ಸರ್ವಂ 'ಕಾಂತಾರ'ಮಯಂ: ಬರೆದಿಟ್ಟುಕೊಳ್ಳಿ ದೀಪಾವಳಿಗೂ ಪಟಾಕಿ ಹೊಡೆಯೋದು ರಿಷಬ್ ಶೆಟ್ಟಿನೇ!

ಸರ್ವಂ 'ಕಾಂತಾರ'ಮಯಂ

'ಪೊನ್ನಿಯನ್ ಸೆಲ್ವನ್' ಸೇರಿದಂತೆ ಒಂದಷ್ಟು ಸಿನಿಮಾಗಳು 'ಕಾಂತಾರ' ಜೊತೆಗೆ ಬಿಡುಗಡೆ ಆಗಿದ್ದವು. ನಂತರ 'ಗುಡ್‌ಬೈ' ಸೇರಿದಂತೆ ಇನ್ನೊಂದಷ್ಟು ಸಿನಿಮಾಗಳು ಬಂದವು. ಆದರೆ ಅವೆಲ್ಲವನ್ನು ಪ್ರೇಕ್ಷಕರು ಮರೆತುಬಿಟ್ಟಿದ್ದಾರೆ. ಸಣ್ಣ ಬಜೆಟ್‌ನ ರಿಷಬ್ ಶೆಟ್ಟಿ ಸಿನಿಮಾ ಬಗ್ಗೆ ಎಲ್ಲರೂ ಮಾತನಾಡುತ್ತಿದ್ದಾರೆ. ಸಿನಿಮಾ ಈಗಾಗಲೇ ವಿಶ್ವದಾದ್ಯಂತ 150 ಕೋಟಿ ರೂ.ಗೂ ಅಧಿಕ ಕಲೆಕ್ಷನ್ ಮಾಡಿ ದಾಖಲೆ ಬರೆದಿದೆ. ಕೆಲವೆಡೆ ಸಿನಿಮಾ ಕಲೆಕ್ಷನ್ ನಿರ್ಮಾಪಕರಿಗೆ ಅಚ್ಚರಿ ತಂದಿದೆ. ಬಾಕ್ಸಾಫೀಸ್ ಗಳಿಕೆ ಮಾತ್ರವಲ್ಲ ಜನರ ಮನಸ್ಸನ್ನು ಕೂಡ ಸಿನಿಮಾ ಗೆದ್ದಿದೆ.

₹11 ಕೋಟಿ ಬಾಚಿದ ಹಿಂದಿ ವರ್ಷನ್

ಬಾಲಿವುಡ್ ಅಂಗಳದಲ್ಲಿ 'ಕಾಂತಾರ' ಸಿನಿಮಾ ಕಲೆಕ್ಷನ್ ಜೋರಾಗಿದೆ. ಅಕ್ಟೋಬರ್ 14ರಂದು ತೆರೆಕಂಡಿದ್ದ ಸಿನಿಮಾ ಪ್ರೇಕ್ಷಕರ ಮನಗೆದ್ದಿದೆ. ಅವರದ್ದೇ ಭಾಷೆಯಲ್ಲಿ ಮತ್ತಷ್ಟು ಹತ್ತಿರವಾಗಿದೆ. 6 ದಿನಕ್ಕೆ 11 ಕೋಟಿ ರೂ.ಗೂ ಅಧಿಕ ಗಳಿಕೆ ಮಾಡಿ ಸೂಪರ್ ಹಿಟ್ ಲಿಸ್ಟ್ ಸೇರಿಕೊಂಡಿದೆ. ಕಳೆದ ವಾರ ತೆರೆಕಂಡ 'ಡಾಕ್ಟರ್ ಜಿ' ಚಿತ್ರಕ್ಕೂ ಪೈಪೋಟಿ ಕೊಟ್ಟಿದೆ. 'ಕಾಂತಾರ' ಎದುರು ರಶ್ಮಿಕಾ ಮಂದಣ್ಣ ನಟನೆಯ 'ಗುಡ್‌ಬೈ' ಸಿನಿಮಾ ಕಳೆದೇ ಹೋಯಿತು. ವಾರದ ದಿನಗಳಲ್ಲೇ ಸಿನಿಮಾ ಹೌಸ್‌ಫುಲ್ ಪ್ರದರ್ಶನ ಕಾಣ್ತಿದೆ. ಇನ್ನು ದೀಪಾವಳಿ ವೀಕೆಂಡ್‌ನಲ್ಲಿ ಸಿನಿಮಾ ಮತ್ತಷ್ಟು ಸದ್ದು ಮಾಡುವ ಸುಳಿವು ಸಿಕ್ತಿದೆ.

ಆಂಧ್ರ, ತೆಲಂಗಾಣದಲ್ಲಿ ₹19 ಕೋಟಿ ಗಳಿಕೆ

ಬರೀ ಹಿಂದಿ ಬೆಲ್ಟ್ ಅಷ್ಟೇ ಅಲ್ಲ, ಆಂಧ್ರ, ತೆಲಂಗಾಣದಲ್ಲಿ ತೆಲುಗು ವರ್ಷನ್ ಕೂಡ ಹಿಟ್ ಆಗಿದೆ. ದೊಡ್ಡಮಟ್ಟದಲ್ಲಿ ತೆಲುಗು ಪ್ರೇಕ್ಷಕರು ಸಿನಿಮಾ ನೋಡಲು ಬರ್ತಿದ್ದಾರೆ. 4 ದಿನದ 'ಕಾಂತಾರ' ತೆಲುಗು ವರ್ಷನ್ ಕಲೆಕ್ಷನ್ ನೋಡಿ ರಿಷಬ್ ಶೆಟ್ಟಿ ಕೂಡ ಶಾಕ್ ಆಗಿದ್ದಾರೆ. ಈಗಾಗಲೇ 19 ಕೋಟಿ ರೂ.ಗೂ ಅಧಿಕ ಗ್ರಾಸ್ ಕಲೆಕ್ಷನ್ ಮಾಡಿ ಸಿನಿಮಾ ನಾಗಾಲೋಟ ಮುಂದುವರೆಸಿದೆ. ದೀಪಾವಳಿ ವೀಕೆಂಡ್ ತೆಲುಗು ರಾಜ್ಯಗಳಲ್ಲೂ ಚಿತ್ರಕ್ಕೆ ಪ್ಲಸ್ ಆಗಲಿದೆ.

ದೀಪಾವಳಿಗೂ ಪಟಾಕಿ ಹೊಡೆಯೋದು ರಿಷಬ್

ಈ ವಾರ ಹಾಗೂ ಮುಂದಿನ ವಾರ ದೀಪಾವಳಿ ಸಂಭ್ರಮದಲ್ಲಿ ಸಾಲು ಸಾಲು ಸಿನಿಮಾಗಳು ರಿಲೀಸ್ ಆಗುತ್ತಿದೆ. ಕನ್ನಡದಲ್ಲಿ ಡಾಲಿ ಧನಂಜಯ ನಟನೆಯ 'ಹೆಡ್‌ಬುಷ್', ತಮಿಳು-ತೆಲುಗಿನಲ್ಲಿ ಕಾರ್ತಿ ನಟನೆಯ 'ಸರ್ದಾರ್', ಬಾಲಿವುಡ್‌ನಲ್ಲಿ ಅಕ್ಷಯ್ ಕುಮಾರ್ ನಟನೆಯ 'ರಾಮ್‌ಸೇತು', ಅಜಯ್ ದೇವಗನ್ ಲೀಡ್ ರೋಲ್‌ನಲ್ಲಿ ಮಿಂಚಿರುವ 'ಥ್ಯಾಂಕ್ ಗಾಡ್' ಸಿನಿಮಾ ಪ್ರೇಕ್ಷಕರ ಮುಂದೆ ಬರ್ತಿದೆ. ಆದರೆ ಸದ್ಯ ಯಾವುದೇ ಸಿನಿಮಾ ಬಗ್ಗೆ ಬಝ್ ಕ್ರಿಯೇಟ್ ಆಗಿಲ್ಲ. 'ಕಾಂತಾರ' ಬಜಾರ್‌ನಲ್ಲಿ ಬೇರೆ ಮಾತಿಲ್ಲ. ಸದ್ಯ 'ಕಾಂತಾರ' ಚಿತ್ರಕ್ಕೆ ಸಿಕ್ಕಿರುವ ಥಿಯೇಟರ್‌ಗಳನ್ನು ಯಾರು ಮುಟ್ಟೋಕು ಸಾಧ್ಯವಿಲ್ಲ. ಇನ್ನು ಎರಡು ವಾರ ವಿಶ್ವದಾದ್ಯಂತ ರಿಷಬ್ ಶೆಟ್ಟಿ ಚಿತ್ರಕ್ಕೆ ಪೈಪೋಟಿನೇ ಇಲ್ಲ.