ ಆಯ್ಕೆ ಅಂತಿಮವಾಗಿಲ್ಲ ಅಂದ್ರೆ, ಅಭಿಮಾನಿಗಳ ಒತ್ತಾಯಕ್ಕೆ ಮಣಿದು ಅನುಪಮಾ ಪರಮೇಶ್ವರನ್ ಅವರನ್ನ ಕರೆತರ್ತಾರಾ ಕಾದುನೋಡಬೇಕು.

ತಮನ್ನಾ ಅಥವಾ ಕನ್ನಡ ನಟಿ?

ಈ ಹಿಂದೆ ಇದೇ ವಿಚಾರವಾಗಿ ಸುದ್ದಿಯಾದಾಗ ಬಹುಭಾಷೆ ನಟಿ ತಮನ್ನಾ ಹೆಸರು ಜೋರಾಗಿ ಕೇಳಿ ಬಂದಿತ್ತು. ಯಾಕಂದ್ರೆ, ಪುನೀತ್ ಜೊತೆಯಲ್ಲಿ ಜಾಹೀರಾತು ಮಾಡಿದ್ದ ತಮನ್ನಾ ಸಿನಿಮಾ ಕೂಡ ಮಾಡಬಹುದು ಎನ್ನಲಾಗಿತ್ತು. ಅಥವಾ ಕನ್ನಡದ ನಟಿಯೇ ನಾಯಕಿಯಾಗಲಿ ಎಂದು ಕೂಡ ಅಭಿಪ್ರಾಯ ಪಟ್ಟವರು ಇದ್ದಾರೆ. ಇಷ್ಟೆಲ್ಲಾ ಬೆಳವಣಿಗೆಯ ಮಧ್ಯೆ ಈಗ ಅನುಪಮಾ ಹೆಸರು ಸೇರಿಕೊಂಡಿದೆ.