ಮಾಸ್ಟರ್ ಆನಂದ್ 39ನೇ ಹುಟ್ಟುಹಬ್ಬ: ನೆನಪಿದೆಯಾ ಮಾಸ್ಟರ್ ಆನಂದ್ ಮೊದಲು ನಿರ್ದೇಶಿಸಿದ ಚಿತ್ರ?

ಮಾಸ್ಟರ್ ಆನಂದ್ ನಟನಾಗಿ ಅಭಿನಯಿಸಿದ ಮೊದಲ ಚಿತ್ರ

ಬಾಲ ನಟನಾಗಿ ನಟಿಸಿದ್ದ ಮಾಸ್ಟರ್ ಆನಂದ್ ನಂತರ 2002ರಲ್ಲಿ ತೆರೆಕಂಡ 'ಫ್ರೆಂಡ್ಸ್' ಎಂಬ ಚಿತ್ರದಲ್ಲಿ ನಾಯಕ ನಟನಾಗಿ ಕಾಣಿಸಿಕೊಂಡರು. ಈ ಚಿತ್ರದಲ್ಲಿದ್ದ ಐದು ನಾಯಕರಲ್ಲಿ ಮಾಸ್ಟರ್ ಆನಂದ್ ಕೂಡ ಒಬ್ಬರಾಗಿದ್ದರು. ಇದಾದ ಬಳಿಕ ಮಾಸ್ಟರ್ ಆನಂದ್ ಲೀಡ್ ಪಾತ್ರಗಳಲ್ಲಿ ನಟಿಸುವ ಅವಕಾಶ ಗಿಟ್ಟಿಸಿಕೊಳ್ಳಲಿಲ್ಲ. ದೇವರು ವರವನು ಕೊಟ್ರೆ, ಜೇಷ್ಠ, ಮಣಿ, ಬುಲೆಟ್ ಬಸ್ಯಾ, ಪ್ಯಾರ್ಗೆ ಆಗ್‌ಬುಟ್ಟೈತೆ ಹಾಗೂ ಜಾತ್ರೆ ಚಿತ್ರಗಳಲ್ಲಿ ಮಾಸ್ಟರ್ ಆನಂದ್ ಪೋಷಕ ನಟ ಪಾತ್ರವನ್ನು ನಿರ್ವಹಿಸಿದ್ದಾರೆ.

ನಿರ್ದೇಶನ ಮಾಡಿದ್ರು ಮಾಸ್ಟರ್ ಆನಂದ್

ಫ್ರೆಂಡ್ಸ್ ಮೂಲಕ ಚಿತ್ರರಂಗದಲ್ಲಿ ಎರಡನೇ ಇನ್ನಿಂಗ್ಸ್ ಆರಂಭಿಸಿದ್ದ ಮಾಸ್ಟರ್ ಆನಂದ್ 2011ರಲ್ಲಿ ಬಿಡುಗಡೆಗೊಂಡ '5 ಈಡಿಯಟ್ಸ್' ಎಂಬ ಚಿತ್ರದ ಮೂಲಕ ನಿರ್ದೇಶಕನಾಗಿಯೂ ಬಡ್ತಿ ಪಡೆದರು. ಆದರೆ ಈ ಚಿತ್ರ ಹೇಳಿಕೊಳ್ಳುವಂತ ಯಶಸ್ಸು ಸಾಧಿಸದೇ ಮಾಸ್ಟರ್ ಆನಂದ್ ಸೋಲನ್ನು ಕಂಡರು. ಬಳಿಕ 'ಮಚ್ಚಾ ಬಾಗ್ಲಾಕೋ' ಎಂಬ ಚಿತ್ರಕ್ಕೂ ಸಹ ಮಾಸ್ಟರ್ ಆನಂದ್ ಆಕ್ಷನ್ ಕಟ್ ಹೇಳಿದ್ದರು. ಅಷ್ಟೇ ಅಲ್ಲದೇ 'ಪಡುವಾರಳ್ಳಿ ಪಡ್ಡೆಗಳು' ಹಾಗೂ 'ರೋಬೊ ಫ್ಯಾಮಿಲಿ' ಎಂಬ ಧಾರಾವಾಹಿಗಳಿಗೂ ಸಹ ಮಾಸ್ಟರ್ ಆನಂದ್ ನಿರ್ದೇಶಕನಾಗಿ ಕೆಲಸ ನಿರ್ವಹಿಸಿದ್ದರು. ಅಷ್ಟೇ ಅಲ್ಲದೇ ಈಗ ಮಾಸ್ಟರ್ ಆನಂದ್ ರಿಯಾಲಿಟಿ ಶೋಗಳ ನಿರೂಪಕನಾಗಿಯೂ ಸಹ ಕೆಲಸ ನಿರ್ವಹಿಸುತ್ತಿದ್ದಾರೆ.

ಮಾಸ್ಟರ್ ಆನಂದ್ ಗೆದ್ದ ಪ್ರಶಸ್ತಿಗಳು

ಮಾಸ್ಟರ್ ಆನಂದ್ ಬಾಲನಟನಾಗಿದ್ದಾಗಲೇ ಉನ್ನತ ಪ್ರಶಸ್ತಿಗಳನ್ನು ಗೆದ್ದಿದ್ದರು. 1991 - 92ರಲ್ಲಿ ಗೌರಿ ಗಣೇಶ ಚಿತ್ರಕ್ಕಾಗಿ ಕರ್ನಾಟಕ ರಾಜ್ಯ ಪ್ರಶಸ್ತಿಯನ್ನು ಅತ್ಯುತ್ತಮ ಬಾಲನಟ ಕೆಟಗರಿ ಅಡಿಯಲ್ಲಿ ಪಡೆದಿದ್ದರು. 1994-95ರಲ್ಲಿ ಕರ್ನಾಟಕ ರಾಜ್ಯ ಪ್ರಶಸ್ತಿಯನ್ನು ತಾಯಿ ಇಲ್ಲದ ತವರು ಚಿತ್ರಕ್ಕಾಗಿ ಅತ್ಯುತ್ತಮ ಬಾಲ ನಟ ಕೆಟಗಿರಯಲ್ಲಿ ಪಡೆದಿದ್ದರು. 1995-96ರಲ್ಲಿ ಮಕ್ಕಳ ಸಾಕ್ಷಿ ಚಿತ್ರಕ್ಕಾಗಿ ಮಾಸ್ಟರ್ ಆನಂದ್ ಕರ್ನಾಟಕ ರಾಜ್ಯ ಪ್ರಶಸ್ತಿಯನ್ನು ಬಾಲ ನಟ ಕೆಟಗರಿ ಅಡಿಯಲ್ಲಿ ಪಡೆದಿದ್ದರು.