ಕೇರಳದಲ್ಲೇ 'ಕಾಂತಾರ' ಬಜೆಟ್ ವಾಪಸ್: ಭಾರೀ ಮೊತ್ತಕ್ಕೆ ತೆಲುಗು, ಮಲಯಾಳಂ ಸ್ಯಾಟಲೈಟ್ ರೈಟ್ಸ್ ಮಾರಾಟ!

ಕೇರಳದಲ್ಲಿ 17 ಕೋಟಿ ಕಲೆಕ್ಷನ್

ಕನ್ನಡ, ಹಿಂದಿ, ತೆಲುಗು, ತಮಿಳು ನಂತರ ಕೊನೆಯದಾಗಿ 'ಕಾಂತಾರ' ಮಲಯಾಳಂ ವರ್ಷನ್ ತೆರೆಗಪ್ಪಳಿಸಿತ್ತು. ಮೊದಲ ದಿನದಿಂದಲೂ ಮಲಯಾಳಂ ಪ್ರೇಕ್ಷಕರು ಸಿನಿಮಾ ನೋಡಲು ಮುಗಿಬಿದ್ದಿದ್ದರು. ಸದ್ಯ 26 ದಿನಕ್ಕೆ ಸಿನಿಮಾ ಅಂದಾಜು 17 ಕೋಟಿ ಕಲೆಕ್ಷನ್ ಮಾಡಿದೆ ಎನ್ನಲಾಗ್ತಿದೆ. 12 ರಿಂದ 13 ಕೋಟಿ ಬಜೆಟ್‌ನಲ್ಲಿ ಚಿತ್ರ ನಿರ್ಮಾಣವಾಗಿತ್ತು. ಬರೀ ಕೇರಳ ಬಾಕ್ಸಾಫೀಸ್‌ನಲ್ಲೇ ಆ ಮೊತ್ತ ವಾಪಸ್ ಬಂದಂತಾಗಿದೆ. ಕೇರಳದಲ್ಲಿ 'KGF' ಚಾಪ್ಟರ್ 1 ದಾಖಲೆಯನ್ನು ಅಳಿಸಿ 'ಕಾಂತಾರ' ಮುನ್ನುಗ್ಗುತ್ತಿದೆ.

ಸ್ಯಾಟಲೈಟ್ ರೈಟ್ಸ್‌ಗೆ ಡಿಮ್ಯಾಂಡ್

ಥಿಯೇಟರ್‌ಗಳಲ್ಲಿ 'ಕಾಂತಾರ' ಸಿನಿಮಾ ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಿದೆ. ಆದರೆ ಸಿನಿಮಾ ಓಟಿಟಿಗೆ ಯಾವಾಗ ಬರುತ್ತೆ? ಟಿವಿಗೆ ಬರೋದು ಯಾವಾಗ ? ಎನ್ನುವ ಚರ್ಚೆ ಶುರುವಾಗಿದೆ. ಏಷಿಯಾನೆಟ್ ಸಂಸ್ಥೆ ಮಲಯಾಳಂ ವರ್ಷನ್ ಟಿವಿ ರೈಟ್ಸ್ ಕೊಂಡುಕೊಂಡಿದೆ ಎನ್ನಲಾಗ್ತಿದೆ. ಇನ್ನು ತೆಲುಗು ವರ್ಷನ್‌ ಕೂಡ ದಾಖಲೆ ಬೆಲೆಗೆ ಮಾರಾಟ ಮಾಡಿರುವ ಸುಳಿವು ಸಿಗುತ್ತಿದೆ. ಇದೇ ವಿಚಾರ ಈಗ ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ಚರ್ಚೆ ಹುಟ್ಟಾಕ್ಕಿದೆ.

ತೆಲುಗು ರಾಜ್ಯಗಳಲ್ಲಿ 45 ಕೋಟಿ ಗಳಿಕೆ

ಪಕ್ಕದ ಆಂಧ್ರ, ತೆಲಂಗಾಣದಲ್ಲೂ ಸಿನಿಮಾ ಭಾರೀ ಸದ್ದು ಮಾಡ್ತಿದೆ. 30 ದಿನಕ್ಕೆ 45 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿರೋ ಸಿನಿಮಾ 25 ಕೋಟಿ ಶೇರ್ ತಂದುಕೊಟ್ಟಿರುವ ಲೆಕ್ಕಾಚಾರ ನಡೀತಿದೆ. ತೆಲುಗು ಸ್ಯಾಟಲೈಟ್ ರೈಟ್ಸ್ 4.5 ಕೋಟಿಗೆ ಮಾರಾಟವಾಗಿದೆ ಎನ್ನುವ ಗುಸುಗುಸು ಶುರುವಾಗಿದೆ. ಸಿನಿಮಾ ಕ್ರೇಜ್ ನೋಡಿ ಮನರಂಜನೆ ವಾಹಿನಿಗಳು ಸಿನಿಮಾ ರೈಟ್ಸ್‌ಗಾಗಿ ಮುಗಿಬಿದ್ದಿವೆ.

'ಕಾಂತಾರ' ಸದ್ಯಕ್ಕೆ ಓಟಿಟಿಗೆ ಬರಲ್ಲ

ಇತ್ತೀಚಿನ ದಿನಗಳಲ್ಲಿ ಯಾವುದೇ ಸಿನಿಮಾ ಆದರೂ ರಿಲೀಸ್ ಆದ 48 ದಿನಗಳ ನಂತರ ಓಟಿಟಿಗೆ ಬರುತ್ತದೆ. ಆ ಲೆಕ್ಕಾಚಾರದಲ್ಲಿ ಇದೇ ಶುಕ್ರವಾರ 'ಕಾಂತಾರ' ಡಿಜಿಟಲ್‌ ಫ್ಲಾಟ್‌ಫಾರ್ಮ್‌ನಲ್ಲಿ ಸ್ಟ್ರೀಮಿಂಗ್ ಆಗುತ್ತದೆ ಎನ್ನುವ ಚರ್ಚೆ ನಡೀತಿದೆ. ಆದರೆ ಯಾವುದೇ ಕಾರಣಕ್ಕೂ ಸಿನಿಮಾ ಈಗಲೇ ಓಟಿಟಿಗೆ ಬರುವುದಿಲ್ಲ. 46 ದಿನವಾದರೂ ಥಿಯೇಟರ್‌ಗಳಲ್ಲಿ ಹೌಸ್‌ಫುಲ್ ಆಗುತ್ತಿರುವ ಚಿತ್ರವನ್ನು ಈಗಲೇ ಸ್ಮಾಲ್‌ ಸ್ಕ್ರೀನ್‌ಗೆ ತರೋದು ಅನುಮಾನ. ಈವರೆಗೆ ಅಫೀಷಿಯಲ್ ಓಟಿಟಿ ರಿಲೀಸ್ ಡೇಟ್ ಕೂಡ ಘೋಷಣೆ ಆಗಿಲ್ಲ.