'ಸಲಗ' ಜೊತೆ ರಿಲೀಸ್ ಆಗಲಿದೆ ಮತ್ತೊಂದು ನಿರೀಕ್ಷೆಯ ಸಿನಿಮಾ

ವರಮಹಾಲಕ್ಷ್ಮಿ ಹಬ್ಬಕ್ಕೆ ಸಲಗ

ವರಮಹಾಲಕ್ಷ್ಮಿ ಹಬ್ಬದ ವಿಶೇಷವಾಗಿ ಆಗಸ್ಟ್ 20 ರಂದು ಸಲಗ ಸಿನಿಮಾ ರಿಲೀಸ್ ಮಾಡುವುದಾಗಿ ಚಿತ್ರತಂಡ ನಿರ್ಧರಿಸಿದೆ. ದುನಿಯಾ ವಿಜಯ್ ಮೊದಲ ಸಲ ನಟನೆಯ ಜೊತೆ ನಿರ್ದೇಶನ ಮಾಡಿರುವ ಚಿತ್ರ ಇದಾಗಿದ್ದು, ಹೆಚ್ಚು ನಿರೀಕ್ಷೆ ಮೂಡಿಸಿದೆ. ವಿಜಯ್ ಜೊತೆ ಡಾಲಿ ಧನಂಜಯ್ ಸಹ ಪ್ರಮುಖ ಪಾತ್ರ ನಿರ್ವಹಿಸಿದ್ದು, ಕೆಪಿ ಶ್ರೀಕಾಂತ್ ಬಂಡವಾಳ ಹಾಕಿದ್ದಾರೆ.

ಆಗಸ್ಟ್ 20ಕ್ಕೆ 'ನಿನ್ನ ಸನಿಹಕೆ'

ಸಲಗ ಬಿಡುಗಡೆ ದಿನವೇ ಡಾ ರಾಜ್ ಕುಮಾರ್ ಮೊಮ್ಮಗಳು ಅಭಿನಯದ 'ನಿನ್ನ ಸನಿಹಕೆ' ಚಿತ್ರವೂ ಥಿಯೇಟರ್‌ಗೆ ಬರಲಿದೆ. ಸೂರಜ್ ಗೌಡ ನಟಿಸಿ, ನಿರ್ದೇಶಿಸಿರುವ 'ನಿನ್ನ ಸನಿಹಕೆ' ಚಿತ್ರವೂ ವರಮಹಾಲಕ್ಷ್ಮಿ ಹಬ್ಬದ ವಿಶೇಷವಾಗಿ ಪ್ರೇಕ್ಷಕರೆದುರು ಬರುವುದಾಗಿ ಘೋಷಿಸಿಕೊಂಡಿದೆ. ಬಾಕ್ಸ್ ಆಫೀಸ್‌ನಲ್ಲಿ ಈ ಚಿತ್ರಗಳ ನಡುವೆ ಯಾವುದೇ ಪೈಪೋಟಿ ಇಲ್ಲವಾದರೂ ಕೋವಿಡ್ ಕಷ್ಟದ ಸಮಯದಲ್ಲಿ ಎರಡು ಚಿತ್ರ ಒಂದೇ ದಿನ ಬರ್ತಿರುವುದು ಚರ್ಚೆಗೆ ಕಾರಣವಾಗಿದೆ.

ಸೆಪ್ಟೆಂಬರ್‌ನಲ್ಲಿ ಭಜರಂಗಿ 2

'ಸಲಗ' ರಿಲೀಸ್ ಆದ 20 ದಿನಗಳ ನಂತರ ಶಿವಣ್ಣನ ಭಜರಂಗಿ-2 ಸಿನಿಮಾ ಬರ್ತಿದೆ. ಅಂದ್ರೆ ಸೆಪ್ಟೆಂಬರ್ 10ಕ್ಕೆ 'ಭಜರಂಗಿ-2' ಚಿತ್ರ ಥಿಯೇಟರ್ ಬರುವುದು ಖಚಿತವಾಗಿದೆ. ಲೆಕ್ಕಾಚಾರದಂತೆ ಸಲಗ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ ಇಂಡಸ್ಟ್ರಿಯಲ್ಲಿ ಮತ್ತೆ ಸಿನಿಮಾ ಸಂಭ್ರಮ ಶುರುವಾಗಲಿದೆ.

ಸುದೀಪ್ ಬರ್ತಡೇಗೆ ಕೋಟಿಗೊಬ್ಬ 3

ಸಲಗ ಹಾಗೂ ಭಜರಂಗಿ ಸಿನಿಮಾಗಳ ನಡುವೆ ಸುದೀಪ್ ಅಭಿನಯದ ಕೋಟಿಗೊಬ್ಬ 3 ಸಿನಿಮಾ ತೆರೆಗೆ ಬರಲಿದೆ. ಸದ್ಯದ ಮಾಹಿತಿ ಪ್ರಕಾರ, ಸೆಪ್ಟೆಂಬರ್ 2 ರಂದು ಕೋಟಿಗೊಬ್ಬ ಬಿಡುಗಡೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ. ಈ ಬಗ್ಗೆ ಚಿತ್ರತಂಡ ಅಧಿಕೃತವಾಗಿ ಪ್ರಕಟಿಸಿಲ್ಲ.