ಎಸ್ ಪಿ ಬಿ ಕೊನೆಯದಾಗಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದೇನು?

ಆಗಸ್ಟ್ 5ಕ್ಕೆ ಕೊನೆಯ ಪೋಸ್ಟ್

ಎಸ್ ಪಿ ಬಿ ಈಗ ನೆನಪು ಮಾತ್ರ. ಆದರೆ ಅವರ ಅದ್ಭುತ ಗಾಯನ ಅಭಿಮಾನಿಗಳನ್ನು ರಂಜಿಸುತ್ತಲೇ ಇರುತ್ತೆ. ಎಸ್ ಪಿ ಬಿ ಕೊನೆಯದಾಗಿ ಆಗಸ್ಟ್ 5 ಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ಕೊರೊನಾ ಪಾಸಿಟಿವ್ ಬಂದ ಬಗ್ಗೆ ಹೇಳಿಕೊಂಡಿದ್ದರು. ಅದೇ ಕೊನೆಯ ಮಾತು. ಆ ನಂತರ ಎಸ್ ಪಿ ಬಿ ಮತ್ತೆ ಕಾಣಿಸಿಕೊಂಡಿಲ್ಲ.

ಎಸ್ ಪಿ ಬಿ ಹೇಳಿದ್ದೇನು?

ಗಾಯಕರಿಗೆ ಸಾಮಾನ್ಯವಾಗಿ ಕಾಣಿಸಿಕೊಳ್ಳುವ ಎದೆ ನೋವು ನನಗೆ ಕಾಣಿಸಿಕೊಂಡಿತು. ನಂತರ ಶೀತ ಹಾಗೂ ಜ್ವರ ಕಾಣಿಸಿಕೊಂಡಿತು. ಅದನ್ನು ಉಡಾಫೆ ಮಾಡದೆ ಆಸ್ಪತ್ರೆಗೆ ಹೋಗಿ ತೋರಿಸಿಕೊಂಡೆ, ವರದಿಯಲ್ಲಿ ಪಾಸಿಟಿವ್ ಇರುವುದು ಗೊತ್ತಾಯಿತು, ಕುಟುಂಬದವರ ಒತ್ತಾಯದಂತೆ ಆಸ್ಪತ್ರೆಗೆ ದಾಖಲಾಗಿರುವುದಾಗಿ ಹೇಳಿದ್ದಾರೆ.

ಯಾರು ಕರೆ ಮಾಡಬೇಡಿ ಎಂದಿದ್ದ ದಿಗ್ಗಜ ಗಾಯಕ

ನನ್ನ ಸ್ನೇಹಿತರೆಲ್ಲಾ ಕರೆ ಮಾಡುತ್ತಿದ್ದಾರೆ. ಆದರೆ ಯಾರೂ ಕರೆ ಮಾಡುವುದು ಬೇಡ. ನಾನು ಆರಾಮಾಗುತ್ತೇನೆ, ಹಾಗಾಗಿ ಆಸ್ಪತ್ರೆಗೆ ಬಂದಿದ್ದೇನೆ. ಆರೋಗ್ಯದ ಕಡೆ ಗಮನ ಕೊಡಲೆಂದು ಇಲ್ಲಿಗೆ ಬಂದಿದ್ದೇನೆ. ಎಲ್ಲರ ಕರೆಗಳನ್ನು ಸ್ವೀಕರಿಸಲು ನನಗೆ ಸಾಧ್ಯವಾಗದೇ ಇರಬಹುದು. ನಾನು ಇನ್ನೆರಡು ದಿನಗಳಲ್ಲಿ ಆರೋಗ್ಯವಾಗುತ್ತೇನೆ ಎಂದು ಎಸ್‌ಪಿಬಿ ಹೇಳಿದ್ದರು.

50 ಸಾವಿರಕ್ಕು ಅಧಿಕ ಹಾಡು

ಕನ್ನಡ, ತೆಲುಗು, ತಮಿಳು, ಹಿಂದಿ, ಮಲಯಾಳಂ ಭಾಷೆ ಸೇರಿದಂತೆ ಸುಮಾರು 16 ಭಾಷೆಯಲ್ಲಿ ಸುಮಾರು 50 ಸಾವಿರಕ್ಕೂ ಹೆಚ್ಚು ಹಾಡುಗಳನ್ನು ಎಸ್‌ಪಿಬಿ ಹಾಡಿದ್ದಾರೆ. ಅತಿ ಹೆಚ್ಚು ಹಾಡಿಗೆ ಧ್ವನಿಯಾಗಿದ್ದ ಎಸ್‌ಪಿಬಿ ಅವರು ಗಿನ್ನಿಸ್ ದಾಖಲೆಗೆ ಸಹ ಪಾತ್ರರಾಗಿದ್ದಾರೆ.