ದರ್ಶನ್ ಜೊತೆ ನಿಖಿತಾ ಸಿನಿಮಾ ಮಾಡಲ್ವಂತೆ!

ಸುಮಾರು ದಿನಗಳ ನಂತ್ರ ತಲೆ ಬಾಚ್ಕೊಂಡು ಪೌಡ್ರಾಕ್ಕೊಂಡು ಮತ್ತೆ ಗಾಂಧಿನಗರಕ್ಕೆ ಕಾಲಿಟ್ಟಿದ್ದ ನಿಖಿತಾ, ಹೀಗೆ ಮಾತಾಡ್ತಾ ಮಾತಾಡ್ತಾ ದರ್ಶನ್ ಟಾಪಿಕ್ ತೆಗೆದ್ರಂತೆ. ಚಾಲೆಂಜಿಂಗ್ ಸ್ಟಾರ್ ಅಭಿನಯಿಸುವ 50ನೇ ಚಿತ್ರ 'ಸರ್ವಾಂತರ್ಯಾಮಿ'ಗೆ ನಾನೇ ಹೀರೋಯಿನ್ನು ಗೊತ್ತಾ ಅಂದುಬಿಟ್ರಂತೆ.

ಈ ಅಂತೆಕಂತೆ ಗಾಂಧಿನಗರದ ತುಂಬೆಲ್ಲಾ ಗಿರಿಕಿ ಹೊಡೆದ್ಮೇಲೆ ಎಲ್ಲೋ ಇದ್ದ ನಿಖಿತಾಗೆ ಎಚ್ಚರವಾಗಿದೆ. ಅರ್ಥಾತ್, ದರ್ಶನ್ ಜೊತೆ ಸಿನಿಮಾ ಮಾಡುವ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ.

ಎಲ್ಲಾ ಗಾಳಿ ಸುದ್ದಿಗಳಿಗೆ ನಿಖಿತಾ ಹಾಕಿರುವ ಬ್ರೇಕ್ ಈ ಟ್ವೀಟ್. ''ನಾನು ಹೊಸ ಸಿನಿಮಾ ಮಾಡುವುದಾದರೆ, ಅದನ್ನ ಅನೌನ್ಸ್ ಮಾಡುತ್ತೇನೆ. ಸುಮ್ಮನೆ ಕಲ್ಪನೆ ಮಾಡಿಕೊಂಡು, ನನ್ನ ಕೆಲಸದ ಬಗ್ಗೆ ರೂಮರ್ಸ್ ಹಬ್ಬಿಸಬೇಡಿ ಅಂತ ಎಲ್ಲರನ್ನೂ ಕೇಳಿಕೊಳ್ಳುತ್ತೇನೆ. ಧನ್ಯವಾದ'' ಅಂತ ನಟಿ ನಿಖಿತಾ ತುಕ್ರಾಲ್ ಟ್ವೀಟ್ ಮಾಡಿದ್ದಾರೆ. [ರಾಯಣ್ಣನ ನಂತರ ಮತ್ತೆ ದರ್ಶನ್ ನಿಖಿತಾ ಜೋಡಿ?]

ಅಲ್ಲಿಗೆ, ಒಂದಂತೂ ಸ್ಪಷ್ಟ. ದರ್ಶನ್ ಜೊತೆ ನಿಖಿತಾ ನಟಿಸುತ್ತಿಲ್ಲ. ಆದ್ರೆ, ಈ ಸುದ್ದಿಯಿಂದ ಸುಂಟರಗಾಳಿ ಎದ್ದಿದ್ದು ನೋಡಿ, ಯಾರಾದ್ರೂ ನಿರ್ಮಾಪಕರು ಮನಸ್ಸು ಮಾಡಿದರೆ ದರ್ಶನ್ ಮತ್ತು ನಿಖಿತಾರನ್ನ ಮತ್ತೊಮ್ಮೆ ತೆರೆಮೇಲೆ ಒಂದು ಮಾಡಬಹುದೇನೋ..!?