ತಾರೆಯರ ಮನೆಯಲ್ಲಿ ಸಂಕ್ರಾಂತಿ ಸೆಲೆಬ್ರೇಷನ್ ಹೇಗಿರುತ್ತೆ?

ಕಬ್ಬು ಅಂದ್ರೆ ರಚಿತಾಗೆ ಇಷ್ಟವಂತೆ

ಹೊಸ ವರ್ಷದ ಸಂಭ್ರಮದಲ್ಲಿರುವ ನಮಗೆ ಇದು ಇನ್ನಷ್ಟು ಖುಷಿ ಕೊಡುತ್ತೆ. ಮನೆಯಲ್ಲಿ ಪೊಂಗಲ್‌, ಎಳ್ಳುಬೆಲ್ಲ ಮಾಡುತ್ತೇವೆ. ಅಪ್ಪ ಅಮ್ಮನ ಜತೆ ದೇವಸ್ಥಾನಕ್ಕೆ ಹೋಗಿ ಪೂಜೆ ಸಲ್ಲಿಸಿ ಬರುತ್ತೇನೆ. ಮನೆಗೆ ಸ್ನೇಹಿತರು ಬರುತ್ತಾರೆ. ಕಬ್ಬು ನನಗೆ ತುಂಬಾ ಇಷ್ಟ. ಆದರೆ ಅದನ್ನು ತಿನ್ನೋದು ಸ್ವಲ್ಪ ಇಷ್ಟ.'' - ರಚಿತಾ ರಾಮ್, ನಟಿ

ಮೇಘನಾಗೆ ಈ ಸಂಕ್ರಾಂತಿ ಸ್ಪೆಷಲ್

ಮನೆಯಲ್ಲಿ ಪೊಂಗಲ್‌ ಮಾಡಲೇಬೇಕು. ಇದರ ಜತೆ ಆಂಟಿ ಮನೆಯಿಂದ ಎಳ್ಳುಬೆಲ್ಲ ಬರುತ್ತೆ. ಎಲ್ಲರೂ ಒಟ್ಟಿಗೆ ಹಬ್ಬ ಆಚರಿಸುತ್ತೇವೆ. ಚಿರಂಜೀವಿ ಸರ್ಜಾ ಜತೆ ನನ್ನ ಎಂಗೇಜ್ ಮೆಂಟ್‌ ಆದ್ಮೇಲೆ ಬಂದಿರುವ ಮೊದಲ ಸಂಕ್ರಾಂತಿ ಇದು. ಹಾಗಾಗಿ ಇದು ನನಗೆ ತುಂಬಾ ಸಂತೋಷ ಉಂಟು ಮಾಡಿದೆ ಎನ್ನುತ್ತಾರೆ ಮೇಘನಾ. ದರ್ಶನ್ ಕುರುಕ್ಷೇತ್ರದಲ್ಲಿ ಭಾನುಮತಿ ಆಗಿ ನಟಿಸುತ್ತಿರುವ ಮೇಘನಾ ಅವರ 'ಇರುವುದೆಲ್ಲವ ಬಿಟ್ಟು' ಚಿತ್ರದ ಪೋಸ್ಟರ್ ರಿಲೀಸ್ ಆಗಿದೆ.

ಹರಿಪ್ರಿಯಾ ಸಂಭ್ರಮ ಜೋರು

ಇತರೆ ಹಬ್ಬಗಳಿಗಿಂತ ಜೋರಾಗಿ ಸಂಕ್ರಾಂತಿಯನ್ನು ಆಚರಿಸುತ್ತೇವೆ. ಸಾಮಾನ್ಯವಾಗಿ ನಾನು ಯಾವ ಹಬ್ಬವನ್ನೂ ಮಿಸ್‌ ಮಾಡೋಲ್ಲ, ಮನೆಯಲ್ಲೇ ಇರುತ್ತೇನೆ. ಸಂಕ್ರಾಂತಿ ಸ್ವಲ್ಪ ಹೆಚ್ಚು ಸ್ಪೆಷಲ್‌. ಇವತ್ತು ಹಬ್ಬಕ್ಕೆ ಪೊಂಗಲ್‌, ಗೆಣಸು, ಕಡಲೆಕಾಯಿ ಇರಲೇಬೇಕು. ಹಸುವನ್ನು ಮನೆ ಬಾಗಿಲಿಗೆ ಕರೆತಂದು ಪೂಜೆ ಮಾಡಿ, ಅದಕ್ಕೆ ಪ್ರಸಾದವನ್ನು ತಿನ್ನಿಸಿ ನಂತರ ನಾವು ಊಟ ಮಾಡುತ್ತೇವೆ ಎನ್ನುತ್ತಾರೆ ನಟಿ ಹರಿಪ್ರಿಯಾ.

ಶ್ರುತಿ 'ಸಂಕ್ರಾಂತಿ'

ಸಂಕ್ರಾಂತಿ ಹಬ್ಬಕ್ಕಾಗಿ ನಾನು ಕಾಯುತ್ತಿರುತ್ತೇನೆ. ಯಾಕೆಂದರೆ, ನನಗೆ ಎಳ್ಳುಬೆಲ್ಲ ಅಂದ್ರೆ ತುಂಬಾ ಇಷ್ಟ. ನಮ್ಮ ಮನೆಯಲ್ಲಿ ಖಾರ ಮತ್ತು ಸಿಹಿ ಪೊಂಗಲ್‌ ಮಾಡುತ್ತೇವೆ. ಆದರೆ, ಎಳ್ಳುಬೆಲ್ಲ ಬೀರುವ ಪದ್ಧತಿ ನಮ್ಮಲ್ಲಿಲ್ಲ. ಹಾಗಾಗಿ ನನ್ನ ಸ್ನೇಹಿತರು ಕಳಿಸುವ ಎಳ್ಳುಬೆಲ್ಲ ನನಗೆ ಪ್ರಿಯ. ಅದರಲ್ಲಿರುವ ಒಣ ಕೊಬರಿ ಮತ್ತು ಬೆಲ್ಲದ ತುಂಡುಗಳನ್ನು ಮಾತ್ರ ಆರಿಸಿಕೊಂಡು ತಿನ್ನುತ್ತಾ ಕೂರುತ್ತೇನೆ. ಇದು ನನಗೆ ಪ್ರಿಯವಾದ ಕೆಲಸ' ಎನ್ನುತ್ತಾರೆ ಶ್ರುತಿ ಹರಿಹರನ್‌