ರಾಜಕಾರಣಿ ಮಗ ಅನ್ನೋದನ್ನು ಬಿಡು, ಮೊದಲು ಕನ್ನಡ ಕಲಿ ಇಲ್ಲಾಂದ್ರೆ ಬೆಳೆಯಲ್ಲ; ಝೈದ್ ಖಾನ್‌ಗೆ ಯಶ್ ಕ್ಲಾಸ್!

'ರಾಜಕಾರಣಿ ಮಗ ಅನ್ನೋದನ್ನು ಬಿಟ್ಟು ಹೊರಗೆ ಬಾ'

ಫಿಲ್ಮಾಗ್ರಫಿ ಎಂಬ ಕನ್ನಡದ ಯೂಟ್ಯೂಬ್ ಚಾನೆಲ್ ನಡೆಸಿದ ಸಂದರ್ಶನದಲ್ಲಿ ಪಾಲ್ಗೊಂಡಿದ್ದ ಝೈದ್ ಖಾನ್‌ ನಟ ಯಶ್ ತನಗೆ ನೀಡಿದ್ದ ಸಲಹೆಯನ್ನು ಬಿಚ್ಚಿಟ್ಟರು. 'ಚಿತ್ರದ ಕತೆ ಆಯ್ಕೆಯ ಸಮಯದಲ್ಲಿ ಭೇಟಿಯಾಗಿದ್ದಾಗ ಯಶ್ ಸರ್ ಅವರು ನನಗೆ ಕ್ಲಿಯರ್ ಆಗಿ ಹೇಳಿದರು. ನೋಡು ಇದು ಆಟ ಅಲ್ಲ, ತುಂಬಾ ಸೀರಿಯಸ್ ಆಗಿ ಮಾಡಬೇಕು. ನೀನು ಪೊಲಿಟೀಷಿಯನ್ ಮಗ, ಲಕ್ಷುರಿಯಸ್ ಲೈಫ್ ಇದೆಲ್ಲವನ್ನೂ ಬಿಟ್ಟು ಆಚೆ ಬರಬೇಕು ಇಲ್ಲಾಂದ್ರೆ ನೀನು ಇಲ್ಲಿ ಯಾವುದೇ ಸಾಧನೆಯನ್ನು ಸಹ ಮಾಡಲಾಗುವುದಿಲ್ಲ' ಎಂದು ದೊಡ್ಡ ಸಲಹೆಯೊಂದನ್ನು ನೀಡಿದ್ದರು ಎಂಬುದನ್ನು ಝೈದ್ ಖಾನ್ ಬಿಚ್ಚಿಟ್ಟರು.

ಕನ್ನಡ ಕಲಿ ಎಂದಿದ್ರು!

ಮುಂದುವರಿದು ಮಾತನಾಡಿದ ಝೈದ್ ಖಾನ್ 'ಯಶ್ ಅವರನ್ನು ಅಂದು ಭೇಟಿ ಮಾಡಿದ್ದ ಸಂದರ್ಭದಲ್ಲಿ ನನಗೆ ಇಷ್ಟು ಸ್ಪಷ್ಟವಾಗಿ ಕನ್ನಡ ಬರುತ್ತಿರಲಿಲ್ಲ. ಕನ್ನಡ ಬರುತ್ತಿತ್ತು ಆದರೆ ಉಚ್ಚಾರಣೆ ಮತ್ತು ವ್ಯಾಕರಣದಲ್ಲಿ ತಪ್ಪು ಮಾಡುತ್ತಿದ್ದೆ. ಇದನ್ನು ಗಮನಿಸಿದ ಯಶ್ ಸರ್ ದಿನಾ ಪೇಪರ್ ಓದು ಆದಷ್ಟು ಕನ್ನಡದಲ್ಲಿ ಮಾತನಾಡಿ ಕನ್ನಡ ಕಲಿತುಕೋ, ಇಲ್ಲವೆಂದರೆ ಕನ್ನಡ ಚಿತ್ರರಂಗದಲ್ಲಿ ನಿನಗೆ ಭವಿಷ್ಯವಿಲ್ಲ ಎಂದು ಸಲಹೆ ನೀಡಿದರು' ಎಂದು ಮುಕ್ತವಾಗಿ ಮಾತನಾಡಿದರು.

ಇದು ನೆಗೆಟಿವ್ ಅಲ್ಲ ಪಾಸಿಟಿವ್..

ಇನ್ನು ಯಶ್ ಈ ರೀತಿ ತನಗೆ ಸಲಹೆ ನೀಡಿದ್ದನ್ನು ನೆಗೆಟಿವ್ ಎಂದು ತಾನು ತೆಗೆದುಕೊಳ್ಳಲೇ ಇಲ್ಲ, ಬದಲಾಗಿ ಅದನ್ನು ಪಾಸಿಟಿವ್ ಆಗಿ ತೆಗೆದುಕೊಂಡೆ ಎಂದು ಝೈದ್ ಖಾನ್ ಹೇಳಿದರು. ಯಶ್ ಅವರು ಈ ರೀತಿ ಸಲಹೆ ನೀಡುತ್ತಿದ್ದಂತೆ ತಾನು ಗೌರಿ ದತ್ ಎಂಬುವವರ ಬಳಿ 9 ತಿಂಗಳು ಕನ್ನಡ ಅಭ್ಯಾಸ ನಡೆಸಿದ್ದಾಗಿ ಹೇಳಿಕೊಂಡರು ಹಾಗೂ ಅದರಿಂದಲೇ ತನ್ನ ಕನ್ನಡ ಮತ್ತಷ್ಟು ಬೆಳವಣಿಗೆ ಕಂಡಿತು ಎಂದು ಸಹ ಜೈದ್ ಖಾನ್ ಹೇಳಿಕೊಂಡಿದ್ದಾರೆ.