Oscars 2023 : RRR,ಕಾಂತಾರ ಅಷ್ಟೇ ಅಲ್ಲ.. ಆಸ್ಕರ್ ಲಿಸ್ಟ್‌ನಲ್ಲಿದೆ ಕಿಚ್ಚನ 'ವಿಕ್ರಾಂತ್ ರೋಣ'!

ಆಸ್ಕರ್ ಲಿಸ್ಟ್‌ನಲ್ಲಿ 'ವಿಕ್ರಾಂತ್ ರೋಣ'

2023ರಲ್ಲಿ ನಡೆಯುವ ಆಸ್ಕರ್ ಪ್ರಶಸ್ತಿಯ ಪಟ್ಟಿಯಲ್ಲಿ ಕಿಚ್ಚ ಸುದೀಪ್ ಅಭಿನಯದ ಅಡ್ವೆಂಚರ್ ಥ್ರಿಲ್ಲರ್ ಸಿನಿಮಾ ಕೂಡ ಸೇರಿಕೊಂಡಿದೆ. ಸುಮಾರು 301 ಸಿನಿಮಾಗಳಲ್ಲಿ 'ವಿಕ್ರಾಂತ್ ರೋಣ' ಕೂಡ ಒಂದು. 'ವಿಕ್ರಾಂತ್ ರೋಣ' ದಕ್ಷಿಣ ಭಾರತದ ನಾಲ್ಕು ಹಾಗೂ ಹಿಂದಿ ಜೊತೆ ಇಂಗ್ಲಿಷ್ ಭಾಷೆಗೂ ಡಬ್ ಆಗಿತ್ತು. ಇಂಗ್ಲಿಷ್‌ಗೆ ಸ್ವತ: ಸುದೀಪ್ ಡಬ್ ಕೂಡ ಮಾಡಿದ್ದರು. ದೇಶ-ವಿದೇಶದಲ್ಲೂ ತೆರೆಕಂಡಿದ್ದ ಈ ಸಿನಿಮಾ ಜೋರಾಗಿಯೇ ಸದ್ದು ಮಾಡಿತ್ತು. ಈಗ ಆಸ್ಕರ್ ಕನ್‌ಟೆನ್ಷನ್ ಪಟ್ಟಿಯ ಸೇರಿಕೊಂಡಿದ್ದು ಪ್ರಶಸ್ತಿ ಗೆಲ್ಲಲು ಪೈಪೋಟಿಗೆ ಇಳಿದಿದೆ.

'ವಿಕ್ರಾಂತ್ ರೋಣ' ಫೈಟ್

ಕಿಚ್ಚ ಸುದೀಪ್ ಇದೇ ಮೊದಲ ಬಾರಿಗೆ ಇಂತಹದ್ದೊಂದು ಫ್ಯಾಂಟಸಿ ಅಡ್ವೆಂಚರ್‌ ಸಿನಿಮಾದಲ್ಲಿ ನಟಿಸಿದ್ದಾರೆ. ಅನುಪ್ ಭಂಡಾರಿ ನಿರ್ದೇಶಿಸಿದ ಈ ಸಿನಿಮಾ ಬಿಡುಗಡೆಯಾದ ಹಲವು ದೇಶಗಳಲ್ಲಿ ಉತ್ತಮ ರೆಸ್ಪಾನ್ಸ್ ಸಿಕ್ಕಿತ್ತು. ಈಗ ಆಸ್ಕರ್ ಕನ್‌ಟೆನ್ಷನ್ ವಿಭಾಗದಲ್ಲಿ ಪ್ರಶಸ್ತಿ ಗೆಲ್ಲಲು ಪೈಪೋಟಿ ನಡೆಸಿದೆ. ಇದರಲ್ಲಿ ರಾಜಮೌಳಿ ನಿರ್ದೇಶನ RRR ಹಾಗೂ ರಿಷಬ್ ಶೆಟ್ಟಿ ನಟಿಸಿ, ನಿರ್ದೇಶಿಸಿದ ಸಿನಿಮಾ 'ಕಾಂತಾರ' ಕೂಡ ಪೈಪೋಟಿಗೆ ಬಿದ್ದಿದೆ.

ಆಸ್ಕರ್‌ಗಾಗಿ ಭಾರತದ 9 ಸಿನಿಮಾಗಳು ಫೈಟ್

ಆಸ್ಕರ್ ಪ್ರಶಸ್ತಿಯ ವಿಶೇಷ ವಿಭಾಗದಲ್ಲಿ ಭಾರತದ 9 ಸಿನಿಮಾಗಳು ಆಯ್ಕೆಯಾಗಿವೆ. ವಿಶ್ವದಾದ್ಯಂತ ಸುಮಾರು 301 ಸಿನಿಮಾಗಳಲ್ಲಿ ಭಾರತದ 9 ಸಿನಿಮಾಗಳು ಇವೆ. ಇದರಲ್ಲೂ ದಕ್ಷಿಣ ಭಾರತದ ಸಿನಿಮಾಗಳದ್ದೇ ಮೇಲುಗೈ. 'RRR','ಕಾಂತಾರ', 'ವಿಕ್ರಾಂತ್ ರೋಣ', ತಮಿಳು ಸಿನಿಮಾ 'ರಾಕೆಟ್ರಿ ದಿ ನಂಬಿ ಎಫೆಕ್ಟ್' , 'ಇರವಿನ್ ನಿಳಲ್' ಸೇರಿ ಒಟ್ಟು ಐದು ಸಿನಿಮಾಗಳಿವೆ. ಹಾಗೇ ವಿವಾದಾತ್ಮಕ ಸಿನಿಮಾ 'ದಿ ಕಾಶ್ಮೀರ್ ಫೈಲ್ಸ್' , 'ಗಂಗೂಬಾಯಿ ಕಾಠಿಯಾವಾಡಿ', ಸಿನಿಮಾಗಳು ಟಾಪ್‌ ಲಿಸ್ಟ್‌ನಲ್ಲಿವೆ.

ಆಯ್ಕೆ ಪ್ರಕ್ರಿಯೆ ಯಾವಾಗ?

ಈಗಾಗಲೇ ಆಸ್ಕರ್‌ಗೆ ಹೋಗಿರುವ ಸಿನಿಮಾಗಳಿಗೆ ಸುಮಾರು 9579 ಮಂದಿ ಸದಸ್ಯರು ವೋಟ್ ಹಾಕಲಿದ್ದಾರೆ. ಈ ಪ್ರಕ್ರಿಯೆ ಜನವರಿ 12ರಿಂದ ಆರಂಭ ಆಗಿ ಜನವರಿ 17ಕ್ಕೆ ಮುಗಿಯಲಿದೆ. ಇನ್ನು ಆಸ್ಕರ್‌ಗೆ ಪ್ರಶಸ್ತಿ ಗೆಲ್ಲುವ ಪಟ್ಟಿಯಲ್ಲಿ ಯಾವ್ಯಾವ ಸಿನಿಮಾ ಫೈಟ್‌ ಮಾಡಲಿದೆ ಎಂದು ಜನವರಿ 24ರಂದು ಘೋಷಣೆಯಾಗಲಿದೆ.