ಮಾರ್ಚ್ 29ಕ್ಕೆ ತೆರೆಕಾಣಲಿವೆ 9 ಸಿನಿಮಾಗಳು: ನಿಮ್ಮ ಆಯ್ಕೆ ಯಾವುದು?

'ರಗಡ್' ಆಗಿ ಬರ್ತಿದ್ದಾರೆ 8 ಪ್ಯಾಕ್ ವಿನೋದ್ ಪ್ರಭಾಕರ್

ವಿನೋದ್ ಪ್ರಭಾಕರ್ ಅಭಿನಯದ ರಗಡ್ ಸಿನಿಮಾ ಇದೇ ತಿಂಗಳು 29ಕ್ಕೆ ರಾಜ್ಯದಾದ್ಯಂತ ರಿಲೀಸ್ ಆಗುತ್ತಿದೆ. ಯುವ ನಿರ್ದೇಶಕ ಮಹೇಶ್ ಗೌಡ ಸಾರಥ್ಯದಲ್ಲಿ ಸಿನಿಮಾ ಮೂಡಿಬಂದಿದೆ. 8 ಪ್ಯಾಕ್ ನಲ್ಲಿ ಮಿಂಚಿರುವ ವಿನೋದ್ ಗೆ ನಾಯಕಿಯಾಗಿ ಚೈತ್ರಾ ರೆಡ್ಡಿ ಕಾಣಿಸಿಕೊಂಡಿದ್ದಾರೆ.

ಗಾಂಧಿನಗರದಲ್ಲಿ ಲಂಡನ್ ಲಂಬೋದರ

ಈ ವಾರ ರಿಲೀಸ್ ಆಗುತ್ತಿರುವ ಚಿತ್ರಗಳಲ್ಲಿ 'ಲಂಡನ್ ನಲ್ಲಿ ಲಂಬೋದರ' ಸಿನಿಮಾ ಕೂಡ ತೆರೆಗೆ ಬರುತ್ತಿದೆ. ಬಿಗ್ ಬಾಸ್ ಖ್ಯಾತಿಯ ಶ್ರುತಿ ಪ್ರಕಾಶ್ ನಾಯಕಿಯಾಗಿ ಅಭಿನಯಿಸಿರುವ ಚೊಚ್ಚಲ ಸಿನಿಮಾ. ನಾಯಕನಾಗಿ ಯುವ ಪ್ರತಿಭೆ ಸಂತೋಷ್ ಕಾಣಿಸಿಕೊಂಡಿದ್ದಾರೆ. ರಾಜ್ ಸೂರ್ಯ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದಾರೆ. ಹಾಡುಗಳು ಮತ್ತು ಟ್ರೈಲರ್ ಮೂಲಕ ಗಮನ ಸೆಳೆದಿರುವ 'ಲಂಡನ್ ನಲ್ಲಿ ಲಂಬೋದರ' ಪ್ರೇಕ್ಷಕರ ಮನಗೆಲ್ಲುತ್ತಾ ಕಾದು ನೋಡಬೇಕು.

'ಪಂಚತಂತ್ರ'ದೊಂದಿಗೆ ಬರ್ತಿದ್ದಾರೆ ಭಟ್ರು

ಈ ವಾರ ರಿಲೀಸ್ ಆಗುತ್ತಿರುವ ಸಿನಿಮಾಗಳಲ್ಲಿ ನಿರ್ದೇಶಕ ಯೋಗರಾಜ್ ಭಟ್ ಅವರ 'ಪಂಚತಂತ್ರ ಸಿನಿಮಾ ಭಾರಿ ನಿರೀಕ್ಷೆ ಹುಟ್ಟಿಹಾಕಿದೆ. ಹಾಡುಗಳು ಮತ್ತು ಟ್ರೈಲರ್ ಮೂಲಕ ಚಿತ್ರಾಭಿಮಾನಿಗಳ ಕುತೂಹಲ ಹೆಚ್ಚಿಸಿದೆ. ಯುವ ಪ್ರತಿಭೆಗಳಾದ ವಿಹಾನ್ ಗೌಡ, ಅಕ್ಷರಾ ಗೌಡ, ಸೋನಲ್ ಮಾಂತೇರೊ ಅಭಿನಯಿಸಿರುವ 'ಪಂಚತಂತ್ರ' ಪ್ರೇಕ್ಷಕರ ಮನಗೆಲ್ಲುತ್ತಾ ಅನ್ನುವುದು ಇದೇ ವಾರ ಗೊತ್ತಾಗಲಿದೆ.

ಯದಾ ಯದಾ ಹೀ ಧರ್ಮಸ್ಯ

ಚಿನ್ನಾರಿ ಮುತ್ತಾ ವಿಜಯ್ ರಾಘವೇಂದ್ರ ಅಭಿನಯದ 'ಯದಾ ಯದಾ ಹೀ ಧರ್ಮಸ್ಯ' ಸಿನಿಮಾ ಸಹ ಈ ವಾರ ರಿಲೀಸ್ ಆಗುತ್ತಿರುವ 9 ಸಿನಿಮಾಗಳ ಲಿಸ್ಟ್ ನಲ್ಲಿದೆ. ಮೊದಲ ಬಾರಿಗೆ ಮಾಸ್ ಲುಕ್ ನಲ್ಲಿ ಕಾಣಿಸಿಕೊಂಡಿರುವ ವಿಜಯ್ ರಾಘವೇಂದ್ರ ಜೊತೆಗೆ ಪ್ರಜ್ವಲ್ ದೇವರಾಜ್ ಸಹ ಅಭಿನಯಿಸಿದ್ದಾರೆ. ಸಾಯಿ ಕುಮಾರ್ ವಿಲನ್ ಆಗಿ ನಟಿಸಿದ್ದಾರೆ. ಯುವ ಪ್ರತಿಭೆ ವಿರಾಜ್ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದಾರೆ.

ಮಕ್ಕಳ ಸಿನಿಮಾದ ಜೊತೆಗೆ ಇನ್ನೂ 4 ಸಿನಿಮಾಗಳು

ಸಂತೊಷ್ ಶೆಟ್ಟಿ ನಿರ್ದೇಶದ ಗಂಧದಕುಡಿ ಮಕ್ಕಳ ಸಿನಿಮಾ ಇದೆ ವಾರ ತೆರೆಗೆ ಬರುತ್ತಿದೆ. ಇದರ ಜೊತೆಗೆ ನಾಗೇಶ್ ಕುಣಿಗಲ್ ಕಥೆ, ನಿರ್ದೇಶನ, ಸಾಹಿತ್ಯ ಬರೆದು ನಿರ್ಮಿಸಿ ನಿರ್ದೇಶನ ಮಾಡಿರುವ 'ಹನಿಗಳು' ಸಿನಿಮಾ. ಸುಧಾಕರ್ ಬನ್ನಂಜೆ ನಿರ್ದೇಶನದ ಪಕ್ಕಾ ಲವ್ ಸ್ಟೋರಿಯ 'ರಣಕಣಕ', ಹೇಮಂತ್ ನಾಯ್ಕ್ ನಿರ್ದೇಶನದ 'ಧರ್ಮಾಪುರ' ಮತ್ತು ನಿರ್ದೇಶಕ ಮಧುಚಂದ್ರ ನಿರ್ದೇಶನದ 'ರವಿ ಹಿಸ್ಟರಿ' ಸಿನಿಮಾಗಳು ತೆರೆಗೆ ಬರುತ್ತಿವೆ. ವಿಶೇಷ ಅಂದರೆ ಈ ಎಲ್ಲಾ ಸಿನಿಮಾಗಳು ಹೊಸಬರ ಸಿನಿಮಾಗಳಾಗಿವೆ.