ಕೆಜಿಎಫ್ 2 ಕಲೆಕ್ಷನ್‌ನಲ್ಲಿ 400 ಕೋಟಿ ಏರಿಕೆ; 200 ಕೋಟಿ ಕ್ಲಬ್ ಸೇರಿದ ಜೇಮ್ಸ್, ವಿಕ್ರಾಂತ್ ರೋಣ! ಹೇಗೆ ಸಾಧ್ಯ?

ಡಿಜಿಟಲ್, ಸ್ಯಾಟಲೈಟ್ ಹಕ್ಕು ಸೇರಿ ನೂರು ಕೋಟಿ!

ಈ ರೀತಿಯ ಪ್ರಶ್ನೆಗಳು ಹುಟ್ಟಿಕೊಂಡ ಬೆನ್ನಲ್ಲೇ ಚಿತ್ರದ ಓಟಿಟಿ, ಟಿವಿ ಪ್ರಸಾರದ ಹಕ್ಕುಗಳು ಮತ್ತು ಚಿತ್ರ ಚಿತ್ರಮಂದಿರಗಳಲ್ಲಿ ಮಾಡಿದ ಕಲೆಕ್ಷನ್ ಸೇರಿ ಒಟ್ಟು ನೂರು ಕೋಟಿ ಗಳಿಸಿದೆ, ಹೀಗೆ ನೂರು ಕೋಟಿ ಕ್ಲಬ್ ಅನ್ನು ಕ್ರಾಂತಿ ಚಿತ್ರ ಸೇರಿದೆ ಎಂಬ ಸ್ಪಷ್ಟನೆ ಹೊರಬಿತ್ತು. ಕ್ರಾಂತಿ ಚಿತ್ರತಂಡ ಸಕ್ಸಸ್ ಮೀಟ್ ಮಾಡಿ ಇದರಲ್ಲಿ ನೂರು ಕೋಟಿ ಕ್ಲಬ್ ಸೇರಿದ ಕಾರಣಕ್ಕಾಗಿ ಕೇಕ್ ಕತ್ತರಿಸಿ ಸಂಭ್ರಮಿಸಿತು.

ಕೆಜಿಎಫ್ 2 ಗಳಿಕೆಗೆ 400+ ಕೋಟಿ ಸೇರ್ಪಡೆ

ಇನ್ನು ಕ್ರಾಂತಿ ಚಿತ್ರದ ಹಾಗೆ ಈ ಹಿಂದೆ ಬಾಕ್ಸ್ ಆಫೀಸ್‌ನಲ್ಲಿ ಒಳ್ಳೆಯ ಗಳಿಕೆ ಮಾಡಿದ್ದ ಕನ್ನಡ ಚಿತ್ರಗಳಿಗೆ ಅವುಗಳ ಓಟಿಟಿ ಹಾಗೂ ಡಿಜಿಟಲ್ ಹಕ್ಕುಗಳನ್ನು ಸೇರಿಸಿದರೆ ಅವುಗಳ ಮೊತ್ತ ಸಹ ಹೆಚ್ಚಲಿದೆ ಎಂಬ ಚರ್ಚೆ ಇದೀಗ ಆರಂಭವಾಗಿದ್ದು, ಈ ಪ್ರಕಾರ ಕೆಜಿಎಫ್ ಚಾಪ್ಟರ್ 2 ಚಿತ್ರದ ಗಳಿಕೆಯಲ್ಲಿಯೇ ಬರೋಬ್ಬರಿ 400 ಕೋಟಿ ಏರಿಕೆಯಾಗಲಿದೆ. ಹೌದು, ಬಾಕ್ಸ್ ಆಫೀಸ್‌ನಲ್ಲಿ 1250 ಕೋಟಿ ರೂಪಾಯಿಗಳನ್ನು ಗಳಿಕೆ ಮಾಡಿದ್ದ ಕೆಜಿಎಫ್ ಚಾಪ್ಟರ್ 2 ಚಿತ್ರದ ಓಟಿಟಿ ಹಕ್ಕು 320 ಕೋಟಿ ಹಾಗೂ ಎಲ್ಲಾ ಭಾಷೆಯ ಟಿವಿ ಹಕ್ಕು 100 ಕೋಟಿ ಇದ್ದು, ಇವುಗಳನ್ನೆಲ್ಲಾ ಸೇರಿಸಿದರೆ ಚಿತ್ರದ ಒಟ್ಟು ಗಳಿಕೆ 1670 ಕೋಟಿ ರೂಪಾಯಿಗಳಾಗಲಿದೆ.

ಇನ್ನೂರು ಕೋಟಿ ಕ್ಲಬ್ ಸೇರಿದ ಜೇಮ್ಸ್, ವಿಕ್ರಾಂತ್ ರೋಣ!

ಹೀಗೆ ಈ ವಿಧಾನದ ಪ್ರಕಾರ ಕೆಜಿಎಫ್ ಚಾಪ್ಟರ್ 2 ಚಿತ್ರದ ಗಳಿಕೆಯಲ್ಲಿ 400+ ಕೋಟಿ ಏರಿಕೆಯಾದರೆ, ಚಿತ್ರಮಂದಿರದಲ್ಲಿ 180 ಕೋಟಿ ಗಳಿಸಿದ್ದ ವಿಕ್ರಾಂತ್ ರೋಣ ಚಿತ್ರದ ಡಿಜಿಟಲ್ ಹಾಗೂ ಸ್ಯಾಟಲೈಟ್ ಹಕ್ಕು 24 ಕೋಟಿ ರೂಪಾಯಿಗಳಿದ್ದು, ಈ ಚಿತ್ರದ ಒಟ್ಟು ಗಳಿಕೆ 204 ಕೋಟಿ ರೂಪಾಯಿಗಳಾಗಲಿದೆ ಹಾಗೂ ಬಾಕ್ಸ್ ಆಫೀಸ್‌ನಲ್ಲಿ 159 ಕೋಟಿ ರೂಪಾಯಿ ಗಳಿಸಿದ್ದ ಜೇಮ್ಸ್ ಚಿತ್ರದ ಓಟಿಟಿ ಹಕ್ಕು 40 ಕೋಟಿ ಮತ್ತು ಸ್ಯಾಟಲೈಟ್ ಹಕ್ಕು 15 ಕೋಟಿ ಇದ್ದು, ಇವೆಲ್ಲಾ ಸೇರಿದರೆ ಜೇಮ್ಸ್ ಒಟ್ಟು ಗಳಿಕೆ 214 ಕೋಟಿಯಾಗಲಿದೆ. ಈ ಮೂಲಕ ವಿಕ್ರಾಂತ್ ರೋಣ ಹಾಗೂ ಜೇಮ್ಸ್ ಇನ್ನೂರು ಕೋಟಿ ಕಲೆಕ್ಷನ್ ಮಾಡಿದಂತಾಗಲಿದೆ.